Isinilang sa Year of the Rooster, magaling mag-analisa ng bagay kaya mabilis solusyunan

ang mga problema.

ni Maestro Honorio Ong - @Forecast | June 05, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Tandang o Rooster ngayong Year of the Metal Ox.

Kung ikaw ay isinilang noong taong 1945, 1957, 1969, 1981, 1993, 2005, 2017 at 2029, ikaw ay naiimpluwensiyahan ng animal sign na Tandang o Rooster.

Bukod sa ugaling organisado at perpeksiyunista, kilala rin ang Tandang sa pagiging matapang at matalino. Kaya naman sa anumang laban ng buhay, ang Tandang ay hindi basta-basta umaatras o sumusuko. Sa halip, matapos niyang isipin at timbangin ang isang paraan, sa paghugot ng kanyang espada at pagsugod, tiyak ang kanyang pananaig at pagtatagumpay.

Dagdag pa rito, isa rin sa pangunahing mahusay na ugali ng Tandang ay ang pagma-manage ng mga taong kanyang nasasakupan kung saan madali niyang nakukumbinse at nauutusan ang mga taong nakapaligid sa kanya. Kaya naman sinasabing ang isa sa pinakamagandang trabaho o propesyon para sa isang Tandang ay ang pagiging manager sa isang kumpanya o korporasyon. Puwede rin sa kanya ang pamumulitika o leader na siya ang hahawak ng malaking grupo ng mga tao na tiyak namang mapapasunod niya at mama-manage niya nang maganda at maayos.

Napakahusay din ng Tandang na mag-analisa ng mga bagay, kaya madali niyang nasosolusyunan ang anumang mahirap na problema at pasubok. Sa pakikipagdebate, sobrang lawak din ng kanyang isip at pinagkukunan. Ang problema lang, kapag tiyak siyang tama ang isang bagay na kanyang pinaninindigan, hinding-hindi niya babaguhin ang prinsipyo o paniniwala na kanyang napanghawakan.

Sa asta at pagkatao, madali mong makikilala ang Tandang dahil ang porma niya ay palaging buo ang loob, malaki ang tiwala sa sarili at simpatiko. Ito ang pagpapakilala niya sa kanyang sarili sa lipunan at ito rin ang mukhang inihaharap at ipinakikita niya sa mundo. Kaya naman binihirang-bihira kang makakita ng Tandang na malungkutin at lupaypay ang balikat. Dahil tulad ng isang matikas na Tandang, palaging buo ang loob at may pagmalalaki niyang hinaharap ang mga tao at mundo na kanyang ginagalawan.

Nagagawa ng Tandang ang ganito kakisig at kahusay na tindig dahil ang totoo nito, sa bawat paggising niya, nagtataka rin siya sa kanyang sarili kung saan palaging punumpuno ng istamina, reserbang lakas at positibong pananaw ang pang-araw-araw na buhay ng isang Tandang.

Sinasabing kung ang lahat ng magagandang katangiang ito ng isang Tandang ay gagamitin niya sa negosyo at pagpapayaman, tiyak na makabubuo ng siya ng isang sobrang sopistikado, de-kalidad at napakayamang emperyo.

Itutuloy

Rooster, kailangang malinis at presko ang paligid para makahatak ng suwerte

ni Maestro Honorio Ong - @Forecast | June 01, 2021

Sa nakaraang mga isyu, tinalakay natin ang pangunahing ugali at sadlakang kapalaran ng animal sign na Unggoy o Monkey ngayong Year of the Metal Ox.

Sa pagkakataong ito, ang pangunahing ugali at sadlakang kapalaran naman ng animal sign na Tandang o Rooster ang ating tatalakayin.

Kung ikaw ay isinilang noong taong 1993, 1945, 1957, 1969, 1981, 1993, 2005, 2017 at 2029, ikaw ay naiimpluwensiyahan ng animal sign na Tandang o Rooster. Ang Tandang ay siya ring zodiac sign na Virgo sa Western Astrology na may ruling planet na Mercury.

Sinasabing ang Tandang ay natural na papalarin mula alas-5:00 ng hapon hanggang alas-7:00 ng gabi, habang ang mapalad naman niyang direksiyon ay ang timog (south) at timog-silangan (south-east).

Sinasabing higit na madaldal, aktibo at kilala rin sa pagiging pala-pintas ang Tandang na isinilang sa panahon ng tag-init o tag-araw kung ikukumpara sa kapatid niyang tandang na ipinanganak sa tag-ulan o tag-lamig.

Isa sa pangunahing ugali ng Tandang ay ang pagiging palaayos, kaya ayaw na ayaw niyang hindi nakaayos ang mga bagay sa kanyang paligid. Bagama’t gustong-gusto niyang ayusin ang lahat ng bagay, lalo na sa opisina o lugar na kanyang pinagtatrabahuhan, madalas matagpuang maraming kalat at abubot ang silid ng Tandang, na nahihirapan siyang tanggalin o itapon dahil ito ay nagkakaroon sa kanya ng sentimental value.

