Pinakamalaking graffiti, street art at mural festival, umarangkada na

ni Gina Pleñago | May 21, 2023

Napiling host ang Lungsod ng Taguig sa opisyal na paglulunsad ng Meeting of Styles sa bansa, isa sa pinakamalaking taunang graffiti, street art, at mural festival, na naglalayong pasiglahin ang mga koneksyon sa international art community.

Ayon kay Taguig City Mayor Lani Cayetano, mahalaga ang mga ganitong uri ng okasyon dahil nagbibigay ito ng kulay at pagkakataon sa mga Pilipino na ipakita ang husay at galing nito sa larangan ng sining.

Kamakalawa nang idinaos ang kick-off ceremony ng “Meeting of Styles” sa TLC Park, Laguna Lake Highway, Bgy. Lower Bicutan, Taguig.

Ang mga shipping container sa TLC Park, na dating nagsilbing quarantine facility, ang magiging canvas ng mga artist para sa kanilang mga likhang sining.

Ang mga kilalang local artists kabilang ang Quiccs, Egg Fiasco, Chill, Flip1, Kookoo, Meow, Nevs, EXLD, at marami pang iba ay dadalo upang ipakita ang kanilang mga talento.

Katuwang nila rito ang Department of Education gayundin ang mga Barangay sa lungsod.

Hinahatak na 22-wheeler trailer truck, dumausdos.. Driver at pahinante ng tow truck, naipit

ni Gina Pleñago | May 17, 2023

Sugatan ang isang driver at isang pahinante ng tow truck matapos banggain ng hinahatak na 22-wheeler trailer truck sa Pasay City.

Batay sa imbestigasyon, 2 tow truck ang rumesponde sa nasiraang trailer truck sa Buendia flyover sa Pasay City, pasado alas-2 ng hapon kamakalawa.

Bago mag alas-11 ng gabi, sinubukan nilang hatakin ang trailer truck sa pababang bahagi ng Buendia flyover.

Gayunman, hindi kinaya ng 2 tow truck ang bigat ng trailer truck kaya dumausdos ito sa kanila.

Nagbanggaan din ang dalawang tow truck na nagdulot ng pagkakaipit ni Angel Baniqued at kanyang pahinante na si Rodrigo Delemus.

Agad nailigtas si Delemus at nadala sa ospital habang inabot ng halos 4 na oras bago natanggal sa pagkakaipit si Baniqued.

267 preso, laya na

ni Gina Pleñago | May 16, 2023

Nasa 267 na persons deprived of liberty (PDLs) ang napalaya mula sa iba't ibang kulungan at penal farm sa ilalim ng pangangasiwa ng Bureau of Corrections (BuCor), kahapon.

Sa naturang bilang, 22 ang pinalaya mula sa Correctional Institute for Women (CIW) sa Mandaluyong City sa simpleng culminating activity sa pangunguna nina Senator Imee Marcos at BuCor Director General Gregorio Pio Catapang, Jr.

Kinabibilangan ang mga pinalayang mga nakapagtapos na ng silbi sa kanilang mga sentensya, mga napawalang-sala sa mga kaso, napagkalooban ng parole at ilan ang nakalaya dahil sa cash bond.

Nabatid na 70-anyos ang pinakamatandang PDL na lumaya habang 22-anyos naman ang pinakabata.

Binigyan sila ng certificate of discharge from prison, grooming kit, gratuity at transportation allowance.

Ipinahayag ni Catapang ang kanyang buong suporta sa Senate Bill 884 na naglalayong amyendahan ang Republic Act 7309 sa pamamagitan ng pagbibigay ng mas mataas na compensation para sa mga biktima ng hindi makatarungang pagkakakulong at marahas na krimen na itinutulak ni Senator Chiz Escudero.

Sa ilalim ng panukalang batas, ang biktimang ‘wrongfully imprisoned’ ay maaaring mag-claim ng hanggang P10,000 kada buwan ng pagkakakulong mula sa kasalukuyang P1,000.