Rat na nagbabalak ikasal, ngayong taon dapat ituloy

ni Maestro Honorio Ong @Forecast | Ika-2 Araw ng Abril, 2024

Ipagpatuloy  natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Rat o Daga. 

Ang Rat o Daga ay silang mga isinilang noong 1924, 1936, 1948, 1960, 1972, 1984, 1996, 2008, 2020, at 2032.

Bukod sa Unggoy, ang Daga ay ka-tugma o ka-compatible rin ng Dragon sa tinatawag na “triangle of affinity’, kung saan ang Dragon ang iiral na animal sign ngayong 2024. Ibig sabihin, tiyak na susuwertehin ang Daga sa halos lahat ng aspeto ng kanyang buhay sa buong taong ito.

Sa first hanggang second quarter ngayong taon, sinasabing maraming ambisyon ang Daga at maluluhong pangarap na dahan-dahan at isa-isang matutupad. Bagama’t hindi lahat ng pangarap ng Daga ay magkakatotoo sa kasalukuyang taon, may mga pangyayaring higit sa inaasahan niya sa larangan ng materyal na bagay at salapi ang maidadagdag sa kanya, higit lalo sa kalagitnaang bahagi ng taong 2024.

Bagama’t marami ang aasa sa kanya, dahil siya ay nakikitang sinusuwerte sa larangang pampinansyal, habang may umaasa sa kanya, hindi naman niya dapat ito pagdamutan dahil tulad ng nasabi na, tuluy-tuloy ang dating ng suwerte sa Daga ngayong 2024, higit lalo sa aspetong pampinansyal.

May magagandang oportunidad ding darating bago matapos ang taon, sa buwan ng Setyembre hanggang Oktubre, na kung susunggaban lang nang susunggaban ng Daga ang nasabing mga oportunidad, ito ang magpapataas pa lalo ng kanyang karangalan, achievement at savings sa larangan ng career at aspetong pampinansyal.

Kaya kung ikaw ay isang Daga, dapat sa taong ito ng 2024, wala kang dapat palampasin, anumang oportunidad at magagandang kapalaran darating sa iyo. Oo, hindi ka dapat umiwas at magdahilan, dahil ang pagdating ng suwerteng panahon, tulad ngayong Year of the Green Wood Dragon ay paminsan-minsan lang dumarating sa kapalaran at buhay ng isang Daga, kaya huwag na huwag mo itong palalampasin, kundi saidin mo nang lubos ang lahat ng pagkakataong magbubukas upang lalo pang umunlad ang iyong career, propesyon, salapi at karangalan, dahil ang lahat ng ito ay sadyang regalo sa iyo ng langit.

Sa negosyo at pangangalakal, bagama’t tuluy-tuloy na tataas ang graph ng pag-unlad, paglaki ng tubo at puhunan, hindi naman ka naman dapat magmadaling yumaman, dahil may babala na kapag masyado kang nagmadali at pumasok sa mga transaksyon wala kang gagawin, ngunit kikita ka pa rin ng malaking halaga, ito ay maaaring scam.

Sapagkat, sa taong ito ng 2024, may babala rin sa isang Daga na kung hindi magiging mapagmatyag at maingat, maaari kayong maloko ng malaking halaga ng mga nag-aanyong tutulong at kaibigan, ngunit may mas malalim pa lang motibo na lokohin, pagsamantalahan at dayain ka ng malaking halaga at huli na ang lahat kapag natuklasan mong naloko o na-scam ka na pala.   

Sa pag-ibig at pakikipagrelasyon, bagama’t magiging matamlay ang aspetong pangromansa sa unang hati ng taon, muli naman itong iinit at sasarap sa kalagitnaan ng taon,  hanggang sa last quarter ng taon lalo na sa buwan ng Oktubre hanggang Disyembre.

Sa mga binata at dalaga na nagbabalak mag-asawa o magpakasal, paborable naman sa inyo ang taong ito ng Green Wood Dragon para magsimula ng isang maunlad at maligayang pamilya, higit lalo sa buwan ng Abril, Hunyo, Setyembre, Oktubre at Nobyembre. Mas maganda kung itutuon ang pag-iisang-dibdib sa panahon nasa first quarter, new moon o kaya’y full moon ang buwan sa kalangitan, upang tulad ng papalaki at papabulas na buwan sa langit, tuluy-tuloy ding uunlad at magiging maligaya ang papasukin n’yong relasyon o pagpapamilya.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Mga animal sign na ka-compatible ng Daga

ni Maestro Honorio Ong @Forecast | Ika-1 Araw ng Abril, 2024

Ipagpatuloy  natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Rat o Daga.

Ang Rat o Daga ay silang mga isinilang noong 1924, 1936, 1948, 1960, 1972, 1984, 1996, 2008, 2020, at 2032.

Sa propesyon, sinasabing ang Daga ay higit na umuunlad, nagtatagumpay at lumiligaya kung ang kanyang magiging trabaho ay isang manunulat, teacher, historians, at troubleshooters. 

Nangyari ganu’n, dahil para sa isang Daga, kapag may problema ang isang kumpanya o personal niyang mga kaibigan, madali siyang nakakatulong o nakakatugon dahil mahusay siyang umisip ng unique o kakaiba pero epektibong paraan upang malutas ang anumang uri ng suliranin.

Dagdag dito, sa panahon ng krisis o kaya ay may mabibigat na problema, maaasahan din ang Daga dahil sa panahong mas mahirap solusyonan ang mga suliranin, lutang na lutang naman ang husay at galing ng isang Daga sa pagdedesisyon at diskarte.

