Year of the Dog, posibleng magkapamilya kahit ‘di pa ready ngayong 2022

ni Maestro Honorio Ong - @Forecast | April 26, 2022

Sa pagpapatuloy ng Forecast 2022, tatalakayin natin ang pangunahing ugali, katangian at kapalaran ng animal sign na Dog o Aso ngayong Year of the Water Tiger.

Kung ikaw ay isinilang noong 1946, 1958, 1970, 1982, 1994, 2006 at 2018, ikaw ay mapabibilang sa animal sign na Dog o Aso.

Ngayong taon, sinasabing maraming magagandang oportunidad at bagong kakilala na magdadala ng dagdag pang suwerte at magagandang kapalaran sa Aso. Kaya ang kailangan niyang gawin ay maglalabas ng bahay upang mas madaling masagap ang suwerte at magagandang kapalaran na inilaan sa kanila ng langit ngayong Year of the Water Tiger.

Tinataya rin na magkakaroon sila ng bagong sirkulo ng mga kaibigan at samahan, na sigurado namang magdadala sa kanya ng dagdag na suwerte at magagandang kapalaran.

Kaya kung may mag-aalok sa Aso na sumali sa isang samahan o kaibigang magpapakilala sa kanila sa mga bago pang kaibigan, tulad ng nasabi na, sa mga ganitong sitwasyon ay makatatanggap at magtatamo siya ng mas marami pang magagandang kapalaran, lalo na sa larangan ng damdamin at materyal na bagay.

Kaya kung matututunan ng Aso na lumabas sa kanyang “comfort zone”, at kapag nawala na sa buhay nila ang pagdadalawang-isip, takot o pag-aalinlangan, sa halip ay labas nang labas at sugod nang sugod sa mga oportunidad na dumarating, tatanggap siya ng walang humpay na biyaya na noon pa inilaan ng langit sa kanya.

Hindi rin dapat makalimutan na dahil sa panahong ito ay panahon ng politika o halalan, tunay ngang ngayon na rin darating sa Aso ang pagkakataong magkamal ng maraming-maraming salapi, na kung iingatan o gagawin niyang puhunan, ito na rin ang pagkakataon upang siya ay makapagsimula ng negosyo na magpapayaman sa kanya nang bongga.

Samantala, sa pag-ibig at pakikipagrelasyon, magkakaroon ng “variety” o sari-saring kulay ang mga ugnayan at karanasang mapapasukan ng Aso. Kabilang sa makukulay na karanasan ay ang masasalimuot, ngunit masasarap na romansa nag mag-a-uplift ng kanyang kaluluwa at pagkatao.

Kaya naman habang tumataas nang husto ang sulak ng libido, kung hindi mag-iingat, ang Aso ay maaaring masuot sa hindi inaasahang pagbubuntis. Maaari ring maganap ang hindi pinaghandaang pag-aasawa, kaya ngayong 2022, maghinay-hinay ka at dapat lagyan mo ng disiplina at matinding pagpipigil ang iyong sarili, lalo na sa larangan ng sex at pag-ibig sa buong taon, partikular sa mga buwan ng Agosto hanggang Nobyembre.

Dahil dito, ipinapayo na ang dapat mo pa ring iprayoridad sa taong ito kung hindi ka pa handang mag-asawa o magpamilya ay ang pagpapayaman. Sa ganu’ng paraan, ‘pag higit mong binigyang-pansin ang materyal na bagay, tuloy-tuloy na aangat ang graph ng aspetong pangkabuhayan sa iyong kapalaran hanggang ikaw ay tuluyang yumaman.

Bukod sa kulay na all shade of green, mapalad din ang Aso sa kulay na red o pula. Kung nais mo namang makipagsapalaran sa anumang uri ng number games, maaaring subukan ang kumbinasyon ng mga numerong, 6, 12, 18, 22, 29 at 39, ganundin ang mga numerong 3, 24, 27, 33, 45 at 54, higit lalo sa mga araw ng Martes, Huwebes at Biyernes.

Kusa namang iigting ang mabuting kapalaran ng Aso sa buong taon mula sa ika-18 ng Mayo hanggang sa ika-21 ng Hunyo, mula sa ika-18 ng Setyembre hanggang sa ika-30 ng Nobyembre.

Itutuloy

Isinilang sa Year of the Dog, dapat maging showy para sumaya ang love life

ni Maestro Honorio Ong - @Forecast | April 23, 2022

Sa pagpapatuloy ng Forecast 2022, tatalakayin natin ang pangunahing ugali, katangian at kapalaran ng animal sign na Dog o Aso ngayong Year of the Water Tiger.

Kung ikaw ay isinilang noong 1946, 1958, 1970, 1982, 1994, 2006 at 2018, ikaw ay mapabibilang sa animal sign na Dog o Aso.

Sa career at hanapbuhay, bagay sa Aso ang propesyong may kaugnayan sa lawyer, labor leader, union organizers, social worker at iba pang mga gawaing may kaugnayan sa lipunan. Dahil ang mga ito ay ikatatagumpay at ikaliligaya ng Aso ‘pag ang mga ito ay kanyang inaaturga. At dahil sa taglay na pagiging mabuti at palaging inuuna ang moralidad, ang mga Aso ay sinasabi ring pangunahing kandidato sa pagiging bayani, martir at santo o santa.

Sa pakikipagrelasyon at pakikisalamuha sa pamilya, gustong-gusto ng Aso ang pagiging independent o malaya, kaya kadalasan ay hindi mo siya matatagpuang nasa bahay lamang, sa halip, ang nais niya ay maglakbay nang maglakbay at mamasyal sa magaganda at kaakit-akit na lugar, lalo na ang mga lugar na malapit sa kalikasan.

