Nagugutom na ang transport sector, wala pa ring ayuda!

ni Grace Poe - @Poesible | June 01, 2021

Habang tumatagal ang pandemya, lalong nalulubog sa kahirapan ang mga kababayan nating nawalan ng kabuhayan. Sa dami ng nagsasarang negosyo at kumpanyang nagtatanggalan ng trabaho, marami ang ga-hibla na lamang ang layo sa desperasyon. Kabilang sa mga ito ang transport sector workers na hindi nakapasada mula pa noong Marso ng nakaraang taon.

Batid natin ang hinaing ng mga PUV drivers at transport sector workers noon pa mang simula ng pandemya kaya iginiit nating makinabang sila sa service contracting program na binigyan ng alokasyon sa Bayanihan 2. Nasa 5.58 bilyong piso ang ginawang alokasyon noong aprubahan ang programa noong Setyembre 2020. Sa awa naman ng Diyos, nasa 461.8 milyong piso pa lang ang naipamumudmod sa mga nararapat na benepisaryo. Ibig sabihin, wala pang 1/10 ng alokasyon sa budget ang naipamigay. Ang kaso, hanggang Hunyo 2021 lang ang paglalabas ng ayuda, kaya napakalaking halaga na makatutulong sana sa ating mga kababayan ang masasayang. Maliban na lamang kung magkaroon ng ekstensiyon, babalik lamang ang naka-budget na sanang pantulong sa ating national treasury.

May isang buwan pang natitira para ibigay ang nailaan nang ayuda para sa mga PUV drivers at transport sector workers na talaga namang nawalan ng kabuhayan ngayong pandemya. Bilis-bilisan ang distribusyon kaysa mapaso ito nang hindi nakararating sa dapat makinabang.

Ang pagbagal ng service contracting program ng pamahalaan para sa PUV drivers at transport sector workers ay karagdagang pahirap sa kanila. Naipasa na ang budget nito — ibibigay na lang. Bawasan ang red tape, gawing sistematiko ang pagpapatupad, para mapakinabangan ng mga nangangailangan ang tulong sa kanila sa panahong ito.

Lahat tayo ay takot sa COVID. Nakikita nating nakamamatay ang karamdamang ito. Pero alam ninyo, mga bes kung ano pa ang nakamamatay? Gutom. Kawalan ng tirahan. Kahirapan.

Bilis-bilisan ang pamimigay ng nararapat na ayuda. Huwag natin hintaying patay na ang taong dapat sanang makinabang sa tulong ng pamahalaan.

Herd immunity, kailangan natin

ni Grace Poe - @Poesible | May 24, 2021

Nagpahayag ang Inter-Agency Task Force na hindi na ia-anunsiyo ang tatak ng bakunang itu­tu­rok sa bawat vaccination centers. Ito ay mata­pos ng pagkumpol ng mga tao para mabakunahan ng isang brand na gusto ng marami na matanggap sa isang bayan sa Kamaynilaan. Para iwasan ang pagpili ng tatak, iniatas na malalaman ng tao kung ano ang ibibigay sa kanya sa pagpirma na ng consent form.

Pinaiigting natin ang pagba­bakuna para magkaroon ng herd immunity ang ating bansa. Ibig sabihin, marami na sa ating mga mamamayan ang may antibo­dies panlaban sa virus, sapat para hindi na tayo lubhang maapek­tuhan nito.

Dalawa ang malaking hamon sa atin: una, limitado ang supply ng bakuna. Maraming nagrerek­lamo sa alokasyon ng bawat local government unit (LGU) dahil kulang na kulang. Ikalawa, ma­ging ang mga ubra na sanang ba­­kunahan, may agam-agam na epektibo ang bakuna kaya ayaw magpaturok.

Naniniwala tayong napa­kaha­laga sa puntong ito na paig­tingin ng Department of Health (DOH) ang edukasyon tungkol sa bakuna at sa bawat brand na mayroon dito sa Pilipinas. Kai­la­­ngang maunawaan ng mga mamamayan na ligtas at mabi­sa ang bawat bakuna sa pagla­ban sa COVID-19.

