Matinding gutom sa bansa, bigyang-pansin

ni Grace Poe - @Poesible | July 19, 2021

Isa sa kabalintunaan sa Pilipinas ang pagkakaroon ng malawak at mayamang lupa, subalit maraming mamamayan ang nagugutom. Naturingan tayong bansang agrikultural pero walang makain ang mga tao natin.

Ngayong panahon ng pandemya, mas maigting pa ang problemang ito. Dahil bagsak ang ekonomiya at marami ang nawalan ng trabaho, marami ang nakararanas ng kakulangan ng pagkain.

Ayon sa datos ng Social Weather Station, mahigit na apat na milyong pamilya ang nagugutom nitong Mayo. Tumaas ito mula sa bilang noong Nobyembre noong isang taon.

Nananawagan tayo sa Department of Agriculture (DA) na tutukan ang pagpapataas ng produksiyong agrikultural para dumami ang ani na panggagalingan ng pagkain ng sambayanan. Sa ganitong paraan, matutugunan ang problema ng pagkagutom sa pamamagitan ng pagkakaroon ng pagkaing abot-kaya ang halaga para sa mamamayan at kita para sa ating mga magsasaka.

Krusyal ang liderato ng DA sa pagpapataas ng produksyong agrikultural. Kung nasa kabilang panig ng mga miyembro ng sektor ng agrikultura ang mga opisyal ng kagawaran, mahirap magkatulungan sa mga proyekto. Dapat iparamdam sa mga magsasaka at iba pang stakeholders na ang kapakanan nila bilang pangunahing apektado sa usapin ng produksiyon ang inaalala at pinangangalagaan ng DA.

Nakikita natin sa haba ng pila sa food pantries ang kakulangan sa pagkain ng marami sa ating mahihirap na kababayan. Sa gitna ng pandemya, marami ang naghihikahos at naghahanap ng pagkaing maihahain sa kanilang mesa.

Napakahalaga ng seguridad sa pagkain sa paglaban sa gutom sa gitna ng pandemya. Dapat kumilos ang ahensyang responsable para sa produksyon ng pagkain sa ating bansa. Tulungan natin ang ating mga magsasaka para matulungan din tayo sa supply ng pagkain.

◘◘◘

Sa pagtukoy ng Department of Health (DOH) na may local transmission na ang Delta variant ng COVID-19, hinihimok natin ang lahat ng ating mga kababayan na ibayuhin ang pag-iingat. Kung may pagkakataong magpabakuna, huwag nating sayangin. Kahit bakunado na, alalahaning maaari pa ring makakuha ng impeksiyon.

Ipagpatuloy natin ang pagsunod sa social distancing, pagsusuot ng facemask, pagpapanatiling malinis ng ating mga kamay, at hindi paglabas kung hindi naman kinakailangan para maiwasan natin ang pagkakaroon na naman ng pagtaas ng mga kaso ng COVID-19 sa ating bansa. Nakita na natin ang nangyari sa India at Indonesia. Gawin natin ang ating parte para iwasan ang muling paglaganap ng nasabing sakit sa ating bansa.

Paggamit ng body cameras, malaking tulong sa operasyon ng pulisya

ni Grace Poe - @Poesible | July 12, 2021

Masaya tayo sa atas ng Korte Suprema sa Administrative Matter No. 21-06-08-SC na kinakailangan na ang pagsusuot ng body cameras ng maghahain at magpapatupad ng search at arrest warrants. Isang positibong hakbang ito sa pagsasaayos ng ating criminal justice system.

Kung walang body camera o alternate recording device, at hindi naipagbigay-alam at inihingi sa korte ng pahintulot na ituloy ang operasyon, hindi tatanggapin ang ebidensiyang makukuha para sa kaso. Makakasuhan din ng contempt of court o paglapastangan sa korte ang pulis na hindi magsusuot ng body camera sa operasyon.

Kasama tayo sa mga nanawagan para rito noong kasagsagan ng pag-aresto sa mga di-umano’y drug suspects na napatay dahil “nanlaban.” Naniniwala tayong mahalaga ang body cameras para sa integridad ng pag-aresto kaugnay ng ating mga prosesong legal. Proteksiyon ito para sa pulis na nagpapatupad ng warrant para hindi sila maakusahan ng pag-abuso sa kanilang awtoridad. Pabor ito, lalo na sa mamamayang paghahainan ng warrant dahil maiiwasan ang mga insidente na pagtatanim ng ebidensiya laban sa kanila. Pabor sa lahat ng panig ang dokumentasyong ito.

