Knott, hadlang pa ang COVID-19 sa training at asam na ticket sa Olympics

ni Gerard Peter - @Sports | October 17, 2020

Nagiging malaking balakid para sa pagnanais ni Filipino-American sprinter Kristina Knott na maisakatuparan ang pag-aasam nitong makuha ang isang silya sa 2021 Tokyo Olympics dahil sa nararanasang epekto ng novel coronavirus disease (Covid-19) sa pandaigdigang kumpetisyon.

Hinahadlangan ng naturang sakit ang magkaroon ng mga kompetisyon sa ibang bansa, partikular na sa U.S. kung saan namamalagi ang 25-anyos na 2019 Southeast Asian Games double gold medal winner, na nitong Agosto 30 ay binura ang 33-taong marka ni dating Asian sprint queen Lydia De Vega-Mercado na mas mataas ng 0.1 sa bagong tala na 11.27 seconds.

“The biggest thing that kinda’ ruined (by COVID-19) was the competitions. Competing is my big part of training, and I'm not really train to the ground, and train over and over I need as much competitions i need to get me ready for those big competitions. I'm think the cancellation of these big competitions kind of was a challenging part of pandemic,” pahayag ni Knott nang maging bisita ito kasama si Philippine Athletics Track and Field Association (Patafa) President Philip Ella Juico sa lingguhang TOPS: Usapang Sports, Huwebes ng umaga, sa virtual online session na live na napakinggan sa Sports on Air sa Facebook page nito at sa malaking suporta ng Philippine Sports Commission, Pagcor at Games and Amusement Board (GAB).

“For the Olympics, before I ran the 100, I was just focused on trying to hit the qualifying standard for 200, but right now, I see my potential, I am going to strive to hit both the 100 and 200 for the Olympics.”

Winasak ni Knott ang ginawa ni De Vega-Mercado sa 2020 Drake Blue Oval Showcase nang makuha niya ito noong 1987 SEA Games sa Jakarta, Indonesia matapos talunin sina 1992 Barcelona Olympian Ratjai Stripet ng Thailand (11.81) at Sajaratuldur Hamzah ng Malaysia (11.85)

Ito ang ikalawang talang itinudla ng University of Miami student-athlete ng gawin rin nitong kunin ang SEA Games at Philippine Record na 23.01 sa nagdaang 30th edisyon ng biennial meet. Sinira nito ang dating record ni Supavadee Khawpeag ng Thailand sa 23.30 seconds noong 2001 Kuala Lumpur, Malaysia meet.

Inamin ng 200-m biennial meet sprint queen na malapit na nitong makuha ang inaasam na qualifying mark na 11.15mark sa Summer Olympics sa 100-meter dash at 22.80 segundo sa 200-meter sprint. Kinulang lang ng 0.21 seconds si Knott sa Olympic qualification standard na 22.80 seconds sa women’s 200-meter sa 30th SEA Games sa bansa noong isang taon.

“The qualifying time is 11.15 in 100 m and 22.80 in 200 m. I'm not too far off from them but then again, they all come down to as many quality competitions that i get in. Running fast and compete with people that are faster than me is what gonna help me to qualify for the Olympics,” saad ni Knott.

World no. 1 golfer Johnson nagpositibo sa COVID-19

ni Gerard Peter - @Sports | October 16, 2020

Napasama na rin sa mga sunod-sunod na nagpopositibo sa mapinsalang novel coronavirus disease (Covvid-19) sa mundo ng pampalakasan si World No.1 golfer Dustin Johnson ng America bilang panibagong biktima nito.

Napilitan ang 36-anyos na numero-uno sa World Golf Rankings na umatras sa PGA Tour event na CJ Cup sa Shadow Creek sa Las Vegas ngayong linggo kasunod ng lumabas na pagsusuri, habang papalitan na lamang ito ni J.T. Paston bilang alternate para sa kumpetisyon na nilahukan ng 78 na golfers.

“Obviously, I am very disappointed,” saad ng Palm Beach Gardens-resident sa Florida na may hawak ng 23 PGA Tour victories sa kanyang 13-year professional career sa isang website. “I was really looking forward to competing this week but will do everything I can to return as quickly as possible.”

Ayon sa pamunuan ng PGA Tour, nakaranas nang ilang sintomas na may kinalaman sa Covid-19 ang Columbia, South Carolina-native nitong Linggo ng gabi, habang nagtuloy-tuloy ang nararamdaman hanggang Martes, na naging daan upang magpakuha na ito ng test para sa coronavirus na kinalauna’y lumabas na positibo.

“I have already had a few calls with the tour's medical team and appreciate all the support and guidance they have given me,” dagdag ni Johnson, na dalawang beses naging PGA Tour Player of the Year noong 2016 at ngayong 2020.

Selebrasyon sa Los Angeles, bawal muna - Garcetti

ni Gerard Peter - @Sports | October 14, 2020

Hindi na muna pahihintulutan ni Los Angeles Mayor Eric Garcetti na magdaos ng isang pampublikong selebrasyon bilang pagpupugay sa pagwawagi ng Los Angeles Lakers ng kanilang ika-17th titulo bunsod ng patuloy na nararanasang panganib na dala ng novel coronavirus disease (Covid-19) pandemic.

Ipinapatupad pa rin ng Los Angeles County ang isang kautusan sa pagbabawal ng lahat ng malalaking pagtitipon o isasagawang victory party parade upang ipagdiwang ang pagwawagi ng grupo nina 4-time champion at Finals MVP Lebron James, Anthony Davis at ng kabuuan ng koponan ng Lakers players at coaching staff.

Kasunod ito ng muling pagkakapanalo ng Lakers ng kampeonato matapos ang isang dekada nitong nagdaang Linggo (Lunes sa Pilipinas) laban sa dating koponan ni James na Miami Heat, 106-93, matapos itong magbuslo ng team high 28-points sa Game 6 ng best-of-7 final showdown na ginanap sa NBA Bubble loob ng Walt Disney World sa Bay Lake sa Orlando, Florida.

Dahil sa pandemya, magpapatuloy umanong walang anunsyo o plano ang syudad na magdiwang kasama ng buong koponan ng Lakers upng maiwasan ang hawahan sa lahat ng mga tagasunod at tagahanga.

“As we cheer our @Lakers’ 17th championship, please remember it’s still not safe to gather in groups,” wika ni Mayor Garcetii sa kanyang tweeter account.

Ngunit dahil sa sobrang kagalakan at kaligayahan, hindi naiwasang magkaroon ng pagdiriwang sa labas ng Staple Center Arena noong Linggo ng gabi na tinatayang aabot sa 2,000 ang nagtipon-tipon para magsaya at magsama-sama, kung saan 76 ang inaresto dahil sa bandalismo, paglabag sa kautusan ng pagtitipon at pagkabigong paghiwalay-hiwalayin ang mga ito, na inireport ng Los Angeles Times.

Ito ang huling beses na nagwagi ang Lakers buhat ng manalo ng back-to-back championship noong 2009 at 2010 ang Staples Center-based team sa pangunguna ni NBA Legend Kobe Bryant para sa kanyang ika-5th titulo sa franchise team, katulong sina Spaniard Pau Gasol, Lamar Odom at Derrick Fisher.

Iniaalay ng buong koponan sa pamumuno ni James ang kanilang kampeonato sa namayapang si Bryant sa isang malagim na helicopter crash accident noong Enero 26 sa Calabasas kasama ang anak nitong si Gianna; Orange Coast College baseball coach John Altobelli, asawa nitong si Keri, at anak na si Alyssa; Christina Mauser; Ara Zobayan; at Sarah Chester at anak nitong si Payton.