Eala, kampeon sa ITF Nadal World Tennis Tournament

ni Gerard Peter - @Sports | January 26, 2021

Nagpamalas ng angking determinasyon, tibay ng loob at katatagan ang Filipino teenage phenom na si Alex Eala upang talunin ang hometown bet na si Yvonne Cavalle-Reimers ng Spain para makamit ang kauna-unahang professional title sa ITF Rafael Nadal Academy World Tennis Tour Tournament, Linggo ng gabi sa Manacor, Mallorca, Spain.

Hindi natinag ang 15-anyos na Pinay tennis player sa pagkatalo sa unang set ng singles finals match at halos blangkuhin ang Spaniard tennister sa second set at tuloy-tuloy na makuha ang momentum ng laro para sa 5-7, 6-1, 6-2 panalo sa mahigit dalawang oras ng pakikipagpaluan.

Halos mag-iisang taon na rin nang magwagi sa Australian Open Juniors Doubles noong Enero 31, 2020 si Eala katulong si Priska Madelyn Nugroho ng Indonesia para sa kanyang juniors Grand slam title.

Bago ito makatuntong sa finals ay pinadapa muna nito si Anna Paridisi ng Italy, 6-1, 6-2 sa Round of 32 at sinunod si top-seed Seone Mendez ng Australia sa iskor na 6-4, 6-1 sa round-of-16, habang dumaan sa matinding palitan ng panalo laban kay fifth seed Carole Monnet ng France via 6-7, 7-6, 6-4 sa quarterfinal round.

Humataw ng 6-3, 6-4 panalo ang rank No.2 sa ITF juniors sa semifinals ng gapiin nito si Adithya Karunaratne ng Hong Kong sa pamamagitan ng 6-3, 6-4 para iguhit ang tadhana laban sa 28-anyos na Spanish veteran na may anim na ITF titles.

Malugod namang binati ng Rafael Nadal Academy ang nakuhang tagumpay ni Eala sa pro-circuit na kumubra rin ng papremyong $15,000.00 bilang grand prize sa naturang torneo. Nakabawi ito sa kanyang semifinal match sa French Open girls’ single tournament noong isang taon.

Pacman vs. McGregor, malabo na si Garcia na ang ikinakasa

ni MC / Gerard Peter - @Sports | January 26, 2021

Malungkot na inamin ni MMA superstar Conor McGregor na hindi na umano siya umaasa na matutuloy pa ang ikinakasang laban sa pagitan nila ni 8 division world champion Manny Pacquiao.

Lumabo ang inaasahang salpukan nila sa ring ni Pacquiao matapos hiyain ni Dustin Poirier si McGregor nang talunin ito via knockout sa 2nd round ng kanilang bakbakan sa UFC 257 sa Abu Dhabi noong Linggo. Sinabi ni McGregor, kahit may posibilidad pa ring matuloy ang kanilang laban, pero malabo na umano itong mangyari ngayong taon. "I wanted to focus on the MMA career but I'm also..Let's just see what happens. That Manny fight was happening. It was a good as done. Now I don't know," ani McGregor.

Ayon sa Irish fighter, nais umano niyang magpokus muna sa kanyang MMA career at magpapagaling umano siya siya sa knee injury na natamo nito sa laban. "I don't know. It's all muscle and deep into the muscle, it's a dead leg. But it is what it is. Fair play. I should've pressed him in the fence and kept pounding on him," wika ni McGregor. "Maybe, I'll switch up my game when me and Dustin face again. I have to go through the disciplines and make the good decisions."

Sinabi naman ni Paradigm Sports president Audie Attar na siguradong hindi na papatok ang laban nina Pacquiao at McGregor dahil sa naging pagkatalo ng Irish fighter.

Samantala, isiniwalat ni US fighter Ryan Garcia na natupad na ang kanyang pangarap na makalaban si Filipino legend Manny "Pacman" Pacquiao.

Nag-post ang 22-anyos sa kanyang Instagram ng poster para sa inaasam na laban nila ni Pacman. "A dream turned reality," ani Garcia na may pro-record na 21-0 win-loss at kasalukuyang interim WBC lightweight champion. "It's an honor to share the ring with Manny Pacquiao. I will always respect what you did in and out of the ring. Here's to the best man winning," dagdag nito.

Wala naman itong detalyeng inilabas kaugnay sa sinasabi nitong laban. May ipinagmamalaking maraming social media followers, una nang sinabi ni Garcia na pangarap nitong makasagupa si Pacman.

Hindi pa lumalaban si Pacman mula noong Hulyo 2019 matapos ang split decision win nito kontra kay American boxer Keith Thurman sa welterweight championship. Medyo nawalan ng gana si Pacman na labanan si McGregor nang matalo via 2nd round knockout kay Dustin Poirier.

Team Lakay Adiwang, wagi sa 2nd round KO vs. Namiki

ni Gerard Peter - @Sports | January 24, 2021

Muling nakabalik sa winning performance ang Team Lakay fighter na si Lito “The Thunder” Adiwang matapos pabagsakin si Namiki Kawahara ng Japan sa pambungad na strawweight match, Biyernes ng gabi sa ONE: Unbreakable I sa Singapore Indoor Arena sa Singapore.

Bumitaw ng dumadagundong na kaliwang suntok sa panga si Adiwang sa papasugod na Japanese fighter sa 2:57 ng 2nd round para makabawi sa masaklap na split decision defeat sa isa pang hapones na si Hiroba Minowa noong Nobyembre 13, 2020 sa ONE: Inside the Matrix 3.

Ipinalasap ni Adiwang ang kumbinasyong suntok at sipa laban sa karate-style na kalaban. Ngunit kahit pa man bumibitaw ito ng mga banat ay maingat pa rin ito sa mga patama upang makasigurong may matitiyempuhan ang delikadong Japanese striker na unang beses sumabak sa ONE Championship kasunod ng 2-fight winning streak.

Maingat na nagpapatama si Adiwang ng leg kicks na sinusundan ng mga suntok at ilang bitaw na roundhouse kicks sa simula ng salpukan. Sa pagpasok ng 2nd round ay nagkaroon ng isang pagkakamali si Kawahara na agad nakita ni Adiwang para magpabagsak dito. “It's been tough for me, I'm very emotional coming into this fight. I know I'm got a lot of challenges entering this bout, I tested myself here, honestly, this is the toughest fight I faced. I was not able to prepare well but to God be the glory for the win,” wika ni Adiwang na emosyonal sa panayam sa kanya ni Mitch Chilson sa post-bout interview, na inaalay ang kanyang laban sa namayapang ina noong Disyembre 2020. “To my family, we’ve been through a lot, I love you so much. This is for you, this is for you mama.”

Nagkaroon naman ng bagong kampeon sa ONE bantamweight kickboxing nang patumbahin ni Capitan Petchyindee Academy ng Thailand ang dating kampeon na si Alaverdi “Babyface Killer” Ramazanov ng Russia sa 1:56 ng 2nd round ng hindi ito makabangon sa countdown dahil sa mga malulupit na kumbinasyon ng suntok at sipa sa katawan at ulo ng Thai fighter.

Nagpamalas ng kakaibang kahusayan sa submission si dating ONE lightweight champion Shinya “Tobikan Judan” Aoki ng Japan nang itala nito ang bagong record na 29th submission victory sa ONE Championship nang tapusin si American James Nakashima sa bisa ng Neck crank habang nakaangkas sa likod ni Nakashima mula sa back-locked body triangle. Dahil sa panalong ito ay lumakas ang tsansang makuha muli ang nawalang titulo laban kay ONE Lightweight champion Christian Lee.