Sa atas ng Korte Suprema, ipaaalam agad ng mga pulis sa paghahainan ng warrant ang kanilang pakay at na naka-record sila. Ang audio at video recording functions ng body camera ay kailangang i-on pagdating sa lugar na pagsasagawaan ng operasyon at dapat manatiling gumagana hanggang matapos doon. Kung pag-aresto ang gagawin, hanggang makarating sa presinto, naka-on ang body camera. Kung search warrant naman, naka-record ang pagpasok at ang paghahalughog para matiyak na sang-ayon sa batas ang ginagawang operasyon. Papatayin lamang ang body camera kapag nasa istasyon na ng pulis. Pagkatapos, ang recordings ay ise-save sa external storage device na ilalagay naman sa selyadong lalagyan at ide-deposito sa korteng nag-issue ng warrant.

Gayunman, sinabi rin ng Korte Suprema na hindi mangangahulugang ilegal ang operasyon kung walang body camera ang pulis. May pagkakataon silang patunayan ang mga pangyayari at sitwasyon na dahilan kung bakit wala silang body camera.

Ang pagkakaroon ng body camera ay malaking bagay para matiyak ang regularidad ng mga operasyon sa paghahain at pagpapatupad ng mga warrant. Ito ang inaasahan nating magwawakas sa panahon ng palitan ng akusasyon sa pagitan ng mga pulis at pamilya ng mga akusadong napatay sa operasyon. Ito na sana ang magwawakas sa mga frame-up at tanim-ebidensiya.

Doble-ingat sa Delta variant

ni Grace Poe - @Poesible | July 05, 2021

Kumusta ang estado ng pagbabakuna sa inyong lugar, mga bes? Patuloy ang pagrorolyo ng baksinasyon sa iba’t ibang panig ng bansa, lalo na sa mga lugar na may mataas na insidente ng COVID-19. Hinihikayat natin ang lahat na makibahagi sa prosesong ito para magkaroon ng laban ang ating bansa kontra COVID-19.

Bagama’t bumaba na ang mga kaso sa National Capital Region (NCR) at kalapit na lalawigan kumpara sa nakaraang mga buwan, mapapansin na ibang bahagi naman ng bansa ang nahihirapan sa mataas na bilang ng impeksiyon. Bagama’t nagluluwag ng restriksiyon sa ating bansa, hindi ito nangangahulugang ligtas na tayo. Malayu-layo pa tayo, lalo na dahil sa nagbabadyang panganib ng Delta variant.

Ano ba itong tinatawag na Delta variant ng COVID-19? Ito ang klase ng COVID-19 na nakita nating sumalanta sa India. Kumpara sa mga naunang bersiyon ng virus, mas mabilis kumalat at mas matindi ang tama nito. Mas malaki ang tsansa na magkaroon ng karamdaman na magdudulot ng pagkakaospital ito. Dahil nagbago na ang virus mula noong ginawa ang mga bakunang mayroon tayo, may tsansa na hindi sapat ang proteksiyon laban dito.

Dahil sa Delta variant, nagkakaroon ng panibagong pagtaas ng bilang ng kaso ng COVID-19 sa ibang bansa. Naging dahilan ito ng imposisyon ng bagong lockdowns sa ibang lugar. Sa ating bansa, iniulat ng Department of Health (DOH) na sa itinatayang 17 kaso ng Delta variant, 15 umano ang gumaling na, 1 ang namatay, at 1 pa ang nasa ospital.

Kung kakalat ang Delta variant sa ating bansa, malaking-malaki ang peligro sa atin. Malamang-lamang, sa loob ng bahay pa rin tayo magpa-Pasko, at baka magbalik na naman ang paghihigpit sa mga establisimyento. Ngayon pa lamang, agapan na natin ito. Higpitan ang border controls natin sa mga bansang may mataas na insidente ng Delta variant. Huwag nating ulitin ang pagkakamali natin noong unang bahagi ng pandemyang ito. Panahon ito para sa mabilis na desisyon kontra sa impeksiyon.

Patuloy pa rin nating sundin ang ipinatutupad na social distancing, pagsusuot ng facemask, at madalas na paghuhugas at paglilinis ng kamay. Napakaliit na bahagi pa lang ng ating populasyon ang may bakuna at patuloy ang mutasyon ng coronavirus. Gawin natin ang ating parte sa pamamagitan ng pag-iingat. Tandaan, ang apektado kapag may nakakuha ng impeksiyon ay hindi lamang ang may katawan, kung hindi pati ang mga tao sa ating paligid.

Ibayong ingat tayo, mga bes.