Rabbit, lalaki ang gastusin habang lumalaki ang kita kaya dapat sabayan ng pag-iipon

ni Maestro Honorio Ong - @Forecast | March 4, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Rabbit o Kuneho ngayong Year of the Metal Ox.

Kung ikaw ay isinilang noong taong 1927, 1939, 1951, 1963, 1975, 1987, 1999, 2012 at 2023, ikaw ay naiimpluwensiyahan ng animal sign na Kuneho o Rabbit.

Sa pag-ibig at pakikipagrelasyon, katugma at ka-compatible ng Kuneho ang isang maamo at mabait na Tupa, habang nagtititigan at nasa lugar na malapit sa nature, tunay ngang makararanas sila ng isang romantiko at walang kamatayang relasyon.

Bukod sa Tupa, ang Kuneho ay tugma rin sa malambing na Aso at sa mapagmahal na Baboy kung saan ang relasyong Kuneho at Aso, ganundin ang relasyong Baboy at Kuneho, ay kadalasang nagiging maunlad at produktibo, higit lalo sa aspetong salapi at materyal na mga bagay.

Gayundin, bukod sa Tupa, Baboy at Aso, pinaniniwalaang ang Kuneho ay magkakaroon din ng manaka-nakang pakikipagrelasyon sa isang tuso at matalinong Ahas. Bagama’t hindi gaanong magtatagal ang ganitong ugnayan, makararanas naman sila ng makili ngunit masarap na romansa.

Samantala, humigit-kumulang ganito ang inaasahang magaganap sa kapalaran ng Kuneho sa buong taon.

Sinasabing sa umpisa pa lamang ng taon, partikular sa buwan ng Abril at Mayo, magiging higit na produktibo na ang buhay mo, lalo na sa aspetong materyal na bagay at pagkakaperahan, kaya naman samantalahin mo ang mga dati mo nang ventures o pinagkakakitaan kung saan dagdagan mo pa ang pagsisipag dahil ang pag-angat ng graph ng kabuhayan ay magtutuluy-tuloy na sa taong ito ng 2021.

Ang problema na dapat mo ring bantayan ay habang tumataas ang iyong income, hindi mo mapapansin na lalaki rin nang lalaki ang iyong pagkakagastusan. Kunsabagay, natural lang naman ito sa nagpapaunlad ng kabuhayan, kaya naman ang dapat mong isagawa ay kapag napapansin mong lumalaki ang iyong kinikita, sabayan mo ito ng malawakang pag-iipon at pagpupundar. Sa ganyang paraan, hindi masasayang ang malalaking halaga ng salapi na nakatakda mong mahawakan sa buong 2021.

At dahil kasabay ng pag-angat ng kita ngayong 2021 ay ang mga hindi inaasahang gastusin, dapat ngayon palang ay planuhin mo na kung saan-saan mo dadalhin ang iyong pera at kung anu-ano ang mahahalagang bagay na dapat mong pagkagastusan. Sa sandaling naging maingat ka sa paglabas ng pera, tulad ng nasabi na, malaking pakinabang na sa materyal na aspeto ang maiipon at maitatabi mo sa buong taong ito ng 2021, na mapakikinabangan mo pa sa dagdag na puhunan upang sa susunod na taong 2022 ay lalo mo pang mapalago nang husto ang iyong kabuhayan.

Itutuloy

Isinilang sa Year of the Rabbit, in denial kahit inlab kaya matagal makapag-asawa

ni Maestro Honorio Ong - @Forecast | March 2, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Rabbit o Kuneho ngayong Year of the Metal Ox.

Kung ikaw ay isinilang noong taong 1927, 1939, 1951, 1963, 1975, 1987, 1999, 2012 at 2023, ikaw ay naiimpluwensiyahan ng animal sign na Kuneho o Rabbit.

Bukod sa palaging kampante ang isang Kuneho, sinasabing sobrang magara at kakaiba naman ang kanilang malalaki at magagarang pangarap. Para sa isang Kuneho, kahit wala siyang gaanong materyal na mga bagay na hawak sa kasalukuyan, basta patuloy siyang nangangarap at may imahinasyon ng magandang bukas, hindi lamang sa kanyang sarili kundi sa bawat nilalang sa mundong ito, sa ganu’ng paraan, tunay ngang ligtas sa kahirapan at talaga namang masayang-masaya na ang damdamin, puso at ang mismong kaluluwa ng isang Kuneho.

Sa career at pagnenegosyo, sinasabing higit na magtatagumpay ang Kuneho sa mga gawaing may kaugnayan sa pangongolekta ng lumang bagay tulad ng mga porselana na panahon pa ng Kastila ng mga sinaunang Chinese merchants. Uunlad at lalago rin ang kabuhayan ng mga Kuneho sa mga bagay na may kaugnayan sa arts tulad ng painting, sculptures at iba pang collectible materials kung saan dahil sa katagalan o dahil sa mataas na kalidad ng pagkakagawa, may mataas itong value o halaga. Sa ganu’ng mga koleksiyon, bigla silang yayaman at makakatiba ng malaking halaga.

Sa pakikipagrelasyon at pakikipagkapwa-tao, sinasabing bagama’t sensual at sabik din sa romansa at harutan, sinasabing bihirang-bihira namang makipagrelasyon ang pihikan na Kuneho.

