Ensayo ng mga combat sports sa Calambubble, magsisimula na

ni Gerard Peter - @Sports | January 16, 2021

Nagsimula ng paunti-unting pumasok ang mga Olympic hopefuls na pinangunahan ng ilang national boxers’ para sa kanilang isasagawang ‘bubble training camp’ sa loob ng Inspire Sports Academy sa Calamba, Laguna kahapon.

Nauna ng pumasok sina 2019 AIBA World women’s champion at 30th Southeast Asian Games gold medalist Nesthy Petecio, biennial meet silver medalist Marjon Pianar at featherweight Junmilardo Ogayre, habang susunod ang iba pang miyembro ng koponan na kinabibilangan nina SEAG light-flyweight titlist Carlo Paalam, Marvin Tabamo, John Paul Panuayan, Mario Fernandez, Aira Villegas at dating World champion at 5-time SEAG gold medal winner Josie Gabuco.

Makakasama rin nila sina national coaches Pat Gaspi, Nolito Velasco at 1992 Barcelona Olympics bronze medalist Roel Velasco, Jojen Ladon, dating lady boxer Mitchell Martinez, Elmer Pamisa, at 2016 Rio Olympics campaigner Rogen Ladon.

Nakatakdang dumating ngayong araw sina 2021 Tokyo Olympics-bound Irish ‘Aye” Magno, Australian boxing consultant Don Abnett, habang magkakasabay sa Lunes sina coach Reynaldo Galido, international veterans Ian Clark Bautista, James Palicte, Jere Samuel dela Cruz at Riza Pasuit, na manggagaling sa Negros Occidental.

“Sa Monday pa bale ang biyahe naming galing Bacolod kase mahirap ang flights ngayon dito,” saad ni Galido sa isang mensahe sa social media.

Agad na dumaan sa swab testing ang mga naunang pumasok sa ‘Calambubble’ bilang pagsunod sa health at safety protocols na ipinapatupad ng Philippine Sports Commission (PSC), Inspire Sports Academy, Department of Health (DOH) at Inter Agency Task Force Emerging Infectious Disease (IATF-EID). “Medyo nag-aadjust pa po kasi medyo pagod sa biyahe,” wika ni Petecio na nasasabik ng makapagsimula ng pagsasanay upang makuha ang kinakailangang timbang. “Kaya nga sobrang excited ako nu'ng sinabi babalik na Manila para sa bubble training kasi mas makakapag-focus ako ng husto talaga, 'yung nasa isang compound lang kayo at 'yung mindset ng lahat ay iisa lang, kundi mag-training at 'yung darating na Olympic qualifier.

Sunod namang papasok ngayong araw ng Sabado ang delegasyon ng national karate na bubuuin nina foreign coach Okay Arpa ng Turkey, strength and conditioning coach Sonny Montalbo, coach Jonel Perana, Jamie Lim, Joaane Orbon, Sharief Afif, at Ivan Agustin, at Alwyn Batican at taekwondo jins Pauline Lopez, Olympian Elaine Kirstie Alora, Kurt Bryan Barbosa, Arven Alcantara, Samuel Morrison, Ian Chavez, Rhezie at Rheza Aragon at mga coaches na sina Carlos Padilla, Al De la Cruz at Luis de Mesa (strength and conditioning) sa Enero 17.

Inaprubahan ng IATF nu'ng Disyembre 15, 2020 ang rekomendasyon ng muling pagdaraos ng pagsasanay ng mga national team para sa 2021 Summer Olympic Games na magbubukas simula Hulyo 24-Agosto 8 sa Tokyo, Japan.

Vaccine, pondo at training ng nat'l athletes, susi sa tagumpay

ni Gerard Peter - @Sports | January 15, 2021

Malaki pa rin ang paniniwala ni Philippine Sports Commission (PSC) commissioner Ramon Fernandez na ang susi sa patuloy na tagumpay ng National team sa darating 31st Southeast Asian Games sa Hanoi, Vietnam ay nakasalalay sa alokasyon ng pondo at masinsinang preparasyon at pagsasanay ng mga national athletes.

Kasunod ng pagkakahirang bilang Chef de Mission ng Hanoi Games sa Nobyembre 20-Disyembre 2, aminado itong mahihirapan ang Pilipinas na maidepensa ang korona sa biennial meet dahil sa bentahe ng host country sa pagpili ng mga sports events na lalaruin, gayundin ang pagkaka-delay ng mga pagsasanay ng national athletes bunsod ng kawalan pa rin ng mga bakuna para sa nararanasang krisis dulot ng coronavirus disease (COVID-19).

“We are still in pandemic and we’re just in a touch-and-go situation right now. Without the vaccine. Pretty hard to prepare them. But, I really believe that the budget and preparation is the key for all of this. Fearless forecast nasa Top 3 pa rin naman,” pahayag ni Fernandez, kahapon ng umaga sa lingguhang TOPS: Usapang Sports via Sports on Air. “Team work is needed just like what we did in 2019. With the help of all parties like the PSC, POC (Philippine Olympic Committee), NSAs (National Sports Association), Congress and the Senate to come together and support them, hopefully we can really see a good performance in the coming SEAG,” dagdag nito sa programang suportado ng PSC, Games and Amusement Board at Philippine Amusement and Gaming Corporation (PAGCOR).

