Tapatan ang sakripisyo ng mga healthcare workers

ni Grace Poe - @Poesible | August 30, 2021

Noong Sabado, naitala ang pinakamataas na bilang ng kaso ng COVID-19 sa ating bansa, kung saan 19, 441 ang bagong kumpirmadong nagpositibo sa nasabing karamdaman; bahagya na lang, nasa 20, 000 na ang bilang. Samantala, ang ating social media feed ay napupuno ng mga obituwaryo para sa mga namatay, panawagan para sa ospital na maaaring tumanggap pa ng pasyenteng may COVID-19, at mga nanghihingi ng tulong at panalangin para sa pamilya at kaibigang nagkasakit.

Sa harap ng laban sa COVID-19, nakabala ang ating medical frontliners. Sa pagod ng marami sa kinahaharap araw-araw, marami na ang nagbitiw sa kanilang trabaho. Ang masaklap, marami pa ang nagbabalak mag-resign.

Hindi natin masisisi ang ating healthcare workers. “Toxic” ang isang salitang madalas gamitin sa mga ospital, dahil sa dami ng pasyente na kanilang ginagamot araw-araw. Ang masaklap, sa kabila ng panganib na sinusuong nila, hindi pa nila matanggap ang tamang benepisyo na inilalaan ng batas.

Sa Bayanihan Law na ating inaprubahan, hindi lamang special risk allowance ang dapat matanggap ng ating healthcare workers. Nariyan din ang hazard pay, akomodasyon at allowances para sa transportasyon at pagkain. May budget nang inilaan ang batas, kailangan na lang ang implementasyon ng Department of Health (DOH).

Nananawagan din tayo sa mas maluwag at makatuwirang interpretasyon ng batas para hindi lang limitahan sa direktang nag-aalaga sa mga pasyenteng may COVID-19 ang makatatanggap ng special risk allowance. Dapat maisama ang lahat ng healthcare workers sa mga ospital na gumagamot ng mga tinamaan ng nasabing karamdaman dahil mismong ang lugar ng trabaho nila ang may mataas na exposure sa virus.

Huwag nating itulak ang healthcare workers na pumunta sa kalsada sa pag-alma dahil hindi nila natatanggap ang mga benepisyong para sa kanila. Kaunting konsuwelo lang ang kanilang hinihingi na hindi makapapantay sa kanilang paglilingkod ngayong pandemya. Ibigay natin, at sa lalong madaling panahon, ang inilaan na para sa kanila.

Hanggang abang na lang sa benepisyo ang mga health workers

ni Grace Poe - @Poesible | August 23, 2021

Isa ang pagdiriwang ng mga tradisyon sa mga kasiyahang inalis sa atin ng pandemya. Tuwing Agosto 20, nagtitipon ang ating mga kapamilya, kaibigan, at tagasuporta sa North Cemetery para sa misa para ipagdiwang ang kapanganakan ni Fernando Poe, Jr.. Dahil sa mga restriksiyon para iwasan ang pagkalat ng impeksiyon, kani-kanyang pag-aalay ng bulaklak at panalangin lamang tayo ngayong taon.

Pero kahit walang pagtitipon, napakasaya natin dahil hindi nawawala si FPJ sa puso ng mga tao. Sa pamamagitan ng Panday Bayanihan, ang binuo nating pangkat kasama ang mga kaibigan at tagasuporta ni Da King, napapanatili nating buhay ang alaala ng aking ama sa pamamagitan ng pagtulong sa kapwa. Kabilang sa hinatiran natin ng tulong ang mga tsuper, magsasaka at mangingisda, at iba pang nawalan ng kabuhayan ngayong pandemya.

Hangad nating sa maliit mang paraan, maipadama natin sa ating mga kababayan na hindi natin sila nalilimutan, lalo na sa panahon ng pangangailangan. Tulad ng turo ni FPJ sa atin, walang iwanan.

◘◘◘

Sa paglabas ng audit report ng Commission on Audit (COA) sa paggamit ng Department of Health (DOH) sa COVID-19 funds, mapapaisip ka talaga kung hindi ba dapat suspendido na ang kalihim ng nasabing ahensiya sa ngayon, kung gagamitin ang pamantayang inilapat sa Philhealth officials na nasangkot sa kontrobersiya.

