Isinilang sa year of the dragon, minsan lang magtiwala at mainlab pero panghabambuhay na

ni Maestro Honorio Ong @Forecast | January 14, 2023

Ipagpatuloy natin ang pagtalakay sa mga pangunahing katangian at kapalaran ng animal sign na Dragon ngayong Year of the Water Rabbit.

Ang Dragon ay silang mga isinilang noong 1928, 1940, 1952, 1964, 1976, 1988, 2000, 2012 at 2024.

Sa pag-ibig at emosyon, bihira sa mga Dragon ang nagtatago ng damdamin, sa halip, sila ay matatawag na “Si totoo lang”. Kaya kung napusuan ka ng Dragon, walang pagkukunwari o totoong-totoo ang nadarama niya sa iyo. Ang problema lamang, hindi rin naiiwasan ng Dragon ang magpabago-bago ng isip at damdamin, na nagiging dahilan kaya gumugulo at nauusyami ang masayang love life na nakatakda nilang maranasan.

Samantala, sa kabila ng pagiging tahimik at mapag-isa ng mga Dragon, sa mura nilang edad, kadalasan ay nai-in love agad sia, kaya hindi pipigilin ang matinding udyok ng bugso ng damdamin at may posibilidad na maaga silang makapag-asawa.

Ang isa pang totoo sa ugali ng Dragon, kapag umibig sila ay minsan lang, kaya kung hindi nila makakatuluyan ang kanilang first love, mas malamang na buruhin na lang nila ang kanilang sarili, hanggang sa tumandang binata o dalaga at mamuhay nang mag-isa habambuhay.

Dagdag pa rito, minsan lang din silang magtampo o magalit sa kanilang minamahal, subalit ang minsang ito ay maaaring pangmatagalan o panghabambuhay na. Kaya kapag nagkasala ka sa isang Dragon, malamang na hindi na niya ito makalimutan kailanman at kung sakaling patawarin ka niya, malabo nang bumalik pa ang pagtitiwala niya sa iyo.

Samantala, iba rin kung mangarap ang isang Dragon, dahil bagama’t malayo sa katotohanan kung titingnan ng ibang tao, ang matataas at kakaibang pangarap na ito ng mga Dragon, at kahit sabihin pang kasingtaas ng kastilong buhangin, nakapagtatakang nagagawa nila itong maisakatuparan, hangga’t ang kanyang magiging kapareha o partner sa buhay ay maniniwala sa kanya. ‘Yun lang ang kailangan ng Dragon — ang maniwala sa kanya ang kanyang minamahal na ang lahat ng bagay, kahit imposible ay siguradong magagawa at maipatutupad ng makapangyarihang Dragon.

Sa pakikipagrelasyon at pakikisalamuha sa kapwa, gusto-gusto ng Dragon na siya ay napapakinabangan o palagi siyang tumutulong. Halimbawa, nag-team building o namasyal ang barkada ngayong summer vacation, siguradong isa ang Dragon sa aligagang naghahanda ng pananghalian habang ang kanyang mga kasama ay nagsu-swimming na sa dagat.

Kaya kapag nakuha mo ang loob ng isang Dragon, tulad ng nasabi na, mapagkalinga at mapagmahal siya. At dahil minsan lang siya magmahal, magtiwala at makipagkaibigan, ang minsang ito ay seryoso, totoo at todong-todo na. Gayunman, kapag nabigo ang Dragon, halimbawa ay binigo ng kaibigan, mangingibig o tadhana, tiyak na siya ay malulungkot nang sobra at maaaring hindi na makapag-move on. At kung sakali mang iibig muli, hindi na kailanman magiging maligaya ang Dragon na minsan nang nabigo.

Samantala, tugma naman sa Dragon ang tuso, mapang-akit at matalinong Unggoy. Kapwa naman magiging masaya at mabunga ang relasyong Dragon at Daga. Maging sobrang close naman sa isa’t isa at habambuhay na magiging magkaibigan ang Ahas at ang Dragon. Hindi naman tugma ang Dragon at Aso, ganundin ang Baka at Dragon, habang ang relasyong Dragon at Dragon ay may pangako rin ng maunlad, maligaya at panghabambuhay na pagsasama.

