Year of the Horse, prayoridad ang paglalakwatsa kaya purdoy ‘pag ‘di natutong mag-ipon

ni Maestro Honorio Ong - @Forecast | April 17, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Horse ngayong Year of Metal Ox.

Kung ikaw ay isinilang noong taong 1930, 1942, 1954, 1966, 1978, 1990, 2002, 2014 at 2026, ikaw ay naiimpluwensiyahan ng animal sign na Horse o Kabayo.

Sa pakikisalamuha sa tao at pakikipag-ugnayan sa kapwa, sinasabing ang Kabayo ay masarap maging kaibigan at kasama, ngunit hindi siya kahusayan sa pagbibigay ng advice o payo, lalo na sa mga seryoso at totohanang problema ng buhay dahil ang kanyang isipan ay palaging nakatuon sa paglalakwatsa at pagpapasarap ng buhay.

At dahil masarap kasama at kaibigan ang isang Horse, magaling din siyang magkuwento at kapag kasama mo siya, marunong din siyang magpatawa at sadyang nakalilibang talaga. Kaya naman karamihan sa mga Kabayo ay may malalaking grupo ng mga kaibigan, palabarkada, mahilig sa gimmick, outing, picnic, mountain climbing at pamamasyal.

Dahil dito, sinsabing bihira sa mga Kabayo ang labis na nagpapahalaga sa salapi. Bagkus, hindi nila sinasadya, hindi sila nakakaipon dahil mas ipinaprayoridad nila ang mga bagay na may kaugnayan paglalakwatsa, paggagala at pamamasyal kung saan hindi nila namamalayan na roon na napupunta ang malaking bahagi ng kanilang budget o buwanang kinikita.

Kaya naman kapag hindi natutong mag-ipon at magsinop ng kabuhayan ang isang Kabayo, tunay ngang sa kanilang pagtanda o kung bigla siyang mawawalan ng trabaho, siguradong hikahos na hikahos siya.

Gayundin, sinasabing karamihan sa mga Kabayo ay maagang umaalis sa puder ng kanyang pamilya dahil sa panahon ng pagbibinata at pagdadalaga, ang gusto talaga ng puso niya ay ang makalaya at magkaroon siya ng sariling diskarte at pamamaraan sa buhay.

Sa pag-ibig at pakikipagrelasyon, sinasabing higit na ka-compatible ng isang Kabayo ang Tigre, Aso at Tupa. Sapagkat lilimitahan ng Aso ang pagiging lakwatsera at lakwatsero ng isang Kabayo. Habang itutulak naman ng Tigre ang Kabayo upang lalo pang maging masaya at maligaya sa mga ginagawa niyang pamamasyal at paglalakwatsa.

Makadarama naman ng comfort at kapahingahan ang Kabayo sa piling ng isang mabait, malambing, maasikaso at magpagmahal na Tupa.

Samantala, makakasumpong naman ang Kabayo ng malalim na karunungan sa isang Dragon at iba pang malalalim na kahulugan ng buhay na hindi niya natatagpuan sa ibang animal signs.

Makasusumpong din ng laya at kakaibang simpatya ang Kabayo sa piling ng isang Ahas, Unggoy, Kuneho, Baboy at Tandang, kung saan ang secondary compatibility ng Horse ang nasabing mga animal sign na puwede niya ring makasama sa pagbuo ng isang masaya at panghabambuhay na pamilya.

Itutuloy

Horse, laging nagmamadali magdesisyon kaya mabilis ding nabibigo

ni Maestro Honorio Ong - @Forecast | April 15, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Horse ngayong Year of the Metal Ox.

Kung ikaw ay isinilang noong taong 1930, 1942, 1954, 1966, 1978, 1990, 2002, 2014 at 2026, ikaw ay naiimpluwensiyahan ng animal sign na Horse o Kabayo.

Sinasabing higit na maligaya ang isang Kabayo kapag nai-express niya nang malaya at wagas ang mga laman ng kanyang isipan. Kaya naman kapag ang kausap ng isang Kabayo ay walang gaanong kaalaman at hindi malawak ang pinagkukunan, madali siyang naiirita, habang kapag naman niyang matalino at malawak ang kanyang kausap, sumisigla at nagiging maligaya ang Kabayo. Kaya bagay na bagay sa Kabayo ang isang nagtatali-talinuhan na Tandang at ang malilim at malawak mag-isip na Aso.

Bukod sa makuwento at palaisip, ang isang Kabayo ay sadyang mabilis din sa lahat ng bagay, kaya ayaw din niya ng kasama na babagal-bagal. Sinasabing tipikal na ugali ng isang Kabayo ang pagiging mabilis magsalita, magsulat, magpasaya, mag-isip, kumilos at magpatupad ng kanyang mga binabalak. Kaya kung hindi magagabayan nang sapat at tumpak ang kanyang mga kilos at ginagawa, madalas ay hindi lang siya mabilis na nagtatagumpay dahil mabilis din siyang nabibigo. Pero kapag nabigo o pumalpak naman ang isang Kabayo, dahil likas din siyang matalino at madiskarte, agad at mabilis din siyang nakakaahon sa mga pagsubok at kabiguang kanyang nasusuungan.

Kaya naman ang isang Kabayo ay mabilis ding magpabago-bago ng isip at pagpapasya na hindi naman gaanong nakakaapekto sa kanyang ligaya at tagumpay.

Dagdag pa rito, sinasabi ring ang Kabayo ay hindi basta-basta naaapektuhan ng anumang pagbabago, sapagkat para sa kanya, ang mga pagbabago ng buhay na nagaganap sa araw-araw ay bahagi lamang ng kanyang karanasan at kapalaran.

