Striegl, nanalo sa COVID-19, laban vs. Russian ang haharapin sa UFC

ni Gerard Peter - @Sports | October 18, 2020

Matapos mapanalunan ang laban sa novel coronavirus disease (Covid-19) noong Agosto, susubukan namang magwagi ni 2019 Southeast Asian Games Combat Sambo gold medalist Mark “Mugen” Striegl sa kanyang UFC debut laban kay Said Nurmagomedov ng Russia para sa bantamweight preliminary undercard fight, Sabado ng gabi (Linggo ng umaga sa Pilipinas) sa UFC Fight Night sa Flash Forum Arena sa Yas Island, Abu Dhabi, United Arab Emirates.

Naunsyami man ang unang pagsalang ng 32-anyos mula Baguio City nitong nakalipas na Agosto 23 laban kay Timur “The Lucky” Valiev ng Russia matapos tamaan ito ng Covid-19 habang nagbababa ng kanyang timbang, determinado ang dating Universal Reality Combat Championship (URCC) featherweight champion na magwagi sa kanyang unang sabak sa UFC.

Tatayo bilang undercard ang tapatan ng Filipino-American at Dagestani fighter sa featherweight main event match up nina Brian “T-City” Ortega (14-1-1) at “The Korean Zombie” Chan Sung Jung (16-5) ng South Korea.

Walang problemang nakuha ni Striegl ang kanyang timbang sa 136-pound nitong linggo ng gabi, (Sabado ng umaga sa Pinas), gayundin ang katunggaling si Said, na pinsan ni UFC lightweight champion Khabib sa pagtungtong sa 136-lbs.

Bitbit pa rin ang 5-game winning streak, aminado ang Tokyo, Japan-born fighter na si Striegl (18-2-1) na masubukang makuha ang unang panalo sa UFC kalaban ang 28-anyos na Makhachkala, Dagestan-fighter na si Nurmagomedov (13-2).

Ngunit sa naging dalawang pagkabigo ni Striegl ay parehong nagmula rin sa submissions ang pagkatalo nito mula kina Jang Yong Kim ng Korea sa Pacific X-treme Combat dahil sa Kimura armbar at Reece Mclaren ng Australia sa pamamagitan ng rear-naked choke sa ONE Championship. “He’s up against a very tough opponent,” pahayag ni URCC President Alvin Aguilar sa panayam ng Bulgar Sports sa online interview. “Keep it standing. He shouldn’t grapple with the Russian, Magagaling din yan. Mataas ang pedigree ng wrestling niyan,” payo ni Aguilar patungkol sa kakayahan ng Russian warrior pagdating sa grappling techniques.

Aminado ang pinuno rin ng Wrestling Association of the Philippines (WAP) sa husay at kaalaman ng dating URCC featherweight champion, na apat na beses sumabak sa Filipino-brand MMA promotion, kung saan napagwagian nito ang titulo laban kay Do Gyeom Lee ng South Korea sa pamamagitan ng Guillotine Choke sa first round main event na URCC: Colossal noong Setyembre 29, 2018.

“I know Mark has the tools to win as long as he can withstand the Russians first round blitz,” wika ng 46-anyos 3rd degree jiu-jitsu blackbelt hinggil sa maaaring maging agresibong atake ng Russian warrior na kilala ring world-class striker na may titulong International Master of Sports in Pankration at dating kickboxing at Muay Thai artists.

Superliga Beach Volleyball, pagtaya sa sabong at karera aprub sa IATF

ni Gerard Peter / VA - @Sports | October 18, 2020

Pinapayagan nang makataya sa mga paboritong pangarerang kabayo ay may tsansa na ring tumaya sa sabong ang mga mahihilig sa Off-Track Horse race betting stations at mga lisensyadong sabungan kasunod ng pagbibigay ng basbas ng Inter Agency Task Force on Emerging Infectious Disease (IATF-EID) sa pagbabalik ng dalawang inaantabayanang industriya sa larangan ng pagnenegosyo at pampalakasan.

Bukod sa nabanggit na palaro ay pinapayagan na rin ng Task Force ang pagdaraos ng Philippine Superliga Beach Volleyball tournament na nakatakdang buksan simula sa Nobyembre 27-29 sa Subic Tennis Court sa pamamagitan ng konsepto ng ‘Bubble type.’

Inihayag ni Pres. Spokesperson Harry Roque na pinapayagan na ng Task Force ang pagkakaroon ng sabong sa mga lugar na sakop ng Modified General Community Quarantine (MGCQ), ngunit hindi ito pinapayagan na ipalabas gamit ang telebisyon o via online.

