Isinilang sa Year of the Sheep, dapat munang mamulat sa reyalidad ng paligid at mundo bago umunlad

ni Maestro Honorio Ong - @Forecast | April 24, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Sheep o Tupa na tinatawag ding Goat o Kambing ngayong Year of the Metal Ox.

Kung ikaw ay isinilang noong taong 1931, 1943, 1955, 1967, 1979, 1991, 2003, 2015 at 2027, ikaw ay naiimpluwensiyahan ng animal sign na Sheep o Tupa at tinatawag din Goat o Kambing.

Dahil sa taglay na kabutihan at mababang puso, sinasabi ring ang Kambing o Tupa ay madali ring maimpluwensiyahan at mauto. Kaya naman kung hindi mag-iingat sa mga manloloko at racketeer ang isang Tupa o Kambing, tiyak na mauutangan siya ng malaking halaga at wala nang bayaran at talaga namang hindi na niya ito masisingil pa.

Kaya upang umulad at lumago ang kabuhayan, dapat niyang maisip na minsan ay hindi naman talaga mabuti at masyado kang mabait at maawain sa iyong kapwa, lalo na kung ang pinakikitaan mo ng kabaitan at awa ay mga taong masasama at walang kuwenta.

Samantala, isa rin sa negatibong katangian ng isang Kambing o Tupa na dapat niyang sawatain upang matiyak ang kanyang pag-unlad at ligaya ay ang pagiging pesemista at maramdamin. Kung saan, karamihan sa kanila ay nakatingin palagi sa pangit na anyo ng buhay sa halip na sa magandang bulaklak ang napapansin nila sa isang halaman ay ang mga lantang dahon nito. Kaya naman kung hindi ito maaalis ng isang Tupa sa kanyang buhay, sinasabing malabo siyang umunlad at habambuhay na lumigaya.

At dahil likas ang taglay na kabaitan, madali ring magtampo at magdamdam ang isang Tupa kung saan nahihirapan siyang tanggapin ang katotohanang hindi lahat ng tao sa mundo ay katulad niya na mabait, tapat, mapagbigay at mapagpasensiya, kaya naman kapag may nae-encounter o nakakasalamuha siyang masasamang tao, mapagsamantala, tuso, kuripot, matapobre at mapang-api ng kapwa, hindi niya maiisip na may mga ganu’ng tao na ang mundo pala ay hindi lamang tirahan ng mababait na nilalang. Sa halip, minsan ay mas marami pa ang may magagaspang na ugali at masasama.

Kaya naman habang nagma-mature ang isang Tupa o Kambing, kasabay nito ang unti-unting paglawak at nagiging matured din ang pananaw niya sa mundo at nakikita niya nang malinaw ang reyalidad o katotohanan ng buhay.

Kaya naman sinasabing uunlad at magiging maligya na sa buhay ang Tupa o Kambing, lalo na sa aspetong materyal na mga bagay pagtuntong pa niya ng edad 43, kung saan sa panahong ito, magiging mulat siya sa totoong nangyayari sa mundo at kanyang kapaligiran.

At dahil likas na maramdamin at may pagka-emosyunal, maawain at nadadala ng labis na awa at habag, ang ikinaganda naman sa isang Tupa o Kambing ay ang taglay niyang matalas na intuition, kung saan sa anumang pagdedesisyon at maging sa lahat ng aspeto ng kanyang buhay, sinasabing kapag ginamit o pinanghawakan niya ang kanyang matalas na intuition, tiyak na ang dulong sadlakan ng gagawing niyang pagpapasya at pagkilos ay sa malaking tagumpay at wagas na kaligayahan hahantong.

Itutuloy

Isinilang sa Year of the Sheep, madalas tumulong sa kapwa kahit hirap sa sariling sitwasyon

ni Maestro Honorio Ong - @Forecast | April 22, 2021

Sa mga nakaraang araw ay tinalakay natin ang pangunahing ugali at sadlakang kapalaran ng animal sign na Horse ngayong 2021 o Year of the Metal Ox.