Itutuloy

Masinop na asawa, dapat makatuluyan ng isinilang sa Year of the Dragon para umasenso

ni Maestro Honorio Ong @Forecast | January 12, 2023

Ipagpatuloy natin ang pagtalakay sa mga pangunahing katangian at kapalaran ng animal sign na Dragon.

Ang Dragon ay silang mga isinilang noong 1928, 1940, 1952, 1964, 1976, 1988, 2000, 2012 at 2024.

Bagama’t maraming kaibigan ang mga Dragon, hindi lahat ng kaibigan niya ay tunay dahil may mga huwad at manloloko rin siyang kaibigan. Pero batid ng Dragon kung sino ang mga tapat niyang kaibigan, kaya sa paglakad ng panahon, unti-unting nababawasan ang pakikipagkaibigan ng Dragon. Puwede ring sabihin na nagbabawas siya ng kaibigan, hanggang sa matira ang mga tapat at maaasahan na kaibigan.

Sa sandali namang nasuong sa panganib ang buhay ng kaibigan niya, dahil ang Dragon ay maawain at mapagkawang-gawa, siguradong ililigtas niya ang naturang kaibigan na nasa bingit ng kapahamakan kahit ang magiging kapalit nito ay ang sarili niyang kaligtasan.

Minsan ay ganundin naman ang attitude ng mga Dragon sa kanilang buhay at pakikipagsapalaran sa mundong ito— isinusugal ang kanyang kaligtasan kapag gustong-gusto niyang gawin o makamit ang isang bagay dahil bukod sa pagiging matulungin, ang mga Dragon ay nagtataglay din ng kakaibang tapang at pambihirang lakas ng loob.

Sabi nga, “The Dragon is sure to rush into those numerous places where even angels fear to tread.”

Dagdag pa rito, sinasabi ring bihira sa mga taong isinilang sa Year of the Dragon ang hindi nagtatagumpay sa anumang gawain na kanilang nakalokahan dahil sa unang araw pa lang ng kanilang pagsilang, binalot na sila ng langit ng suwerte at magandang kapalaran.

Ang problema lamang, bagama’t minsan ay may suwerte ang mga Dragon, ang pagkakataong ito ay kanilang nasasayang dahil naiuukol nila ang kanilang resources, husay at galing sa walang kapararakan o walang kabuluhang mga bagay.

Pero kung ang Dragon ay makakapag-asawa ng masinop na Daga o tusong Ahas na titipirin at itatago ang kanyang suwerte, tiyak na siya ay hindi lang yayaman kundi marami siyang maiipon at maipupundar na kabuhayan.

Hindi kasi puwedeng manatiling nag-iisa ang Dragon sa buhay o hayaan na lang siyang nagdedesisyon o nagma-manage ng kanyang kabuhayan dahil sa simula lang ito maganda, pero kapag tumagal ay sasayangin lang din niya ang materyal na bagay na darating sa kanya, hanggang sa bandang huli ay tuluyan din itong masimot at maubos.

Kaya ang matatag, masinop at nagpupundar para sa pamilya ang magiging papel ng kanyang mapapangasawa. Sa ganu’ng paraan, tatamasahin ng Dragon ang panghabambuhay na kasaganaan at ligaya, partikular sa aspetong pananalapi at materyal na bagay.

Sabi nga sa aklat na Chinese Elemental Astrology ni E.A. Crawford, “Although the Dragon is entrepreneurial and pioneering, his road to fortune is sure to be marked be both great success and spectacular failure.”

Ibig sabihin, bagama’t pinagkalooban ang mga Dragon ng kakaiba at pambihirang tagumpay, lalo na sa negosyo at materyal na bagay kung saan kahanga-hanga ang kanyang suwerte at magandang kapalaran, kapag sumablay, kagulat-gulat din ang pagbagsak ng kanyang kabuhayan.

Kaya tulad ng nasabi na, kung ikaw ay Dragon, maraming hindi inaasahang suwerte na darating sa iyong buhay, hindi lang maliit kundi malalaki talaga. Pero ang pinakamainam mong magagawa sa mga suwerteng ipagkakaloob sa iyo ng langit ay alagaan, tipirin at palaguin mo ang mga ito. Ibig sabihin, huwag mong aksayahin dahil sa ganu’ng paraan, tulad ng nasabi na, sa panahon ng iyong pagtanda ay mapapanatili mo ang asensado, marangya at masarap na pamumuhay sa piling ng iyong mga anak at magiging mga apo.

