Bago sabihang gumastos, magbigay ng panggastos!

ni Grace Poe - @Poesible | February 1, 2021

Hello, mga bes! Kumusta kayo ngayong mga araw na ito? Nailabas na ba sa taguan ang mga pangginaw ninyo? Ang sarap ng lamig tuwing umaga nitong nakaraang mga araw, nakakagana lalo magkape.

Nabahala tayo sa pahayag ng ilang opisyal ng pamahalaan na lumabas ang mga tao at mamili sa pamilihan para sumigla ang ating ekonomiya. Pambihira naman! Tama, makakatulong para makabangon ang mga negosyo ang pagtangkilik ng mga tao. Pero mga bes, paano naman gagastos ang mga tao kung wala silang panggastos? Napakaraming nawalan ng trabaho dahil nagsara ang kanilang pinapasukan, bukod pa sa mga nagnegosyong nalugi dahil sa pandemya. Para sa atin, insensitibo naman na sabihan silang gumastos kung kailan namamaluktot sila para manatiling buhay sa mga panahong ito.

Sa pagpapalagay ng ating economic planners, ang paggasta ng mga consumer ang susi sa pagbangon ng ekonomiya. Tama ito sa teorya. Pero ang katotohanan, saan huhugot ang mga tao ng gagastahin? Manhid naman na sabihan natin ang mga taong nawalan ng trabaho na gumastos sila, lalo pa at napakamahal ng mga bilihin ngayon. Sa mahal ng bilihin, lalo na ng pagkain, hindi natin maasahan ang mga kababayan nating maglalabas.

Nagbigay ang pamahalaan ng ayuda noong kasagsagan ng paghihigpit ng lockdown. Ngayong sampung buwan na tayong naka-quarantine, marami ang nakakaramdam na mas kailangan nila ngayon ang tulong, pero wala nang dumarating.

Kailangang tutukan ng National Economic Development Authority (NEDA) ang employment dahil ito ang sektor na lubhang apektado ng pandemya. Noong isang taon pa dumadaing ang mga negosyo sa pamahalaan na bigyan sila ng tulong. Kailangan nating kilalanin na kung hindi natin bibigyan ng financial stimulus ang mga negosyo, magsasara ang mga iyan, na siyang nangyayari nga. Kapag nalugi at nawala ang mga negosyo, kasabay nitong malulugmok ang mga trabahador at empleyadong umaasa sa mga establisimiyento para mabuhay.

Isa ang mga Pilipinas sa may pinakamahabang quarantine sa buong mundo. Totoo, mahalaga ang buhay at kaligtasan kaysa pera. Pero katotohanan ring kailangang harapin natin na kailangan ng ilalaman sa sikmura at pangtustos sa gastos para magkaroon ng ligtas na tirahan ang ating mga mamamayan.

Sinusubukan ng pandemyang ito ang talas ng isip ng mga nagpaplano at nagpapatakbo ng ating ekonomiya. Ang hamon ay balansehin ito sa malasakit sa ating mga kababayang higit na nakakadama ng epekto ng pandemya sa kanilang araw-araw na pamumuhay.

Maayos na sistema at libreng pagpapabakuna, ayos!

ni Grace Poe - @Poesible | January 25, 2021

Naghihintay pa rin tayo ng bakuna sa ating bansa. Bagama’t umuusad na ang programa ng baksinasyon sa mauunlad na bayan, tayo ay nag-aabang kung kailan makararating sa Pilipinas ang mga ito. May order na ang ating pamahalaan sa iba’t ibang kumpanya pero hindi ito agad-agad maibibigay dahil sa taas ng demand para sa COVID-19 vaccine.

Dahil maglalatag ang pamahalaan ng isang programa ng pagbabakuna, naghain tayo ng isang panukalang-batas para sa pagkakaroon ng standard vaccine certificate na ibibigay sa mamamayan ng libre bilang katunayan ng mga bakunang mayroon na sila. Sa pamamagitan ng Senate Bill No. 1994 o ang “Vaccine Passport Act,” magbibigay ang Department of Health ng sertipiko na maaaring gamitin ng mga mag-aaral, OFWs, at iba pang mamamayan na magpapatunay na nakatanggap na sila ng kaukulang bakuna.

Bakit nga ba kailangan pa ang vaccine passport? Mahalaga ito dahil isa itong opisyal na dokumento mula sa pamahalaan na may timbang kahit sa ibang lugar. Kung hanapan ang katunayan ang mga aplikante para sa trabaho sa ibang bansa, puwedeng-puwede itong ipakita. Inaasahan nating sa hinaharap, dahil na rin sa nakitang epekto ng COVID-19, magiging bentahe ng ating mga kababayan na nagpabakuna na may panlaban sila sa nasabing virus.