Samantala, kapag umiibig ang Aso, siya ay sobrang magmahal na minsan ay nagiging dahilan upang siya ay mabulag sa pag-ibig, magpakamartir o magpakabayani, alang-alang sa kanyang mga minamahal. Kumbaga, pagdating sa pag-ibig, ang Aso ay madalas maloko sa kanyang object of desire.

Dagdag pa rito, bagama’t sobra kung magmahal, hindi naman siya masyadong demonstrative, kumbaga, hindi siya showy, kaya minsan, ang pag-ibig niya ay hindi gaanong pinahahalagahan ng taong kanyang minamahal. Ngunit kung magiging showy o “demonstrative” siya sa larangan ng pag-ibig, sex at ugnayan, walang pagdududa na sa pakikipagrelasyon, mas madali niyang makakamit ang panghabambuhay na sarap at ligaya.

Sa pag-ibig, hindi siya mandaraya. Kung gaano nagiging tapat at totoo ang kanyang karelasyon, higit pa ru’n ang igaganti niyang pagmamahal sa kanyang kasuyo.

Bagay na bagay naman sa Aso ang Tigre at Kabayo dahil ang ganitong relasyon ay tiyak na magiging maligaya at panghabambuhay dahil pare-pareho silang tapat at masarap magmahal.

Bukod sa Tigre at Kabayo, tugma rin sa Aso ang mabait na Daga, ang matalinong Ahas, at ang tusong Unggoy, ang mahilig na Baboy at ang kapwa niya malihim na Aso, kung saan ang ganitong relasyon ay babalutin naman ng walang kahulilip na lambingan at sila rin ay itatala bilang masaya at okey na magkakasama.

Habang ang madalas namang matagpuang habambuhay na nagmamahalan at itinatala ang relasyon na walang iwanan ay ang Aso at Kuneho, kung saan lihim at matagal na palang hinahangaan ng Kuneho ang Aso na noon niya pa pangarap makasama. Habang ang Aso naman ay hangang-hanga rin sa pagiging tahimik, mapagpakumbaba at kapareho niyang matalino at palaging nangangarap na Kuneho.

Itutuloy

Isinilang sa Year of the Dog, todo-kilatis sa mga tao pero sobrang loyal sa mga kaibigan

ni Maestro Honorio Ong - @Forecast | April 19, 2022

Sa pagpapatuloy ng Forecast 2022, tatalakayin natin ang pangunahing ugali, katangian at kapalaran ng animal sign na Dog o Aso ngayong Year of the Water Tiger.

Kung ikaw ay isinilang noong 1946, 1958, 1970, 1982, 1994, 2006 at 2018, ikaw ay mapabibilang sa animal sign na Dog o Aso.

Ang Dog o Aso ay Libra sa Western Astrology at nagtataglay ng ruling planet na Venus. Sinasabing higit na matapang, buo ang loob at agresibo ang mga Aso na isinilang sa hating-gabi kung ikukumpara sa mga Aso na isinilang sa umaga o tanghaliang tapat.

Kilala ang Aso sa pagiging makatarungan at mahilig sumimpatya sa mga inaapi at mahihirap, lalo na sa mga underdog, kaya kadalasan, napagkakamalan silang likas na mabait at may pagkapulitiko.

Sa career at propesyon, ang Aso ay kilala rin sa pagiging tapat at maaasahan, lalo na ng kanilang mga amo o sinumang nakatataas sa kanila. Kaya kapag ikaw ay may tauhan o empleyadong isinilang sa Year of the Dog, umasa kang dahil sa pagiging tapat, kasipagan at pagiging dedikado nila sa trabaho, ang inyong kumpanya ay siguradong uunlad at aasenso.

Ganundin sa pamamahala sa tahanan, kung saan ‘pag ang misis mo ay isinilang sa animal sign na Dog, malamang na ang inyong pamilya ay tuloy-tuloy na uunlad at magiging maligaya, habang ang iyong mga anak at ang inyong tahanan ay inaasikaso ng mapag-arugang Aso.

Sa pakikipagkaibigan, sinasabing hindi mo basta makukuha ang tiwala ng Aso, dahil bago ka niya maging bestfriend, kikilalanin ka muna niya nang mabuti bago niya ipagkatiwala ang loob niya sa iyo. Subalit kapag naging kaibigan mo siya, tulad ng nasabi na, siya naman ay magiging mabuti at tapat sa iyo habambuhay.

Sa panahon namang magkaibigan na kayo ng Aso, ‘wag na ‘wag mo siyang lokohin dahil ikaw ay tiyak na sasakmalin niya at sa kanyang paghihiganti, magugulat ka dahil sa hindi mo inaasahang sandali, mas magiging mapusok ang gagawin niyang paghihiganti sa iyo.

Gayundin, ang Aso ay madalas na nagdadalawang-isip at imbes na kumilos siya, nakakahadlang ang pagdadalawang-isip na ito upang magawa niya ang mga bagay na kanyang pinaplano.

Ang pag-aalinlangan at pagdadalawang-isip ang nagiging hadlang, kaya ang Aso ay napagkakamalang medyo tamad at nagde-day dreaming lamang maghapon, pero ang totoo, nalilito lang talaga siya kung ano ang dapat gawin.

Samantala, sinasabing kapag naiwasan ng Aso ang pagdadalawang-isip at sa halip ay aksiyon agad ang ginawa niya, walang duda na ang pag-unlad, tagumpay at ligaya ay mapapasakanya, hindi lang sa taong ito ng 2022 kundi maging sa buhong buhay niya.

Itutuloy