Kilala rin ang isang Kuneho bilang pabagu-bago pag-iisip at damdamin pagdating sa pakikipagrelasyon, at madalas na niloloko nila ang kanilang sarili sa panahong sila ay tunay nang umiibig at nagmamahal. Kaya kadalasan, kahit mahal na mahal na talaga nila ang isang tao o ang kanilang matalik na kaibigan, ide-deny o hindi pa rin nila aaminin sa kanilang sarili na sila ay tunay na nagmamahal. Kaya ang nangyayari, dahil sa ugali nilang ito na hindi tapat sa sarili at palaging nagkukunwari at nagtatago ng kanilang damdamin, kadasalan ay matagal bago makipag-commit at makapag-asawa ang isang Kuneho.

Bukod sa pagiging pihikan at dinadaya ang sarili, pala-iwas din ang Kuneho kapag napapansin na niyang may nagkakagusto sa kanya. Hindi niya rin alam kung bakit siya ganu’n, basta gusto lang niyang iwasan ang isang lalaki o babae na nagkakagusto sa kanya.

At para sa isang Rabbit o Kuneho, bagama’t parang iwas o aloof siya pagdating sa pag-ibig at pakikipagrelasyon, para sa kanya, hintayin mo siyang magkagusto sa iyo, magparamdam o manligaw. Sa ganu’ng paraan kayo magkakasundo ng isang Kuneho dahil para sa kanya, hindi mo siya dapat unahan sa pag-ibig dahil mas gusto niyang siya ang unang nagpapadama ng likas niyang pagiging romantiko at malambing.

Bagama’t hindi agad nagko-commit sa pag-ibig at pakikipagrelasyon sa opposite sex, makakaasa ka naman sa sobrang concern at pagmamahal ng isang Kuneho sa kanyang pamilya, lalo na sa kanyang mga magulang at kapatid. Basta’t may kaugnayan na sa pagtulong sa kapamilya, ‘wag kang magdadalawang-isip na lumapit sa isang Kuneho dahil tiyak na gaanuman kabigat ang iyong problema, kahit may kaugnayan pa ito sa materyal na aspeto, tiyak na tutulungan ka ng isang Kuneho.

Itutuloy

Isinilang sa Year of the Rabbit, laging relaks sa buhay kaya nag-e-enjoy hanggang tumanda

ni Maestro Honorio Ong - @Forecast | February 27, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Rabbit o Kuneho ngayong Year of the Metal Ox.

Kung ikaw ay isinilang noong taong 1927, 1939, 1951, 1963, 1975, 1987, 1999, 2012 at 2023, ikaw ay naiimpluwensiyahan ng animal sign na Kuneho o Rabbit.

Ayon sa mga sinaunang Chinese, ang Kuneho ay sumisimbolo ng “longevity” kung saan sila ay nabubuhay ng mahaba at maligaya dahil kadalasan, iniiwanan ng mga Kuneho ang mabibigat na pagsubok at problema ng buhay.

Dahil dito, relaks at kalmante lang sila sa kanilang pang-araw-araw na buhay at karamihan sa kanila ay inaabot ang matandang-matanda nang edad kung saan labis nilang na-e-enjoy ang lahat ng sarap at ligaya sa buhay na ito kahit pa sa panahon ng kanilang pagtanda.

Para sa isang Kuneho, mas gusto pa niyang mabuhay sa isang tahimik at komportableng lugar kaysa sumuong sa iba’t ibang uri ng pakikipagsapalaran. Dahil para sa kanya, mas mahalagang mapreserba ang malusog at mahabang pamumuhay kaysa sa mga materyal na bagay na batid niyang hindi naman sa materyal na mga bagay na ito lamang ang ikinaliligaya ng bawat tao.

Bagama’t mas pinipili ng isang Kuneho na mabuhay lang nang kampante, tahimik at nag-iisa, sinasabing likas din siyang matulungin, lalo na sa mahihirap, inaapi at walang maaasahan. Ang pagiging maaawain na ito ng isang Kuneho ay isa sa nagiging dahilan kung bakit lalo pang humahaba at nagiging maligaya ang kanilang buhay.

Dahil para sa isang Kuneho, ang pagtulong at pagmamahal sa kapwa, lalo na nga sa mga less fortunate, ang pangunahing dapat gawin at ipatupad ng isang marangal at mabuting tao habang siya ay nabubuhay sa mundo.

Kaya naman dahil sa kabutihang ito ng isang Kuneho na likas sa kanyang puso, sinasabing sa 12 animal signs na ipinatawag ni Lord Buddha sa kanyang palasyo, Kuneho ang isa sa pinakamapalad at pinakamasuwerte dahil ang tunay na gumagabay sa kanya ay ang nasa itaas kung saan palagi siyang pagkakalooban ng langit ng magaganda at maliligayang karanasan.

At ang ikinaganda pa nito, naniniwala rin ang mga sinaunang Chinese na ang isang Kuneho sa panahon ng kanyang pagtanda ay tiyak na makakaranas ng masarap, kuntento at maligayang pamumuhay na hindi naranasan ng iba pang mga animal signs.

Itutuloy