BI, nagsori sa mahigpit na pagsala sa mga pasahero sa NAIA

ni Gina Pleñago | March 18, 2023

Humingi ng paumanhin at pang-unawa sa publiko ang Bureau of Immigration (BI) kaugnay sa mahigpit nilang pagsala sa mga dumaraan na pasahero sa mga paliparan.

Kaugnay ito sa viral video sa social media kung saan ikinuwento ng isang pasaherong Pilipina ang hindi niya magandang karanasan sa kamay ng isang tauhan ng BI.

Ipinaliwanag naman ng BI na ang masusi nilang mga pagtatanong sa mga pasahero ay dahil sa pagnanais na mapigilan ang mga insidente ng human trafficking.

Tinukoy ng ahensiya noong 2022 ang pagkakaharang sa pagbiyahe ng 472 na pasahero na lumabas na biktima ng human trafficking o illegal recruitment, 873 na gumamit ng pekeng dokumento at nasa 10 ang menor-de-edad na nagtangkang magtrabaho

abroad.

Anila, seryoso ang mga isyung ito na hindi maaaring balewalain at mismong si Pangulong Bongbong Marcos ang nagpaabot ng pagkabahala.

Kaya naman prayoridad ng BI ang development ng kanilang mga tauhan at paghimok sa mga netizen na idulog ang isyu kaugnay sa pagtupad nila ng tungkulin.

Multa sa motorcycle lane sa Commonwealth Ave., start sa March 20

ni Gina Pleñago | March 15, 2023

Hindi papatawan ng multa hanggang Marso 19 ang mga lalabag sa exclusive motorcycle lane sa Commonwealth Avenue, ito ang inanunsiyo ng Metropolitan Manila Development Authority (MMDA).

Gayunman, sa Marso 20, huhulihin na ang mga lalabag sa exclusive motorcycle lane policy. Kung saan, P500 ang multa sa sinumang violators nito.

Ayon kay MMDA acting Chairman Romando Artes, umabot na sa 1,494 ang nasita sa dry run ng exclusive motorcycle lane sa Commonwealth Avenue simula noong Marso 9 hanggang Marso 12.

Nasa 949 ang riders at 545 private motorists ang nasita sa ikaapat na araw ng dry run ng exclusive motorcycle lane mula Elliptical Road hanggang Doña Carmen at vice versa.

P40M shabu, nasabat sa NAIA

ni Gina Pleñago | March 14, 2023

Naharang ng mga tauhan ng Bureau of Customs (BOC), Philippine Drugs Enforcement Agency (PDEA) at Ninoy Aquino International Airport Inter-Agency Drug Interdiction Task Group (NAIA-IADITG) ang isang Malagasy national matapos umanong makuhanan ng hinihinalang shabu na nagkakahalaga ng P40,800,000 sa kanyang bagahe sa NAIA.

Base sa report, dumaan sa X-ray machine ang bagahe ng naturang pasahero na hindi binanggit ang pangalan kung saan napansin ang kakaibang imahe sa monitor.

Agad na isinailalim sa pagsusuri ng Customs examiners ang naturang bagahe kung saan nadiskubre sa pinakailalim nito ang nakasingit na umano’y droga.

Dumating sa airport ang dayuhan sakay ng Ethiopian Airlines flight ET644 mula Hong Kong at ang kanyang pinanggalingan o port of origin ay sa Madagascar, East Africa.