Year of the Monkey, kailangang matuto mag-ipon kahit magastos

ni Maestro Honorio Ong - @Forecast | May 20, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Monkey o Unggoy ngayong Year of the Metal Ox.

Kung ikaw ay isinilang noong 1932, 1944, 1956, 1968, 1980, 1992, 2004, 2016 at 2028, ikaw ay naiimpluwensiyahan ng animal sign na Unggoy.

Bukod sa pagiging tuso, matalino at mautak, ang Unggoy ay palagi ring mapamaraan. Anumang problema ang kanyang napapasukan, sa sarili niyang diskarte at malikhaing aksiyon o pagkilos, madali niyang nasosolusyunan nang epektibo at mabisa ang anumang suliranin o problema na kanyang kinakaharap.

Gayunman, dahil ilkas na makasarili at egoistic, kadalasan ay hindi niya pinapansin ang problema at sularanin ng iba at sakali mang hihingi ka ng payo sa isang Unggoy, tiyak na papayuhan ka nito ng isang mabilisang solusyon sa kahit anong iyong pinoproblema. Dahil para sa kanya, hindi na dapat pahabain at palakihin pa ang problema at sa halip, dapat itong sinosolusyunan agad. Kaya naman karamihan sa tulong ng Unggoy sa kanyang mga kaibigan at kasama ay hindi gaanong napapansin, dahil sa anumang pagtulong na kanyang ginagawa, kulang na kulang ang isang Unggoy sa concern, pagkalinga at pag-aalala.

Sa negosyo, pangangalakal at mareyal na bagay, madaling magkapera at gumawa ng pera ang isang Unggoy. At kapag siya ay nagkakaroon ng salapi o suwerteng pang-materyal, asahan mong ito ay hindi isa-isa kundi sunod-sunod pa.

Samantala, kung matutunan lamang ng Unggoy na mag-ipon, isaalang-alang at paghandaan ang kanyang future, tiyak na siya ay yayaman nang yayaman, hanggang makaipon ng maraming-maraming materyal na bagay.

Ngunit kung patuloy na magiging bulagsak at easy-go-lucky na attitude ang palaging paiiralin na isang likas na ugali ng Unggoy, tulad ng dating mayaman, malamang na saglit lang niyang mararanasan ang kasaganaan at tuloy-tuloy na ulit siyang masimot at maghirap.

Dagdag pa rito, sinasabi ring dahil sa husay at galing magsalita ng Unggoy, may mabilis na isip at palaging positibo sa kanyang buhay. Bagay na bagay sa isang Unggoy ang gawaing may kaugnayan sa stockbrokers, pagbebenta ng anumang bagay at puwede rin sa kanya ang maging isang lawyer o diplomat.

Sinasabi rin na kung magkakaroon ng malaking layunin at seseryosohin ng Unggoy ang pagpapayaman at pagpapalago ng kabuhayan, walang duda na bago pa siya isinilang, itinakda na sa kanya ng langit ang isang asensado at mayamang-mayamang pamumuhay.

Itutuloy

Year of the Monkey, ‘di puwedeng lamangan dahil gaganti ng doble

ni Maestro Honorio Ong - @Forecast | May 18, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Monkey o Unggoy ngayong Year of the Metal Ox.

Kung ikaw ay isinilang noong 1932, 1944, 1956, 1968, 1980, 1992, 2004, 2016 at 2028, ikaw ay naiimpluwensiyahan ng animal sign na Unggoy.

Sinasabing kilala rin ang Unggoy na sobrang nagmamadali dahil gusto niyang gastusin agad ang mga araw ng kanyang buhay sa pagsasaya at pagnanais na makita agad ang resulta ng anumang proyekto o aktibidad na nais niyang gawin. Dahil dito, kadalasan ay napagbibintangan siyang reckless o walang ingat, na nagiging dahilan kaya hindi niya gaanong nape-perfect o napapaganda nang lubusan ang bawat proyekto o gawain na inaatang sa kanyang balikat. Kumbaga, bagama’t madali niyang natatapos, hindi naman gaanong kagandahan o kulang sa pulido at kislap ang kanyang mga likha. Sinasabing kung pagtutuunan ng Unggoy ng kaunti pang konsentrasyon at pagsisinop ang anumang gawaing iaatang sa kanya, makabubuo siya ng isang mabilis pero dakilang likhang sining na magbibigay sa kanya ng dagdag pang pagkilala at karangalan.

Dagdag pa rito, bukod sa pagiging praktikal at matalino, malawak din ang pang-unawa ng isang Unggoy, kaya anumang problema ang idudulog mo sa kanya, tiyak na tutulungan ka niya agad. Ang problema lang, dahil madalas na nagmamadali at nais niyang solusyunan agad ang suliranin sa praktikal na paraan, malabo kang makita ng matiyagang Unggoy na nakikinig o nakikisimpatya sa inyong suliranin. Sa halip, ang mas nais ipagawa at ipayo sa iyo ng isang Unggoy ay ‘wag kang magmukmok sa isang sulok at umarte, tumindig ka at solusyunan mo na agad ang iyong problema. Wala kasing tiyaga ang isang unggoy na makinig ng mga maramdaming kuwento o pagbibida. Dahil kapag ganu’n na ang usapan, madaling naiinis ang Unggoy at tiyak na bagama’t hindi nagpapahalata ay unti-unti ka na lang niyang tatakasan at lalayuan upang hindi siya masangkot sa iyong drama sa buhay.