Sa pagkakataong ito, ang pangunahing ugali at kapalaran naman ng animal sign na Sheep o Tupa na tinatawag ding Goat o Kambing ang tatalakayin natin.

Kung ikaw ay isinilang noong mga taong 1931, 1943, 1955, 1967, 1979, 1991, 2003, 2015 at 2027, ikaw ay naiimpluwensiyahan ng animal sign na Sheep o Tupa at tinatawag din Goat o Kambing.

Sinasabing ang animal sign na Kambing ay siya ring Cancer sa Western Astrology na nagtataglay ng ruling planet na Moon.

Ang mga Kambing o Tupa ay natural na papalarin mula ala-1:00 hanggang alas-3:00 ng hapon. Habang ang mapalad namang direksiyon ng Kambing o Tupa ay ang timog at timog kanluran o south at south-west na bahagi ng mundo o inyong tahanan o bakuran.

Sinasabing higit na nagiging mapalad ang isang Kambing na isinilang sa panahon ng tag-araw o tag-init, kung ikukumpara sa kapatid niyang isinilang sa panahon ng tag-ulan o taglamig.

Gayunman, ang mga taong isinilang sa animal sign na Kambing o Tupa ay siyang pinakamabait at pinakamatulungin sa lahat, kumbaga, mababa ang kanilang luha at mababaw ang kanilang puso. Madali silang naaawa sa mga labis na nangangailangan, kaya hindi nila napipigil ang kanilang damdamin na tumulong kung saan minsan ay halos kapos na kapos na sila, pero naitutulong pa nila ang mga bagay na para na lamang sana sa kanilang pangangailangan.

Kaya kung bait at buti ng kalooban ang hanap mo sa isang nilalang, hindi ka nagkakamali kung ang isang Tupa o Kambing ang iyong lalapitan.

Dahil sa kabaitan nilang taglay, ang kadalasang nagiging problema ay biktima sila ng mga taong mapagsamantala. Kaya kung hindi mag-iingat, malamang na ma-racket o madaya ng malaking halaga ang isang Kambing, na kadalasan ay ‘yun naman ang nangyayari sa kanila.

Para maiwasang mangyari sa kanila ang mga bagay na ito, dapat iisipin at pipiliin muna nila ang mga taong kanilang tutulungan, lalo sa aspetong pinansiyal kung saan, marami sa kanila ay mauutangan, pero hindi na sila mababayaran at kapag siningil nila ang mga kaibigan na may pagkakautang, sila pa ang lalabas na masama.

Samantala, dahil sa pagiging mabait, maawain at matulungin ng isang Kambing o Tupa, bihira sa kanila ang yumayaman at nagkakamal ng maraming-maraming pera dahil imbes na makaipon ng malaking halaga, ang naipon nilang salapi ay agad nilang naipamimigay o naitutulong sa kanilang mga kamag-anak o kakilala.

Kaya naman upang magtagumpay at habambuhay na lumigaya, dapat ding maisip ng Tupa o Kambing na hindi masamang maging praktikal, mag-ipon ng materyal na bagay at mag-impok ng kayamanan, higit lalo kung iisipin nilang ang mga salapi at kayamanang ito ay gagamitin naman sa future na pangangailangan. Halimbawa, kung may biglaang magkasakit sa pamilya, may magagamit silang panggastos para sa pagpapa-ospital.

Ang kadalasan tuloy na nangyayari sa isang Kambing sa panahong siya naman ang nangangailangan, lumalabas na siya ay nagiging kaawa-awa, dahil ang mga tao na dating tinulungan niya nang maluwag sa kanyang puso ay magdadamot at hindi mahihiraman ng anumang halaga ng pera.

Kaya hindi mararanasan ang senaryong ito, na para siyang kaawa-aawa kapag siya na ang nangangailangan kung ngayon pa lang ay matututo na siyang mag-ipon, magpundar at magsinop ng kabuhayan para sa kanyang sariling future, gayundin ang kanyang mga mahal sa buhay.