Sa pag-ibig, tahimik lang ang isang Daga. Kaya kadalasan, ang mga Daga ay matagal o medyo nale-late ang edad bago makapag-asawa at kung minsan hindi rin nila gaanong nalalasahan ang masarap at nakakabaliw na karanasan. Iniiwasan din kasi ng Daga na siya ay mahulog sa nakakabaliw na tunay at hangal na pag-ibig. Ngunit, ang nakakagulat kapag nabuhay mo na ang damdamin ng isang Daga o nahuli mo na ang kanyang kiliti, tunay namang todo-bigay siya. Kung saan, kunwari pang nahihiya, pero sarap na sarap naman pagdating sa matatamis na lasa ng pag-ibig at masarap na pakiramdam ng romansa.

Dagdag pa rito, sinasabi ring sa 12 animal signs na pinatawag ni Lord Buddha, isa ang Daga sa masarap makapareha sa love making at anumang karanasang may kaugnayan sa sex at lambingan.

Kung ang Daga ay kapamilya o matalik mong kaibigan, tunay ngang lumalabas ang kanyang pagiging natural, kaya masaya rin siyang kasama. Pero sa pag-ibig o pakikipagrelasyon, minsan hindi talaga natin maiaalis, pilit talagang itinatago ng isang Daga ang kanyang tunay na feelings. Kaya naman, kung hindi mo kabisado ang asawa, girlfriend o boyfriend mong Daga, mapagkakamalan mo siyang kulang sa lambing, malamig at minsan ay may sumpong. Ang totoo pa nga nito, minsan ang Daga ay sadyang mahirap ding unawain. At dahil nga dito, mahilig siyang magtago ng kanyang emosyon o ng kanyang tunay na nadarama, lalo na sa kanyang asawa o  kapareha, hindi tuloy nagiging tunay na masaya ang Daga sa larangan ng pag-ibig at pakikipagrelasyon.

Kaya kung ikaw ay may asawang Daga, dapat nagtataglay ka ng malawak na isipan upang unawain ang malalim na pagkatao ng isang Daga. At siyempre dapat malaki rin ang iyong puso at pagmamahal sa kasuyo mong Daga para sa kabila ng tinatago at magulong damdamin ay patuloy mo siyang alagaan at lalo pang mahalin.

Tugma at compatible naman sa Daga ang masipag at seryosong Baka, ang tapat at medyo tamad na Dragon, at ang may pagkatusong Ahas. Gayunman, natutuwa rin ang Daga sa isang maharot na Unggoy, hindi lang ‘yan dahil tugma rin sa isang Daga ang matapang na Tigre, at ang malambing na Baboy.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….

Isinilang sa Year of the Rat, yayaman nang bongga

ni Maestro Honorio Ong @Forecast | Marso 27, 2024

Ipagpatuloy  natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.

Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Rat o Daga. 

Ang Rat o Daga ay silang mga isinilang noong 1924, 1936, 1948, 1960, 1972, 1984, 1996, 2008, 2020, at 2032.

Ang isa pang magandang balita para sa mga Daga, sinasabing sa 12 animals na pinatawag ni Lord Buddha sa kanyang palasyo, ang Daga ang isa sa pinakamayaman.

May ugali kasi ang Daga na kung minsan ay nagiging kuripot at matipid, kaya naman lalo tuloy dumarami ang kanyang savings habang ‘yung iba namang mga Daga ay may pagkawaldasera, pero ang nakakapagtaka rito ay patuloy pa rin silang yumayaman.

Nangyaring ganu’n, dahil tulad ng nasabi na, ang mga Daga ay likas talagang suwerte.

Hindi lamang sa pagnenegosyo kundi likas din silang suwerte sa aspetong pangmateryal na bagay. Kaya bihirang-bihira ka makakakita ng isang Daga na mahirap at kung sakaling makakita ka ng isang Daga na mahirap lang, ang karanasan niyang ito ay panandalian lang, dahil walang duda, darating ang panahon na siya rin ay uunlad na talaga namang nakatakda sa kanyang kapalaran.

Dagdag dito, kapag ang Daga ay may maunlad at maalwan na pamumuhay, lalo niyang naa-appreciate ang value o halaga ng salapi, kaya naman lalo siyang nagpapakayaman.

Ginagawa niya ang magpayaman nang husto, dahil batid niyang ang katumbas ng “pera” ay ang “security at peace of mind” lalo na kung pag-uusapan ang future.

Ang nakakatuwa pa sa isang Daga, sinasabing kapag nararamdaman ng Daga na siya ay sumosobra na sa yaman, hindi pa rin siya nagiging gahaman. ‘Yung iba kasing napakayaman, lalong nagiging sakim at gahaman sa pera, pero hindi ganu’n ang Daga. Sa halip, nagagawa pa niyang mamigay, lalo na sa mga taong alam niyang may malalim na pangangailangan.

Kaya naman ang isang Daga kapag yumayaman, tulad ng nasabi na, nagagawa niyang balatuhan ang mga taong malalapit sa kanya, lalo na ang kanyang mga kamag-anak, kapitbahay at matalik na kaibigan. Dahil sa pag-uugali ng Daga na mapagbigay at matulungin, patuloy siyang pinagpapala ng langit, kaya naman lalo tuloy siyang yumayaman.

At dahil sa likas ngang suwerte, bukod sa yumayaman, madalas ding matagpuan ang isang Daga na bukod sa yumaman ay naabot din niya ang lahat ng kanyang mga ambisyon at mga pangarap, lalo na sa career at propesyon.

Talagang ganu’n at walang tayong magagawa, ipinanganak kasi ang isang Daga, hindi para mabigo o malungkot sa buhay, dahil bago pa siya iniluwal sa daigdig, kakambal na niya ang suwerte at magandang kapalaran. Hindi lamang sa salapi kundi sa halos lahat ng aspeto ng kanyang buhay.

Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.

Itutuloy….