Engineer, arestado sa P55M shabu sa NAIA

ni Gina Pleñago | June 7, 2023

Nabuko ng mga tauhan ng Bureau of Customs (BOC) Port of NAIA nang tangkain ng isang Liberian national na ipasok ang 8.138 kilo ng hinihinalang shabu na natagpuan mula sa kanyang dalawang bagahe kamakalawa ng gabi sa Ninoy Aquino International Airport (NAIA) Terminal 3 sa Pasay City.

Kinilala ni BOC-Port of NAIA District Collector Atty. Yasmin Mapa ang suspek na si Philip Campbell, 34, mechanical engineer, at pasahero ng Qatar Airways flight QR 934 galing Doha, Qatar.

Dumating si Campbell noong June 4, 2023 kung saan ang port of origin ay sa Lagos, Nigeria at sumakay via Qatar Airways patungong Maynila, ngunit pagdating nito ay nagkaroon umano ng problema ang kanyang travel documents sa Immigration kaya pansamantala itong pinigilang makalabas.

Ayon kay Atty. Lourdes Mangaoang, pinuno ng X-ray Inspection Project (XIP), ang 2 bagahe ni Campbell ay sumailalim sa screening at nakakita rito ng kahina-hinala, potensyal na naglalaman ng ilegal na droga kaya naalerto ang NAIA Inter-Agency Drug Interdiction Task Group at mga operatiba ng PDEA.

Nagsagawa ang isang Customs examiner mula sa arrival operations division ng 100% physical examination, at natuklasan ang 8.138 kilo ng shabu na nakatago sa yellow powdery spices na may street value na P55,338,400.

Isasailalim sa seizure at forfeiture proceedings ang nasabat na droga habang iniimbestigahan ng mga otoridad ang naarestong pasahero para sa paglabag sa Republic Act (RA) No. 9165, o Comprehensive Drug Act, at RA 10863, na kilala rin bilang Customs Modernization and Tariff Act (CMTA).

Nagpasalamat at pinuri ni BOC Commissioner Bienvenido Rubio ang pagsisikap ng Port of NAIA at PDEA, XIP, at NAIA-IADITG sa kanilang mahalagang suporta sa operasyon.

3 Chinese, tiklo sa baril at droga

ni Gina Pleñago | June 5, 2023

Sinasabing dahil sa pagsusukbit ng baril at pag-iingat ng hinihinalang droga ng tatlong Chinese national kaya inaresto ng mga otoridad sa loob ng isang condominium unit kamakalawa ng madaling-araw sa Pasay City.

Kinilala ng pulisya ang mga suspek na sina Wu Zhangjian alyas “Michael Wang”, 32; Guanglin Jiang, 28, at Mao Wei, 23.

Base sa ulat ng Southern Police District, hinuli ang tatlong suspek sa loob ng condo unit na matatagpuan sa Seaside Boulevard, MOA Complex, Pasay City, alas-3:30 ng madaling-araw kamakalawa, gamit ang search warrant na inisyu ni Judge Rowena Nieves Tan.

Magkakasanib na pwersa ng District Special Operation Unit-Southern Police District kasama ang mga elemento mula sa DSOU-SPD, DDEU-SPD, DID, DMFB, nagkasa ng operasyon ang SIS Pasay CPS, Northern NCR Maritime Police Station at 3rd SOU, Maritime Group na nagresulta sa pagkakahuli sa mga suspek.

Nakumpiska sa operasyon ang isang unit ng Glock 26, kalibre 9mm, kargado ng isang magazine at sampung live ammunitions, isang revolver handgun, apat na live ammunition at isang revolver chamber.

Nakuha rin ang tatlong sachet ng hinihinalang shabu na 11 gramo na nagkakahalaga ng P74,800, at drug paraphernalias.

Seminar para sa mga drayber at traffic enforcers

ni Gina Pleñago | June 4, 2023

Umani ng papuri sa local government unit (LGU) ang Drayberks B.I S.A ng Metro Pacific Tollways South (MPT South), ang concessionaire para sa Manila-Cavite Expressway (CAVITEX), ang 5 Link segment nito, at ang Cavite-Laguna Expressway (CALAX).

Matagumpay ang paglulunsad ng Drayberks B.I.S.A (Buhay Ingatan, Sasakya'y Alagaan) Caravan katuwang ang Cavite State University (CvSU) para sa selebrasyon ng Road Safety Month noong Mayo.

Layon ng caravan na magbigay kaalaman sa mga motorista patungkol sa road safety: self-safety, vehicle safety at road worthiness, at ligtas na pagmamaneho.

Isinagawa ito sa Parañaque Integrated Terminal Exchange (PITX), SM City Bacoor, at SM City Santa Rosa na dinaluhan ng mga public at private drivers, traffic enforcers, mall goers, at maging mga estudyante.

Ipinakita sa seminar ang kahalagahan ng pag-aalaga ng sasakyan at pag-trouble shoot dito na mahalaga para sa kaligtasan sa daan.

"Sa pamamagitan ng pagbibigay ng mahahalagang kasanayan at kaalaman sa mga indibidwal, patuloy na naghahatid ng serbisyo ang MPT South sa pagpapaunlad ng kultura ng responsable at ligtas na pagmamaneho para sa lahat," ani Mr. Raul L. Ignacio, President at General Manager ng MPT South.