4 na sindikatong Taiwanese, timbog

ni Gina Pleñago | March 4, 2023

Nasukol ang apat na Taiwanese na ‘undocumented’ na sinasabing kaanib ng malaking sindikato sa Taiwan.

Ang operasyon ay isinagawa ng pinagsanib na puwersa ng CIDG Anti-Organized Crime Unit at mga operatiba mula sa Intelligence Division, Makati Police Station (Ayala Sub-

Station), Bureau of Immigration-Fugitive Search Unit, Philippine Drug Enforcement Agency (PDEA) at Police Taiwan-Taipei Economic and Cultural Office mula sa magkakahiwalay na pagsalakay sa kahabaan ng Rockwell at Calumpang Road, Dasmariñas Village, Makati.

Arestado sina Wu Jheng Long, Chen Chien-Ning, Chun-Yu at Yang Zong Bao.

Narekober ang ilang baril at mga bala.

Ibinulgar pa sa impormasyon na ang mga naaresto diumano’y kaanib sa isang kilalang sindikato sa Taiwan na gumagawa ng mga ilegal na narcotics, telecom fraud operations at iba pang ilegal na aktibidad sa Pilipinas at ang pasaporte ng mga pugante ay binawi na ng mga awtoridad ng Taiwan.

Nanay, edad 2 at 5 patay sa sunog

ni Gina Pleñago | February 22, 2023

Nasawi ang tatlong mag-iina nang ma-trap sa nasusunog na bahay habang tatlo rin ang nasugatan sa Bgy. 117, Malibay, Pasay City kahapon ng umaga.

Sa inisyal na ulat ng mga tauhan ng Pasay Bureau of Fire Protection, kinilala ang mag-iinang nasawi na sina Mary Ann Maglinaw, 29, Xzavion, 2, at Evzekhion Rivas, 5.

Sugatan naman sina Mark Christian Rafol, 5, na nagtamo ng lapnos sa kanang siko; Frederick Ignacio, 56, may hiwa sa noo, at Antonio Padilla, may lapnos sa leeg, kamay at kaliwang paa.

Alas-9:50 ng umaga nang maganap ang sunog sa dalawang palapag na bahay na pagmamay-ari ng isang Gary Rivas, kung saan nakatira ang mag-iinang nasawi.

Mabilis na kumalat ang apoy dahil gawa lamang sa light materials ang bahay.

Limang pamilya ang nakalabas mula sa nasusunog na bahay dahil sa unang palapag lamang sila nakatira pero ang mag-iinang nasawi ay nasa isang kwarto sa ikalawang palapag.

Tumagal ang sunog ng higit isang oras at ideklarang fireout alas-11:15 ng umaga.

Nagkakahalaga ng P75,000 ang ari-ariang natupok ng apoy.

Agad namang nagtungo si Pasay City Mayor Emi Calixto-Rubiano sa lugar upang alamin ang sitwasyon at bigyan ng tulong ang mga nasunugan.

Pumalag sa holdap, binaril sa dibdib.. Turista, todas sa riding-in-tandem

ni Gina Pleñago | February 21, 2023

Patay ang isang New Zealander nang pumalag sa mga holdaper na riding-in-tandem, sa Makati City kamakalawa ng madaling-araw.

Kinilala ang biktima na si Nicholas Peter Stacey, 34, binata, turista mula sa New Zealand, pansamantalang nakatira sa isang hotel sa Bgy. Palanan, Makati.

Isa sa mga suspek ay naka-half-face helmet habang ang isa ay walang helmet pero naka-face mask.

Ala-12:25 kamakalawa ng hatinggabi nang mangyari ang panghoholdap sa Bgy. Palanan.

Base sa inisyal na imbestigasyon ni Master Sgt. John Robert Baligod, ikinuwento ng nobya ng biktima na si Pamela Gaye Villonoza, 31, na bago ang insidente, bandang alas-11 ng gabi nang dumating sila sa hotel mula sa pamamasyal sa Palawan.

Plano umano nilang magpunta naman sa Batangas kaya nagkasundo na magtungo sila sa bahay niya upang kumuha ng mga damit at ipa-laundry ang mga ginamit nilang damit sa Palawan.

Habang naglalakad sa tapat ng Cash and Carry Mall, isang motorsiklo ang huminto sa tabi ni Villonoza, bumaba ang angkas saka tinutukan siya ng baril at nagdeklara ng holdap.

Ipinarada umano ng isa pang suspek sa ‘di kalayuan ang motor habang ang biktima ay tinangkang agawin ang baril ng suspek na naging dahilan upang siya ay barilin.

Matapos ang pamamaril ay tinangay ng mga suspek ang cellphone at wallet ni Villonoza bago tumakas.

Nabatid na dahil sa isang tama ng bala sa kaliwang dibdib, nasawi ang biktimang si Stacey.