Ang bawat bakuna ay may iba-ibang pormulasyon. Gayun­man, ayon sa mga pag-aaral, lahat naman ay epektibo laban sa severe case ng COVID-19 infection.

Kailangang maipala­gay ang loob ng ating mga kababayan na hindi sila bibigyan ng baku­nang hindi ligtas sa kanila. Nag­babakuna tayo para sa protek­siyon ng ating ma­ma­mayan. Kailangan nila ng ga­ran­ti­ya na hindi gagawa ang pama­halaan ng hak­bang na hin­di para sa kanilang kabu­tihan.

Panahon din ito para sawayin ang mga walang magawa kundi magkalat ng misimpormasyon. Sa social media, merong nagla­labas ng mga walang basehan at katoto­hanang mga kuwento para takutin ang mga tao tungkol sa pagba­bakuna. Mga bes, hindi kayo na­ka­­katulong. Kung ayaw magpa­bakuna, irerespeto ang in­yong desisyon, pero huwag mag­hasik ng kamangmangan para pigilan ang ilan na naniniwala rito.

Karapatan ng bawat isa ang magpasya kung ano makabubuti para sa kanilang sarili at kung ano ang ipapasok nila sa kanilang katawan. Alamin ang pakinabang ng bawat bakuna bago ito tang­gihan. Isaalang-alang natin ang napakaraming taong namatay na umaasang mabakunahan pero hindi na nila inabutan ito.

Gawin natin ang ating parte para makamit ng bansa natin ang herd immunity laban sa COVID-19.

Senior citizens, tulungan ngayong pandemya

ni Grace Poe - @Poesible | May 17, 2021

Bagama’t isinailalim na sa General Community Quarantine (GCQ) na may mahigpit na restriksiyon ang National Capital Region (NCR) pati na ang mga lalawigan ng Bulacan, Laguna, at Cavite, at GCQ ang ilang lalawigan mula Mayo 15 hanggang 31, patuloy pa ring pinahihirapan ng COVID ang ating bansa. Ang pagluluwag sa klasipikasyon ay malinaw na para sa ekonomiya nating naghihingalo dahil sa epekto ng pandemya. Nanawagan ang mga negosyante at mga manggagawa: kailangan nila ng trabaho. Kailangan nila ng pagkaing ihahain para sa kanilang pamilya.

Habang nakasusunod sa bagong normal ang mga bata dahil sa pagiging maalam sa teknolohiya, ang matatanda ay nangangapa. Marami sa senior citizens natin, nawalan ng ikabubuhay ngayong pandemya. Kahit ang mga maparaan sa buhay, walang magawa dahil bawal silang lumabas ng tahanan.

Naniniwala tayong sa yaman ng karanasan ng ating senior citizens, makapag-aambag sila sa pagbangon ng ating bansa mula sa trahedyang dumating sa atin. Kailangan ng krusyal na interbensiyon mula sa ating pamahalaan para bigyan sila ng pagkakakitaan sa bahay para hindi sila makipagsapalaran sa labas at makakuha ng impeksyon ng COVID-19.

Hinihimok natin ang Department of Education at ang Commission on Higher Education na bumuo ng programa ang mga paaralan at training institutions para maturuan ng mga kabataang tech savvy ang ating senior citizens para maunawaan at matutunan nila ang teknolohiya.

Gayundin naman, ang Department of Labor and Employment ay maaaring mag-ugnay ng ating senior citizens sa home-based livelihood opportunities para kumita sila mula sa kanilang mga tahanan. Napakalaki ng magagawa ng pasilitasyon at koneksiyon ng nangangailangan ng tao at ng nangangailangan ng trabaho. Mahalaga rito ang koordinasyon sa pribadong sektor na maaaring lumikha ng oportunidad para sa ating nakatatanda.

Nagbubukas ang remote work ng pagkakataon para maging produktibo ang ating senior citizens. Sa panahong malaki ang tama sa kanilang kalusugang mental at katayuang pinansyal ng pandemya, nararapat tulungan ng pamahalaan ang ating mga lolo at lola na tumanda na paghahanapbuhay. Kung mabibigyan sila ng pagkakataong magtrabaho at kumita, hindi sila aasa sa ayuda.