Subalit sinasabing kung magagawa ng Tandang na pikit-matang itapon o ipamigay na lang kaysa hintayin pa ang bakal-bote sa mga abubot na naipon at nagawa niyang mapaaliwalas ang kanyang silid at kapaligiran, kapag malinis ang kapaligiran ng isang Tandang, mas magiging presko ang kanyang pakiramdam. Ang preskong pakiramdam na ito ang hahatak ng suwerte at magagandang kapalaran sa buhay ng Tandang, lalo na sa panahong ito ng Metal Ox na sadyang katugma at ka-compatible ng Tandang.

Bukod sa pagiging organized, kilala rin ang Tandang sa pagiging perfectionist, kung saan ayaw na ayaw niyang makakita ng mali o maliit na kapintasan. Dahil dito, maraming proyekto o gawain ng Tandang, na imbes matapos agad at pagkaperhan na ay nabibinbin pa ng mahabang panahon sa kanyang lamesa dahil pinipilit niyang tanggalin ang maliit ang kamalian.

Sinasabing kung matutunan lamang ng isang Tandang na hindi maging perfectionist at masyadong metikoloso sa kanyang proyeto o layunin, kumbaga, ‘pag ipinasa agad ang isang proyektong natapos na at ‘wag nang busisiin nang pagkatagal-tagal, mas maraming tagumpay, pag-unlad at ligayang matatamo ng Tandang, gayundin, mas madali siyang uunlad at yayaman ngayong 2021.

Itutuloy

Year of the Monkey, susuwertehin habang nagma-mature

ni Maestro Honorio Ong - @Forecast | May 27, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Monkey o Unggoy ngayong Year of the Metal Ox.

Kung ikaw ay isinilang noong 1932, 1944, 1956, 1968, 1980, 1992, 2004, 2016 at 2028, ikaw ay naiimpluwensiyahan ng animal sign na Unggoy.

Ipinapangako ng taong ito sa isang Unggoy ang pagbubukas ng maraming bagong oportunidad upang lalo pang tumatag at mahinog ang iyong pagkatao. Habang nagma-mature at natututo sa mga nakaraang karanasan, kasabay nito ang tuluy-tuloy na pagdating ng iba’t ibang uri ng suwerte at magagandang kapalaran, higit lalo sa kalagitnaan ng taong 2021.

Magsisimulang magbigay ng bagong ngiti at galak ang langit sa Hulyo at tuluy-tuloy na ito hanggang sa susunod na buwan ng Agosto hanggang sa sumapit ang Christmas 2021, kung saan sa huling quarter ng taon, magiging abala ka sa pamumulot ng suwerte na inihulog ng langit na nagkalat sa iyong mga dinadaanan.

Bagama’t may mga pagsubok pa ring darating sa taong ito, hindi na kasing tindi ng nakaraang taon. Sa halip, kung noong nakaraang taon ay hadlang sa mga plano mo ang nasa itaas, ngayong 2021, langit ang kikilos upang isa-isang hawiin ang mga balakid sa iyong daraanan. Kaya naman ‘pag nagpatuloy kang nagsisikap, matatag at hindi sumusuko, sa bandang huli ay makakamit mo rin ang tagumpay sa lahat ng nais at balakin mo sa buong taong ito ng 2021.

Samantala, pinaaalalahanan ka rin na ngayong 2021, ang akala mong suwerte sa umpisa na aabutin mo na lang sana ay bigla pang maraming kokontra, na tila iisipin mo na namang hindi yata pumapabor ang kapalaran sa iyong mga kagustuhan. Pero hindi naman ganu’n, sa halip ay nagkakamali ka ng akala dahil ang totoong mangyayari, hindi sa iyo ipagkakaloob ng langit ang bagay na gustung-gusto mo. Ngunit kaya nangyari ‘yun ay dahil may mas malaki at magandang surpresa sa iyo ang nasa itaas na magiging dahilan upang lalo ka pang umulad, yumaman at maging maligaya.

Ang assignment mo lang, anuman ang mawala sa iyo ngayong taon, hindi ka dapat manghinayang dahil tulad ng kuwento ni Job sa Bible, nawala ang lahat ng kanyang mga anak at kabuhayan, ngunit sa isang iglap, pinalitan ng Diyos ng mas magagandang anak at masaganang kabuhayan ang mga bagay na nawala sa kanya.

At tulad ng nasabi na, basta palagi kang magtiwala sa nasa itaas, nakatakda kang magkamit sa kalagitnaan ng taon ng kasaganaang pangmateryal at kakaibang ligaya at aspetong pandamdamin na, magpapakilig sa iyo sa buong Year of the Metal Ox.

Itutuloy