Makati at Taguig, banggaan naman sa health facilities sa 10 EMBO

ni Gina Pleñago @News | September 26, 2023

Matapos ang ilang linggong pagsasalin ng hurisdiksyon ng mga health facilities sa 10 EMBO barangays na isinasagawa ng Department of Health (DOH) at ng kasunduang iayos ang petsa ng pag-transfer sa Oktubre 1, 2023 ay muli umanong sinimulan ng

Makati City ang pagpapakalat ng maling impormasyon.

Namahagi umano ang Makati ng isang press release na may pamagat na “Taguig’s ‘unreasonable’ rejection of Makati proposals impedes smooth transfer of city-owned health facilities, services – City Administrator”.

Pumalag ang Taguig LGU at sinabing ito ay nakakahiyang mga paglabag ng kasunduan sa DOH para sa Makati at Taguig na hindi dapat pinag-uusapan ang pagmamay-ari sa lupa at mga gusali habang nagpapatuloy ang pagtalakay sa transition upang hindi madiskaril ang pangunahing pakay ng isang maayos na pagsasalin ng hurisdiksyon mula sa Makati patungong Taguig.

Kung sinsero umano ang Makati ay tinanggihan na nito ang apela ng DOH na isantabi ang isyu sa ownership ngayong panahon ng transition.

Kaugnay naman sa Ospital ng Makati, binigyang diin sa press release nito na hindi kailanman tinanggihan ni City Mayor Lani Cayetano ang anumang mungkahi mula sa

Makati ngunit naipagpaliban lamang ito nang sabihin ni Health Secretary Teodoro Herbosa, na ang DOH Regional Director ang mangunguna sa alinmang talakayan

patungkol sa OsMak.

Bilang paglilinaw, sinabi ng Taguig na siya ang may nakakataas na legal na pag-aangkin sa pagmamay-ari ng lupa at mga pagbabago rito dahil ang Makati ay walang titulo sa mga lote at hindi ipinakita sa publiko ang mga titulo na sumuporta sa kanyang inaangkin.

P15M drugs buking sa mga abandonadong parcel

ni Gina Pleñago @News | September 19, 2023

Nasa P15 milyong halaga ng ilegal na droga na nakatago sa sampung abandonadong parcel na natuklasan ng PDEA-Inter Agency Drug Interdiction Task Group at Bureau of Customs (BOC) sa Central Mail Exchange Center (CMEC) Port of NAIA, Domestic road, sa Pasay City.

Ayon kay BOC Port of NAIA District Collector Atty. Yasmin Mapa, naharang ang sampung abandoned parcel na galing sa iba't ibang bansa ng mga awtoridad matapos na madiskubre na naglalaman ang mga ito ng ilegal na droga.

Hindi nakalusot nang dumaan sa x-ray scanning machine ang limang abandonadong parcel kung saan naglalaman ng halos 544ml liquid marijuana na may tinatayang street value na P32,640.

Habang ang lima pang kargamento ay naglalaman naman ng 8,446 piraso ng ecstasy tablets at 924 grams ng raw materials na may street value na aabot sa P14,358,200.

Naglalaman ng liquid marijuana ang mga parcel na nagmula sa Taipei Taiwan, Ireland, at Malaysia na naka-consignee naman sa mga taong nakatira sa Dumaguete, Talisay City, Zamboanga City, Misamis Oriental, at Loyola Heights, Quezon City.

Habang ang limang parcel naman na naglalaman ng ecstasy tablets ay nagmula sa France, Amsterdam, at Netherlands na nakapangalan sa limang personalidad na nakatira sa Caloocan City, Laging Handa, Quezon City, Pasay City at Bacoor City, Cavite.

Kadiwa store, pasok sa Bilibid

ni Gina Pleñago @News | September 9, 2023

Inilunsad kahapon ng Bureau of Corrections (BuCor) sa koordinasyon ng Department of Agriculture (DA) ang Kadiwa pop-up store sa loob ng New Bilibid Prison (NBP) reservations sa Muntinlupa City.

Inihayag ni BuCor Director General Gregorio Pio P. Catapang, Jr. na araw-araw nang mabibili sa Kadiwa ang mga sariwang gulay, prutas, itlog, asukal, isda, bigas at iba pang produkto.

“Kanina po nag-launch na kami. Ang layunin nito ‘yung mga taga-BuCor, PDL man o mga ordinaryong empleyado ng BuCor, puwedeng bumili ng murang pagkain o prutas o gulay,” ani Catapang.

Aniya, target na ring gamitin ang NBP reservations bilang “Pambansang Bagsakan ng Bigas para sa Mamamayan o PBBM”.

Ang lokasyon ng NBP ay maganda at mas madali para sa food terminal at government center sa katimugang Metro Manila dahil konektado na ang North Luzon Expressway sa South Luzon Expressway.

Idinagdag pa ng pinuno ng BuCor na gumagastos ang gobyerno ng P120,000 bawat PDL kada taon kaya marapat na ibalik ito ng PDL sa komunidad sa pamamagitan ng pagsasaka.