Tinukoy din ni Roque na ipinag-uutos ng IATF na ganapin ang off track horse race betting sa mga lugar naman na nasa ilalim ng General Community Quarantine (GCQ), o mas mga mababa pang mga klase ng klasipikasyon. “Bawal ‘yung broadcast at online sabong at kinakailangan po na merong pagpayag ng lokal na pamahalaan na siya rin pong nagsu-supervise nitong mga sabong na ito,” wika ni Roque sa anunsiyo sa telebisyon nitong nagdaang Biyernes.

Magpapasiklaban naman ang mga koponan sa Challenge Cup sa isang ‘Bubble type’ tournament na isinaad ng IATF na kasunduan sa lugar na pinag-usapan ng nakalipas na 30th Southeast Asian Games sa Zambales. “Pinapayagan na rin po ang beach volleyball tournament ng Philippine Superliga sa ilalim ng isang bubble concept.”

Mahigpit ding ibinilin ng spokesperson na pinagbabawalan ang mga manonood sa naturang sultada at tanging ang naghahawak lamang ng manok ang naroroon.

Malaki naman ang naging pasasalamat ni Games and Amusements Board (GAB) chairman Abraham “Baham” Mitra sa pagpayag ng IATF na muling buksan ang dalawang industriyang ikinabubuhay ng karamihan sa mga Filipino partikular na ang mga operators, breeders, agricultural veterinarians at iba pang mga nakikinabang dito. Idinagdag nitong kinakailangang sumunod sa ipinanukalang health at safety protocols sa lahat ng istasyon ng off-track betting upang manatiling bukas ito at maiwasan ang hawahan.

Sa naging pahayag ni PSL president Philip Ella Juico, sinabi nito sa isang panayam na isang malaking tulong ang pagsang-ayon sa kanilang paliga dahil ito ang magiging kauna-unahang non-professional sport na inaprubahan ng IATF.

Ang tanging kailangan lamang nilang gawin ay sundin ang mga nararapat na health protocols na ipinapagawa ng technical working group na magsagawa ng Inter-Zoning sa gagawing bubble, at kinakailangang manatili ng mga lalahok sa itatalagang quarters na daraan sa swab testing at mga requirements na itinalaga ng IATF.“We need to define first the zone of the bubble, where the athletes are staying and competing and second is ‘yun talagang nakaquarter ay merong curfew, once you’re in, you stay in; and once you go out, you’ll be subject to the same requirements again, and ask for swab test. So, a lot of this is designed to cope with pandemic, and lahat ng requirements na iyan, from the time you leave the venue kailangan mayroon kang travel authority, hanggang makarating ka dun sa venue,” paliwanag ni Juico, Huwebes ng umaga sa lingguhang TOPS: Usapang Sports na mapapanood ng live sa Sports on Air sa Facebook page nito, na sinusuportahan ng Philippine Sports Commission, Pagcor at GAB.

Russian Boxer, nakansela ang pro-fight dahil nagka-COVID-19

ni Gerard Peter - @Sports | October 17, 2020

Maghihintay na lamang sa susunod na taon si dating 2012 London Olympics bronze medalists Mikhail “Misha” Aloyan ng Russia para muling makabalik sa professional boxing matapos itong mahawa sa matinding novel coronavirus disease (Covid-19).

Ayon sa inpormasyong ipinahatid ng koponan ng 32-anyos na Bambakashat, Armenian, SSR, Soviet Union-native sa Russian News Agency na TASS, ipinagpaliban na ang nakatakdang laban ng Russian boxer sa Disyembre 15 laban kay Columbian Pablo Carrillo (25-7-1, 16KOs) habang ito’y ginagamot sa isang hindi nabanggit na hospital.

“Mikhail Aloyan fell ill with coronavirus. He is undergoing treatment at the hospital. His fight with Pablo Carrillo, which was scheduled for December 15, has been cancelled,” wika ng isang kinatawan ng amateur flyweight champion.

Huling sumabak ang dating two-time World Champion sa 2011 Baku at 2013 Almaty championships noon pang Disyembre 10, 2019 laban kay Ronal Batista ng Panama na nagresulta sa unanimous decision victory para kay Aloyan (5-1, 0KOs) sa Kemerovo, Russia.

Sunabak ito sa professional fight noong 2017 na nakakuha ng 4-fight winning streak mula kina Yader Cardoza kung saan napagwagian niya ang mga bakanteng titulong WBA East-Asia super flyweight sa pamamagitan ng UD; Marvin Solano na nakuha ang bakanteng WBC Silver super-flyweight; Hermogenes Castillo na napagwagian ang bakanteng WBA International bantamweight title at Alexander Espinoza na pawang lahat ay mga Nicaraguan boxers.

Hindi nga lang pinalad ang dating 2010 European at 2008 Moscow World Cup champion laban kay Zolani Tete ng South Africa para sa WBO bantamweight title at quarterfinal round ng World Boxing Super Series sa pamamagitan ng unanimous decision defeat noong Oktubre 13, 2018 sa Expo Center sa Yekaterinburg, Russia.