Itutuloy

Isinilang sa Year of the Horse, lalago ang investment at kabuhayan

ni Maestro Honorio Ong - @Forecast | April 20, 2021

Ipagpatuloy natin ang pag-aanalisa sa ugali at magiging kapalaran ng animal sign na Horse ngayong Year of the Metal Ox.

Kung ikaw ay isinilang noong taong 1930, 1942, 1954, 1966, 1978, 1990, 2002, 2014 at 2026, ikaw ay naiimpluwensiyahan ng animal sign na Horse o Kabayo.

Sinasabing sa taong ito ng 2021, ang mga dating plano ng isang Kabayo na hindi natupad noong 2020 dahil sa pandemya, ang kaibahan lamang ay kahit may pandemya pa sa kasalukuyan, umasa kang kumbaga sa bagong araw, unti-unti nang aaliwalas ang iyong buhay, kaya tulad ng nasabi na, lahat ng natigil mong pangarap at adhikain ay isa-isa at dahan-dahang mabibigyan ng katurapan ngayong 2021.

Kaya maraming mga suwerte at magagandang kapakinabangan ang inaasahang darating sa isang Kabayo sa buong taon, higit lalo sa aspetong materyal na bagay.

Asahan nang sa buwan ng Abril hanggang Hunyo, may malalaking ventures o proyekto ng pagkakakitaan ang awtomatikong lulutang, kung saan wala kang dapat gawin kundi ‘wag nang magdalawang-isip pa, sa halip ay sunggab lang dapat nang sunggab.

Nagbabadya rin ang taong ito ng tuloy-tuloy na paglago sa lahat ng aspeto at anyo ng iyong buhay. Kung ang mga dating investment mo ay hindi tumubo, sa taong ito ay tuloy-tuloy ang pag-angat ng income, lalo na sa mga investment na matagal natengga o hindi napakinabangan noong 2020. Ang ikinaganda pa nito, ngayong 2021, hinihikayat ka rin ng langit na magdagdag pa ng investment at sumugal sa mga biglaang suwerte at pakikipagsapalaran dahil tinataya na ang lahat ng ito ay magkakaroon ng positibong resulta.

Hindi lang sa negosyo, materyal na bagay at investment o pagkakakitaan gaganda nang husto ang taong ito para sa isang Kabayo. Sa halip, may pangako rin ng masarap at nakakikilig na romansa sa buong taong ito ng Metal Ox na may babala sa isang babae na biglaan kang mabuntis at kung ikaw naman ay isang lalaki, may babala na bigla kang makakabuntis. Kaya kung hindi pa handa sa pagpapamilya, hinay-hinay lang sa nakawiwiling pakikipagtalik sa minamahal.

Kaya kung ikaw ay isang Kabayo at naghahanap ng makakasuyo, tiyak na sa 2021 ay matatagpuan mo na siya. Sinasabing ang animal sign na matatalisod ng isang Kabayo sa taong ito ay maaaring isang Aso o Libra, kung saan ang pakikipagrelasyon ng Kabayo sa isang Aso o Libra ay tiyak na maging magiging masarap at mabunga. Kaya kung halimbawang ikaw ay isang binata o dalaga na Kabayo at nakatagpo ka ng isang Aso o Libra, ang masarap n’yong romansa ay maaaring tuluyan na ring mauwi sa isang panghabambuhay at maligayang pagpapamilya.

Kung ikaw naman ay may karelasyon o asawa na, tinatayang ang taong ito ay lalo pang magdudulot sa inyong relasyon ng mas romantiko at nakakikilig na pagniniig na magdudulot ng suwerte at bonus na ligaya. Kumbaga, habang magkasama kayo at nagmamahalan, lalo pang papalarin ang inyong relasyon. Kaya sa buwan ng Setyembre hanggang Disyembre, umasa kayo na mas marami pang biglaang suwerte at magagandang kapalaran ang bubuhos sa inyong karanasan.

Ito rin ang taon para sa mga mag-asawa na magdagdag ng investment o savings dahil inaasahang higit na magiging masagana ang buong taong ito ng 2021, kung ikukumpara sa noong 2020, lalo na sa mga bagay na may kaugnayan salapi at materyal na bagay.

Itutuloy