Kung matatandaan, ipinag-utos ng Ombusdman ang preventive suspension ng walong Philhealth executives at limang opisyal ng DOH noong isang taon dahil sa iba’t ibang paglabag kaugnay ng paggamit ng pera ng taumbayan ngayong pandemya.

Sa gitna ng pandemya, napakalaki ng atas sa DOH bilang tagapanguna sa ating laban sa COVID-19. Ito ang dahilan kung bakit pinaglaanan natin ng pondo ang mga programa ng nasabing ahensiya. Ang problema, ang ating medical frontliners, hanggang sa ngayon ay nag-aabang pa rin na matanggap ang kanilang benepisyo. May mga namatay na sa paghihintay ng kakarampot na pampalubag-loob.

Pananagutan ang isa sa pinakamahalagang katangian ng isang pinuno. Ito ang hinahanap natin sa DOH. Ang nangyayari sa DOH ay hindi na lamang kapabayaan. Ito ay kriminal. Namamatay ang mga tao dahil sa kamanhiran at kawalan ng aksyon ng nasa katungkulan.

Hindi pa ba puno ang salop sa DOH? Baka dapat nang kalusin.

Walang dapat masayang na pondo, lalong wala dapat maibulsa

ni Grace Poe - @Poesible | August 16, 2021

Dumating na nga ang inaasahang pagtaas ng COVID-19 infection sa ating bansa. Noong Sabado, nakapagtala tayo ng mahigit 14 milyong kumpirmadong kaso, at hindi pa kumpleto ito dahil may mga laboratory na hindi nakapagpasa ng kanilang ulat. Naglalabas na ng anunsiyo ang maraming ospital na puno na ang pasilidad nila at hindi na makapag-a-admit ng COVID-19 patients.

Pinahaba ang Enhanced Community Quarantine (ECQ) sa ibang lugar bilang mabilisang solusyon para pabagalin ang transmisyon ng impeksiyon sa mga lokalidad. Kahit marami ang umaalma sa paulit-ulit na lockdown na walang kasamang testing at walang suporta sa mga apektadong industriya at kabuhayan. Sa gitna nito lumabas ang findings ng Commission on Audit ng mga pagkukulang sa paggamit ng 67.32 bilyong COVID-19 fund ng Department of Health (DOH).

Naglaan ang pamahalaan ng pondo sa Department of Health (DOH) para magamit sa ating COVID-19 response.

'Yun lang, lumalabas na hindi agad nagamit ang pondo o kaya natengga lamang. Sa panahong napakarami sa ating mga kababayan ang naghihintay ng aksiyon mula sa DOH, hindi naman pala umabot sa implementasyon ang pinaglaanan natin ng budget.

Dahil dito, naghain tayo ng panukala na imbestigahan ang mga pagkukulang ng DOH base sa COA report, kabilang na ang paggamit ng pondo hindi sa pinaglaanan nito, maling pagcha-charge ng mga transaksiyon, kaduda-dudang likuwidasyon, pagbili nang walang legal na basehan, at iba pang mga bagay na nais nating maging malinaw.

Isa sa mga kumalat sa social media ang dokumento para sa pagbili ng apat na laptop na binayaran ng DOH ng P700,000. Pinagpistahan ito ng netizens dahil pinalobo ang halaga ng nasabing computer units. Sa panahon ng pandemya na ang ating healthcare workers na araw-araw sumusuong sa panganib ng impeksiyon ay hindi nakatatanggap ng wastong hazard pay sa tamang oras, insulto ang ganitong mga anomalya sa nasabing ahensiya.

Ang magsawalang-bahala sa gitna ng paghihirap ng bansa ay malaking kamanhiran.

Bilang mambabatas, ginagawa natin ang lahat para magkaroon ng pondo ang mga programa ng bawat ahensiya ng pamahalaan para makapaghatid ng serbisyo sa ating mga kababayan. Ito ay pera ng mga tao na dapat ibalik sa kanila sa pamamagitan ng paglilingkod. Hindi ito dapat masayang, at lalong hindi dapat maibulsa ng mga walang malasakit sa kapwa.