Bukod sa mabilis magpasya at madaling nakapag-a-adjust sa mga pangyayari, ang isang Kabayo ay sinasabi ring may kakayahang mag-multitask kung saan puwedeng habang nagco-computer ay nagagawa niya pang makipag-tsikahan sa pamamagitan ng telepono at kasabay nito ay umiinom pa siya ng kape at nagbabasa ng paborito niyang libro. Ang lahat ng ‘yun ay maginhawa niyang nagagawa nang sabay-sabay.

Kaya naman sa pag-ibig at pakikipag-ugnayan sa kapwa, madalas ay hindi sinasadyang napagsasabay-sabay niya rin ang ang iba’t ibang uri ng pakikipag-ugnayan, pakikipagkaibigan at pakikipagrelasyon, na minsan, bagama’t nakakagulo sa kanyang isipan ay kayang-kaya niya itong i-handle nang maayos at maligaya.

Dahil kung minsan ay napagsasabay-sabay niya ang mga ugnayan at pakikipagrelasyong napapasukan, ang nagiging resulta nito, bagama’t masaya ay nagiging panandalian lamang.

Samantala, sinasabing ang isa sa pinakamasayang karanasan ng isang Kabayo ay ang maraming mga paglalakbay at pamamasyal dahil sa gawaing ‘yun, tunay ngang higit na nagiging matagumpay at maligaya ang isang Kabayo.

Kaya sa career, bagay na bagay sa isang Kabayo ang mga gawain o propesyon na kung saan-saan siya nade-destino at napupunta dahil ‘yun talaga ang hinahanap ng kanyang puso at malalim na katauhan.

Itutuloy

Career na walang adventure, ‘di para sa year of the Horse dahil ayaw mapirmi

ni Maestro Honorio Ong - @Forecast | April 08, 2021

Sa mga nakaraang araw, tinalakay natin ang pangunahing ugali at magiging kapalaran ng animal sign na Snake ngayong 2021.

Sa pagkakataong ito, ang pangunahing ugali at sadlakang kapalaran naman ng animal sign na Horse o Kabayo ang ating tatalakayin.

Kung ikaw ay isinilang noong taong 1930, 1942, 1954, 1966, 1978, 1990, 2002, 2014 at 2026, ikaw ay naiimpluwensiyahan ng animal sign na Horse. Sinasabing ang Kabayo ay siya ring Gemini sa Western Astrology na nagtataglay ng ruling planet na Mercury.

Gayunman, pinaniniwalaang ang mga Kabayo ay higit na papalarin mula alas-11:00 ng umaga hanggang ala-1:00 ng hapon.

Habang ang mapalad namang direksiyon ng Kabayo o Horse ay ang south o timog na bahagi ng mundo o ng inyong tahanan o bakuran.

Sinasabing ang mga Kabayo na isinilang sa panahon ng tag-sibol at tag-araw ang higit na mabilis, malakas at talaga namang may magandang kapalaran kung ikukumpara sa kapatid niyang isinilang sa panahon ng winter o tag-ulan.

Dagdag pa rito, pinaniniwalaan ding bubulas nang husto ang magagandang kapalaran sa buhay ng isang Kabayo sa panahong siya ay nasa middle age kung saan ganap at nasa rurok na talaga ang kanyang mga karanasan.

Pangunahing katangian ng Kabayo ang pagiging masayahin, laging in the mood, hindi mapakali, hindi napapagod at napakahirap tanggihan.

Higit niyang pinahahalagahan ang pagiging malaya at ayaw na ayaw niyang nakakulong sa bahay. Dahil dito, sa 12 animal signs, ang Kabayo o Horse ay isa sa pinakamahilig sa adbentura at pakikipagsapalaran dahil ‘yun ang ikinaliligaya niya.

Kaya naman kung career ang pag-uusapan, ‘wag na ‘wag mong kukulungin ang Kabayo sa isang kuwarto tulad ng mga propesyon na ang gawain lamang ay ang maghapon na nakatutok o nakaharap sa computer. Kung ganito ang nangyaring trabaho o gawain sa kanya, tunay ngang hindi siya magiging maligaya, maliban na lang kung tuwing lingo o every weekend ay gagala siya o gi-gimmick kasama ang mga kaibigan at kabarkada.

Bukod sa pinahahalagahan ang pagiging malaya at mga adbentura, sinasabi ring ang Horse ay isa sa 12 animal signs na may mabilis at matalinong pag-iisip. Kumbaga, halimbawang may problema o iniisip na proyekto ang isang team o kumpanya, mabilis niyang naiisip ang dapat at kailangang solusyon.

Sa totoo lang, dahil sa taglay na likas na katalinuhan ng isang Kabayo, hindi lang solusyon ang agad niyang naiisip sa isang sitwasyon o problema, bagkus kadalasan pa nga ay nahihinuha at alam na alam na niya ang kauuwiang pangyayari, kung saan kadalasan ay palaging tama at tumpak ang haka-haka niyang nabanggit.

Kaya naman ang Horse ay higit na nagiging maligaya at matagumpay sa isang propesyon o gawaing ginagamitan talaga ng isip at malalim na pag-aanalisa. Tulad ng paglalaro ng chess, kaya naman siya ang napiling heneral sa isang maselang digmaan, na anumang desisyon sa bawat oras o sandali habang nagaganap ang giyera o digmaan, ay nangangailangan ng mabibilis at tumpak na desisyon.

Itutuloy