Samantala, sinasabing maraming lantad at lihim na tagahanga ang mga Dragon. Kumbaga, hindi lang likas na suwerte ang taglay ng kanilang personalidad kundi taglay din nila ang mapang-akit na awra, kaya maraming nagkakagusto sa kanila nang hindi naman nila gaanong pinapansin dahil minsan, ang Dragon ay may pagka-isnabera o suplada, pero sa kaibuturan ng kanilang mga puso, sila ay natural na mabait.

Karamihan din sa mga Dragon ay mahusay mangumbinsi kung gugustuhin talaga nila, kaya kahit ano ang ialok nila — halimbawa, nag-alok sila ng lupa na nasa gitna ng ilog, basta ginusto nila itong maibenta, tiyak na maibebenta nila ito at hindi lamang ‘yung lupa sa gitna ng ilog ang maipagbibili nila dahil makakabenta pa sila ng bangka.

Ang kahusayang ito sa pag-aalok ng Dragon ay maaari niyang magamit sa mga career na may kaugnayan sa pagkumbinsi sa mga tao tulad ng pulitiko. Puwede rin siyang maging trader, kung saan babaratin niya ang mga kalakal at maibebenta niya ito nang mahal. Gayundin, puwede sa kanya ang mag-ahente ng lupa at maging leader o humawak ng mga tao dahil tiyak na madali niyang mapapasunod ang mga ito sa kanyang mga plano o kagustuhan.

Itutuloy

Kapalaran ng animal sign na Dragon ngayong Year of the Water Rabbit

ni Maestro Honorio Ong @Forecast | January 10, 2023

Sa nakaraang mga artikulo, tinalakay natin ang pangunahing katangian at kapalaran ng animal sign na Rabbit o Kuneho ngayong Year of the Water Rabbit.

Kaya sa pagkakataong ito, ang pangunahing katangian at kapalaran naman ng animal sign na Dragon ang ating tatalakayin. Ang Dragon ay silang mga isinilang noong 1928, 1940, 1952, 1964, 1976, 1988, 2000, 2012 at 2024.

Ang Year of the Dragon ay pinaghaharian ng impluwensiya ng planetang Mars at sa Western Astrology, ito rin ang kumakatawan sa zodiac sign na Aries.

Pinaniniwalaang higit na mahusay at makapangyarihan ang Dragon na isinilang sa panahon ng tag-araw at tag-sibol kung ikukumpara sa mga isinilang sa panahon ng tag-ulan at tag-lamig. Sinasabi na kung ang Dragon ay isinilang sa panahon ng tag-lamig, asahan mong siya ay tutulog-tulog sa pansitan, kaya minsan ay tulog din ang kanyang kapalaran.

Tama, ang mga negatibong Dragon ay palaging inaantok, mahilig magpuyat kaya tanghali na kung bumangon, at tila kampante o walang pinoproblema sa buhay. Pero sa loob ng kanilang puso ay maaaring batid nilang may magandang kapalaran na nakalaan sa kanila kahit sila ay tutulog-tulog at tatamad-tamad.

Ang mga tulad nilang Dragon ang kinakatakutan dahil sa sandaling gumising siya, kasabay na gigising ang natutulog nilang malakas na kapangyarihan at napakagandang kapalaran.

Oo, kahit napapansin mo na minsan ay tutulog-tulog ang isang Dragon, ang totoo, mayroon siyang taglay na napakalaki at dakila na magandang kapalaran. Sa eksaktong salita, “Itinadhana sila ng langit sa dakilang kapalarang ito,” o sa mismong araw nang sila ay isinilang.

Kaya sadyang masarap magkaroon ng kaibigan, anak, magulang, kakilala, kapatid, kasama sa bahay, alagang Dragon o anumang Dragon na malapit sa iyong buhay. ‘Yan ay dahil batid mong biglang susuwertehin ang nasabing Dragon, anuman ang kalagayan n’yo sa buhay, at kapag biglang nagising ang natutulog na suwerte niya, dadagundong ang paligid dahil sobrang laki ng suwerte na kanilang matatanggap mula sa langit at tiyak na ang mga taong nakapaligid sa kanila ay maaanggihan at siguardong kanilang babalatuhan.