Hindi lamang COVID-19 vaccine ang lalamanin ng nasabing dokumento. Isasama rito ang lahat ng mga bakunang natanggap na ng tao. Sa kanilang parte, gagawa at magpapanatili naman ang DOH ng database ng mga taong nakatanggap ng bawat bakuna.

Sa ating panukalang batas, ang pag-iisyu at maging ang pagpapalit ng nawalang vaccine passport ay libre. Sa panahon ng pandemya, bawat piso ay mahalaga kaya hindi dapat idagdag pa ito sa gastos ng ating mga kababayan.

Sa kasalukuyan, ang ilang bansa tulad ng Greece, Denmark, at Israel ay nagsisimula nang sa implementasyon ng vaccine passports. Ito ang isang hakbang nila para tulungan ang kanilang ekonomiyang makabangon mula sa pagkakasadlak dahil sa pandemya.

Mahalaga ang buhay at kaligtasan, pero kailangang magtrabaho ng nakararami sa atin para mabuhay. Ang pagkakaroon ng vaccine passports ay isang hakbang para manumbalik ang tiwala sa kaligtasan ng pagtatrabaho sa ating mga tanggapan at sa mga transaksiyon sa ating mga pamilihan. Isa itong paglalaan para munting sumigla ang ating ekonomiya.

Mapili nga sa jowa at sabong panglaba, sa bakuna pa kaya na buhay at kalusugan ang nakataya?

ni Grace Poe - @Poesible | January 18, 2021

Hello, mga bes! Kumusta kayo at ang inyong pamilya? Ramdam na ba ninyo ang lamig ng panahon sa umaga at gabi? Ang sarap ng simoy ng hangin ngayong mga araw na ito. Napagpagan na ba ang inyong mga pangginaw para magamit ulit?

Magandang balita ang dumating sa atin noong nakaraang linggo nang ianunsiyo na aprubado na ng ating Food and Drug Administration (FDA) ang bakuna ng Pfizer laban sa coronavirus. Sa wakas, mayroon nang isang kumpanyang pasado sa pamantayan ng regulasyon para sa ligtas na gamot sa ating bansa.

Ngayong aprubado na ang bakuna ng Pfizer, dapat pursigihin ng pamahalaan na makipag-negosasyon sa nasabing kumpanya para makakuha ang Pilipinas ng kinakailangang bilang ng bakuna mula rito para agarang mailatag na ang malawakang pagbabakuna sa ating bansa. Huwag tayong magsayang ng oras dahil buhay ang nakasalalay dito. Bigyan ng prayoridad dapat ang aprubado na sa FDA kaysa sa mga kumpanya na hindi pa nagsusumite ng kanilang aplikasyon sa nasabing ahensiya.

Sa kasalukuyan, nababasa natin ang balita mula sa clinical testing ng ibang bansang nauna nang nagbakuna kaya may ideya tayo sa epektibidad ng bakuna ng bawat kumpanya. Dahil dito, may agam-agam ang ating mga kababayan kung gaano kabisa ang ilang bakuna.

Naniniwala tayong may karapatang mamili ang bawat Pilipino ng bakunang gagamitin nila. Mapili nga sa jowa, kahit sa sabong panglaba, aba, sa bakuna pa ba na buhay at kalusugan ang nakataya. Isa pa, hindi ito libre. Pera ng taumbayan ang pambili nito. Galing sa buwis ng mamamayang Pilipino ang ipambabayad sa mga bakuna. Kung utangin man ito, tayo rin ang magdurusa sa pagbabayad nito sa pagdating ng panahon.

Walang lohikal na dahilan kung bakit ipipilit natin ang bakunang mas mahal na, wala pang clinical trials na nagpapatunay ng bisa at kaligtasan. Hindi natin masisisi ang ating mga kababayan kung ayaw nila ang ilang tatak na walang katiyakan kung makakatulong o makasasama pa sa kalusugan.

Habang naghihintay tayo ng bakuna, pinapaalalahanan natin ang ating mga kababayan na manatiling ligtas. Obserbahan pa rin natin ang social distancing, pagsusuot ng face mask at face shield, at pagiging malinis sa lahat ng pagkakataon. Prebensiyon pa rin ang pinakamabisang panlaban sa sakit sa panahong ito. Mag-ingat tayong lahat, mga bes.