Kaya tulad ng nasabi na, kung may kaibigan kang Unggoy at nilapitan mo siya, sosolusyunan niya ang iyong problema sa isang idlap, pero ‘wag mo na siyang dramahan o unti-untiin pa para tulungan ka niya. Dahil para sa Unggoy, ang anumang suliranin ay dapat solusyunan agad nang masaya at wala nang kadramahan pa.

Sinasabi ring ang ayaw na ayaw ng Unggoy na lokohin at paglalangan siya. Dahil likas na mautak, matalino at praktikal, kumbaga, ang ugali niya ay ayaw niyang makikita sa mga taong nakakasalamuha niya — lalo na ‘yung pantutuso o panggugulang— dahil likas na tuso, magulang at wais ang isang Unggoy, ayaw niyang magugulangan at maiisahan siya, lalo na ng kanyang mga kaibigan, kasama sa bahay at maging kasosyo niya sa negosyo.

Kaya anumang uri ng pakikipagtransaksiyon, ‘wag mong susubukang lamangan o isahan ang isang Unggoy. Kapag ginawa mo ito sa kanya at nahalata niyang sinadya mo siyang lamangan o lokohin, gagantihan at pagpaplanuhan ka ng Unggoy, kung saan ikaw naman ang susunod niyang lalamangan at iisahan. At magugulat ka, mas malaki o doble ang ilalamang at dadayain sa iyo ng isang mautak at sobrang tuso na Unggoy.

Itutuloy

Mga taong walang “K”, laging tinutulungan ng Sheep kahit inaaway

ni Maestro Honorio Ong - @Forecast | April 27, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Sheep o Tupa, na tinatawag ding Goat o Kambing ngayong Year of the Metal Ox.

Kung ikaw ay isinilang noong taong 1931, 1943, 1955, 1967, 1979, 1991, 2003, 2015 at 2027, ikaw ay naiimpluwensiyahan ng animal sign na Sheep o Tupa at tinatawag ding Goat o Kambing.

Ayon sa mga sinaunang Chinese, isa ang Tupa o Kambing sa pinakamapalad na animal sign dahil ang nakatakda sa kanya ay kahit hindi gaanong magpakahirap o magsipag, dahil mabait siya at may mabuting kalooban, ang langit ang nagpo-provide ng lahat ng kanyang mga pangangailangan. Kaya naman kung makakita ka ng isang Kambing o Tupa na mabait, masikap at masipag, tiyak na siya ang Tupa na yayaman, dahil bukod sa sadyang binibigyan naman talaga siya ng langit ng lahat ng kanyang mga pangangailangan ay nadaragdagan pa niya ito sa sarili niyang pagsisipag at pagsisikap. Kaya naman sinasabing kung matututong mag-ipon ang isang Tupa o Kambing para sa future bago magbigay nang mabigay, tiyak na siya ay yayaman.

Ang problema lamang isang Tupa o Kambing, tulad ng nasabi na, masyado siyang mabait at palabigay, lalo na sa kanyang mga kamag-anak at mga taong alam niyang labis na naghihirap, kung saan kahit gusto talaga niyang yumaman ay dapat niya itong kontrolin o hinay-hinay lang sa pagiging matulungin at mapagbigay. Dahil minsan, pati ang mga taong hindi karapat-dapat bigyan at tulungan ay nabibigyan pa niya kung saan sa bandang huli, siya pa ang pinapalabas na masama at inaaway.

Sa pakikipagkaibigan at pakikisalamuha sa kapwa, ang Tupa o Kambing ay masarap na kaibigan dahil kapag namomroblema ka, tiyak na ikaw ay ico-comfort, dadamayan at aasikasuhin niya. Kumbaga, madarama mo talaga ang simpatya at pagmamahal niya sa iyo na para bang siya na ang namumroblema para sa iyo.

Ang Tupa o Kambing ay masarap ding magmahal, nakikinig sa iyong mga problema at mahusay din siyang mag-advice. At hindi lang pagpapayo ang ginagawa niya, bagkus, kung siya lang ang masusunod, mararamdaman mong siya na ang mag-isang magbibigay-solusyon sa iyong problema.

Sa pag-ibig, ang Tupa o Kambing ay itinuturing na hopeless romantics dahil grabe at matindi talaga siya kung umibig. Kapag minamahal niya ang isang tao, tapat niyang mamahalin ito. Sadya ring maalalahanin ang isang Tupa sa panahong may okasyon o selebrasyon kung saan, hindi puwedeng hindi ka niya regaluhan o batiin man lang. Kaya kung magiging karelasyon o asawa mo ang isang Tupa o Kambing, tiyak na kapag nasa bahay kayo o saanman lugar, habang kayo ay nagsasama, damang-dama mo ang kanyang pagmamahal at pang araw-araw na presensya.

Ganundin sa pamilya, kung saan labis-labis na pinahahalagahan ng isang Tupa ang kanyang pamilya dahil para sa kanya, pamilya ang dapat bigyan ng higit na prayoridad kaysa sa anumang bagay.

Kaya sinasabing para sa Tupa o Kambing, ang tunay at wagas na ligaya sa mundong ito ay masusumpungan lamang sa isang nagkakasundo, nagmamahalan at masayang pamilya, na ‘yun naman ang talagang hinahangad at madalas na nangyayari sa buhay at kapalaran ng isang Tupa.

Itutuloy