Ibig sabihin, kaya tutulog-tulog ang mga Dragon ay may napakalaking suwerte na naghihintay sa kanilang buhay at ang suwerteng ito, tulad ng nasabi na, ay sadyang matagal nang nakalaan sa kanila noong araw na sila ay isinilang sa mundo.

Ganito ang sabi sa librong Chinese Elemental Astrology ni E.A. Crawford hinggil sa sa kapalaran ng isang Dragon, “Those born under the animal sign of the Dragon are said to wear the horns of destiny.”

Ibig sabihin, nakasuklob sa pagkatao at kapalaran ng Dragon ang tadhana na kahit saan sila pumunta ay hinding-hindi magbabago dahil ito ay dala na nila mula nang araw na sila ay isinilang.

Dagdag pa rito, sinasabing bukod sa likas na nagtataglay ng kakaibang suwerte, ang mga Dragon ay mapagpumilit at may matalas na pandama, kung saan may kakayahan siyang damahin ang susunod na mangyayari o magaganap. Dahil dito, ang kakaibang talas ng intuition ng mga Dragon ang kadalasang nagliligtas sa kanila sa kapahamakan. Kaya naman pumoporma pa lamang ang mga manloloko sa kanilang harapan, nararamdaman na nila agad ang masamang motibo o balak ng mga taong nagbabalak ng hindi maganda sa kanila.

Sinasabing sa 12 animal signs na ipinatawag ni Lord Buddha sa kanyang palasyo, ang Dragon ay isa sa napakahirap utuin, utakan o lokohin, kumbaga, hindi mo siya basta-basta mabobola.

Gayundin, bukod sa pagiging suwerte, may reserbadong lakas, at may matalas na intuition, ang mga Dragon ay itinuturing ding nagtatalay ng katangian ng pagiging isang emperor. Ibig sabihin, ang angkin at likas niyang kapalaran at galing ay higit pa sa pagiging hari. Kaya naman noong sinaunang panahon, masaya at sadyang ipinagdiriwang ng buong angkan sa pagsilang ng isang Dragon sa kanilang pamilya.

Noong sinaunang panahon, itinuturing na suwerte ang Dragon, kung saan sa naturang panahon, ang mga magkasintahan ay pinipiling magpakasal sa Year of the Rabbit upang ang ipagbubuntis na sanggol ay isisilang sa Year of the Dragon. Ganundin ang mga mag-asawa, nagsisikap silang gumawa ng sanggol sa Year of the Rabbit upang ang iluluwal nilang sanggol ay matatapat ang kapanganakan sa Year of the Dragon.

Samantala, hindi lang pagiging emperor ang isa sa likas na katangian taglay ng Dragon dahil sinasabi rin na ang mga Dragon ay likas na matulungin at mapagmahal sa kanilang kapwa, lalo na sa mga inaapi ng tadhana at sa mga taong wala nang maasahan pa sa buhay.

Dahil dito, may panahon sa buhay ng Dragon na nauubos ang kanyang time at resources sa pagtulong sa kapwa nang wala naman siyang hinihintay na anumang kapalit sa ginagawa niya at walang pag-iimbot na pagtulong.

Kaya pala likas na matulungin at mapagmahal sa kanyang kapwa ang mga Dragon, lalo na sa mahihirap at kapos-palad dahil siya ay likas na malungkutin at madaling mabagbag ang puso at damdamin. Dahil sa pagiging maawain nilang ito, hindi nila namamalayan na ito ang nagtutulak sa kanila upang maubos ang kanilang kabuhayan — ang paggawa ng labis na kabutihan sa kanilang kapwa.

Kaya kung ikaw ay nakapag-asawa ng Dragon, dapat limitahan o rendahan mo rin ang ugali niyang mahilig magkawang-gawa at tumulong sa kanyang kapwa, lalo na kung ang salapi na para sa kanyang pamilya ay naitutulong niya pa sa ibang tao at sa kanyang mga kaibigan.

Itutuloy