Umaasa siya na mapapasama ang national athletes, partikular na ang mga Olympic bound at hopefuls, bilang mga parte ng mga prayoridad bukod sa frontliners na mabibigyan ng mga bakunang bibilhin ng pamahalaan.

“It is really the preparation of our athletes, in terms of Olympics is concerned. Medyo mahihirapan tayo kung walang vaccine. I really hope na maagahan at mabigyan ng priority ang ating mga national athletes. Chairman (Butch) Ramirez is trying his best to negotiate with the IATF (Inter-Agency Task Force) and DOH (Department of Health) para mapasama ang ating mga atleta sa mga top priorities ng government,” ekslipka ni Fernandez.

Sinabi niya na tila magiging triple ang trabaho niya bilang Chef de Mission dahil sa pandemya, higit na sa mga pagsunod sa tamang health safety standards at protocols ng mga atleta. Mahirap gampanan ang maayos na pagsasanay hangga’t walang bakunang naibibigay sa mga atleta. “Doble o triple ang hirap ng preparation natin for the Olympics and SEA Games knowing that preparation and training is the key to success. We also need to work closer with the IATF and DOH on how to control the pandemic. Talagang vaccine is really the biggest key to a normal way of training and competing in international tournaments,” saad ni Fernandez.

Maaari umanong sandalan ng Pilipinas para sa kauna-unahang gintong medalya sa Summer Olympic Games ay sina boxers Eumir Felix Marcial, 2019 World champion Carlos Yulo ng gymnastics at 2016 Rio Olympics women’s weightlifting silver medalist Hidilyn Diaz, habang hindi naman niya inaalis na makapagbigay rin ng mga medalya sina Ernest Obiena ng men’s Pole vault, Kiyomi Watanabe ng women’s judo, Yuka Saso at Bianca Pagdanganan ng Golf, Taekwondo athletes Pauline Lopez at Olympian Kirstie Alora, karatekas Junaa Tsukii, Joanne Orbon at Jamie Lim.

Pinoy's Gaballo at Donaire, may tsansa sa World title fight

ni Gerard Peter - @Sports | January 13, 2021

Mayroong tsansang magkaharap sa hinaharap ang kapwa Filipinong boksingerong sina World Boxing Council (WBC) interim bantamweight champion Reymart “Assassin” Gaballo at five-division World titlist at Nonito “The Filipino Flash” Donaire.

Ito ay sakaling maglabas umano ng bagong desisyon ang pamunuan ng WBC para tuluyang pagharapin sa naunsyami nilang pagtatapat ang parehong coronavirus victims na sina WBC bantamweight ‘Champion in recess’ Nordine Oubaali ng France at No.1 contender na si Donaire. Kung mananaig ang 38-anyos mula Talibon, Bohol laban sa dating 2007 World Championship bronze medalist, may pag-asang kaharapin ito ng undefeated Sanman stable fighter.

Inamin ni MP Promotions President na si Sean Gibbons na maaari umano itong maganap kung bibigyan muli ng pagkakataon ng WBC si Donaire na makalapit sa korona, at sa pagkakataong ito ay makukuha na ni Gaballo (24-0, 20KOs) ang buong title shot sa kampeonato. “You never know, maybe an all-Filipino throwdown [against Donaire] or Reymart versus the Moroccan brother for the full title,” saad ni Gibbons sa panayam rito ng ringTV.com.

Inaasahan ni Gibbons na muling makakabalik ng Estados Unidos si Gaballo, kung saan, tinitignan munang pagpipilian sa kanyang susunod na laban ang idepensa ang kanyang interim title. “For me, if they say you’re gonna fight this one, I’m gonna fight them,” wika ni Gaballo.

Lumalaki ang tsansa na matupad ang pagkakaroon ng All-Filipino title fight kasunod ng report na inilabas ng boxingscene.com na parehong interesado ang bawat kampo nina Oubaali (17-0, 12KOs) at Donaire (20-6, 26KOs) na ipagpatuloy ang naunsyaming laban, kung saan nasa proseso na umano ng pag-iskedyul ng tapatan.

Kasunod ito ng hakbang ni WBC president Mauricio Sulaiman sa inilabas na liham na ipinaparating nito sa iba’t ibang partido na ibinabalik na nila sa dating estado sa pinanghahawakang titulo si Oubaali. Inihayag nitong tinatanggal na ang pagtatalaga rito bilang “Champion In-Recess’ at binibigyan ito ng pagkakataon na magkaroon ng ‘voluntary defense’ para sa titulo sa Pebrero, na magdedepende kung handa na itong lumabang muli at papasa sa medical clearance.