Isyu sa teritoryo.. Lani, pumalag kay Abby

ni Gina Pleñago | July 21, 2023

Sinagot ng lokal na pamahalaan ng Lungsod ng Taguig ang hirit ni Mayor Abby Binay na hindi matutumbasan ng una ang mga benepisyong ibinibigay ng Makati sa 10 barangay na nalipat na sa kanilang hurisdiksyon.

Ayon kay Taguig City Mayor Lani Cayetano, dapat nang tanggapin ng Makati LGU ang naging pinal na desisyon ng Korte Suprema para maiwasan ang pagkagambala ng

publiko.

Naninindigan ang Taguig LGU na handa sila sa responsibilidad na nakaatang sa kanila sa 10 barangay tulad ng kanilang pag-aalaga sa kanilang 28 barangay.

Pumalag din umano si Cayetano sa naging pahayag ni Binay na tila minaliit ang Taguig sa kakayahang maibigay ang social benefits sa 10 barangay at ipinagmalaki pa na kaya rin aniya ng Makati na ibigay ang scholarship program ng Taguig.

Tinawag pang uncharitable at unfounded ang pahayag na ito ni Binay na irrelevant umano sa pinal na desisyon ng SC.

Sa huli ipinaalala ni Cayetano na ang tanging layunin ng bawat isa ay para sa ikabubuti ng mamamayan at kanilang residente na dapat na tamang gawin ay sundin ang utos ng Korte Suprema.

Bawas-singil sa kuryente sa Hulyo

ni Gina Pleñago | June 30, 2023

Posibleng bumaba ang singil sa kuryente ngayong Hulyo.

Ayon sa Meralco, ito'y dahil tapos na ang tag-init at humihina na ang konsumo sa kuryente.

Bumaba na rin umano ang presyo ng kuryente sa spot market kumpara noong mga nakaraang buwan.

"May posibilidad na bumaba ang generation charge dahil lang noong June, nagsimula na ang tag-ulan at pangalawa, bumaba na ang presyo ng coal sa market, na inaasahan naming magre-reflect na sa billing ng aming suppliers," ani Meralco regulatory affairs head Ronald Valles.

454 bagong opisyal ng BuCor

ni Gina Pleñago | June 25, 2023

Tinatayang nasa 454 ang nagtapos para sa Basic Recruit Course sa Bureau of Corrections (BuCor) kamakalawa sa NBP Parade Ground, Muntinlupa City. Umabot sa 379 na lalaki at 75 na babaeng Correction officers ng Class 20-2022

"Mandatos"(Mananatiling may Dangal at Tapat sa Organisasyon at Serbisyo) ang nagtapos sa kaukulang training.

“Kayo ang pag-asa ng BuCor at kayo rin ang tagapagmana nito kaya ayusin n'yo ang serbisyo sa pamamagitan ng serbisyong may disiplina at dignidad. Gusto ko may disiplina kayo kasi part 'yan ng training n'yo at dahil bayad 'yan ng sweldo n'yo na galing sa pera ng taumbayan,” ani BuCor Director General Gregorio Catapang, Jr.

Dumalo rin sa okasyon sina Gen. Al Perreras, OIC-Deputy Director General for Administration at Chief, Legal Service; J/CInsp Florencio Orillosa, acting Director, Corrections National Training Institute; C/SInsp Abel DR Ciruela, MSCA, acting Chief, Human Resource Division, iba pang opisyal at tauhan ng BuCor.

Binigyan ng parangal at pagkilala ang mga nagsipagtapos na may outstanding achievements sa iba't ibang kategorya bilang class top achievers mula sa ranggong 1-10 ayon sa pagkakasunod na sina CO1 David F. Caimoy, CO1 Princess Mae D. Etulle, CO1 Robin A. Gacias, CO1 Demie Anne Zedice T. Yamon, CO1 Joyce Marie B. Gonzaga, CO1 Doris Stephanie T. Abella, CO1 Jay G Quisay, CO1 Rasheena Jane T. Encarnacion, CO1 Jep G. Omehang at CO1 Rachael L. Reponte.

Tumanggap ng Leadership Award si CO1 Steven Zenrick Gaspar; CO1 Robin A. Gacias- Tactical Leadership; CO1 Romello L. Belloca at CO1 Demie Ann Zedice T. Yamon para sa Marksmanship; habang nasungkit naman nina CO1 Jayson O. Lampago at CO1 Sheryl J Villasi ang parangal na Bernardo Carpio.

Patuloy naman ang mga ginagawang hakbang ni Catapang para sa reporma ng BuCor sa pagpapabuti ng kanyang mga tauhan upang maipatupad nang pangkalahatan ang modernisasyon alinsunod sa R.A. 10575 o Bureau of Corrections Act of 2013.