Isinilang sa Year of the Horse na mabilis kumilos, mabilis ding yumayaman

ni Maestro Honorio Ong @Forecast | February 4, 2023

Ipagpatuloy natin ang pagtalakay sa mga katangian at magiging kapalaran ng mga isinilang sa animal sign na Horse o Kabayo ngayong Year of the Water Rabbit.

Ang Horse o Kabayo ay silang mga isinilang noong taong 1930, 1942, 1954, 1966, 1978, 1990, 2002, 2014, at 2026.

Ang isa pang hahangaan mo sa Kabayo ay gusto niya na nasa oras ang lahat ng bagay.

Kapag may lakad, gabi pa lang ay umaandar na ang isip at imahinasyon niya kung paano siya magiging on-time sa kinabukasan.

Maaari ring gabi pa lang ay maingat na maingat nang inihahanda ng Kabayo ang lahat ng kanyang mga dadalhin at kailangan sa masalimuot na pagtakas na gagawin niya kinabukasas. Kaya kadalasan, ang nagiging resulta kapag may mahalagang bagay na pupuntahan ang Kabayo, halimbawa ay outing, picnic o swimming, sa sobrang excited at dahil takbo nang takbo ang kanyang isipan, dinadatnan siya ng insomnia, hanggang sa pagtingin niya sa orasan o bintana sa kuwarto at pagmulat ng kanyang mga mata, umaga na at kailangan na niyang bumangon agad.

Dagdag pa rito, ang mga Kabayo ay itinuturing ding fast thinker o palaging advance ang takbo ng kanilang utak. Halimbawa, sa pagsasaliksik o research, kaunti pa lang ang ebidensya, mabilis na niyang naiisip na tama o tumpak ang kanyang ginagawa dahil mas nauuna ang kanyang personal na konklusyon kaysa sa dami ng mga datos na kanyang nakalap. Gayundin, dahil sa likas na talas ng kanyang intuition, tama ang kanyang iniisip at hinahaka, kaya sa 12 animal signs na humarap sa palasyo ni Lord Buddha, ang Kabayo ay isa sa itinuturing na matalinong nilalang.

Bukod sa matalino, ang Kabayo ay itinuturing ding “very expressive” at may kadaldalan. Kung saan, bida siya nang bida ng kanyang mga nalalaman at kapag halimbawang nakatabi mo siya sa isang pampasaherong bus at nakakuwentuhan mo siya, umasa kang hindi siya mauubusan ng kuwento hanggang sa makarating kayo sa kani-kanyang destinasyon ay hindi pa rin matapos-tapos ang kanyang pagbibida at kadaldalan.

Kaya kapag kasama mo ang Kabayo, siguradong hindi ka maiinip dahil tiyak na i-e-entertain ka niya sa pamamagitan ng kanyang mga kuwento, kung saan akala mo ay totoong-totoo, pero ang iba ru’n ay likhang isip lamang.

Sinasabi ring lahat ng mabibilis na bagay ay nasa katangian ng Kabayo. Ayon sa aklat na Chinese Elemental Astrology ni E.A. Crawford, et al., “The Horse loves action, he talks fast, he thinks fast and he moves fast.”

Kaya tulad ng nasabi na, walang bagay na mabagal sa kabayo, sapagkat kapag mabagal ang mga pangyayari, madaling nabo-bored o tinatamad ang Kabayo. Kapag nakakita ka ng Kabayo na babagal-bagal, umasa ka na maaaring siya ay bigo o hindi masyadong successful sa kanyang buhay. Sa kabilang banda, kapag nakakita ka ng isang Kabayong mabilis – mabilis maglakad, magsalita at mabilis sa lahat ng bagay, mas malamang na siya ay successful at maligaya sa buhay.

Kaya tandaang likas na sa Kabayo ang mabilis sa lahat ng bagay. Dahil dito, mabilis din siyang magmahal, makakapag-asawa at kapag talagang ginusto niya, mabilis din siyang yayaman.

Itutuloy

Walang kahirap-hirap... Isinilang sa Year of the Horse, tuloy-tuloy ang tagumpay habang nagma-mature

ni Maestro Honorio Ong @Forecast | February 2, 2023

Sa pagkakataong ito, tatalakayin naman natin ang katangian at magiging kapalaran ng animal sign na Horse o Kabayo ngayong Year of the Water Rabbit.

Ang Horse o Kabayo ay silang mga isinilang noong taong 1930, 1942, 1954, 1966, 1978, 1990, 2002, 2014, at 2026.

Ang Year of the Horse o Taon ng Kabayo ay pinaghaharian din ng impluwensya ng planetang Mercury at sa Western Astrology, ang Year of the Horse ay siya ring kumakatawan sa zodiac sign na Gemini.

Higit na tahimik, maunlad at maligaya ang mga Kabayo na isinilang sa panahon ng tag-araw kung ikukumpara sa mga Kabayo na isinilang sa panahon ng taglamig o panahon ng tag-ulan.

Ngunit sa pangkalahatan, pinaniniwalaan na dahil ang Kabayo ay takbo nang takbo at minsan ay naglalakbay at nagpaparoot-parito kung saan-saan, natatahimik at nagiging panatag lamang ang buhay ng Kabayo pagtuntong niya ng middle age.

Kaya kung ikaw ay Kabayo at napapansin mo na ang iyong buhay ay medyo magulo, pabago-bago ang takbo, hindi mapirmi sa maayos at masayang love life, isipin mo na ganu’n talaga ang buhay o kapalarang itinakda sa mga Kabayo. Pero siyempre, manalig ka pa rin na pagtuntong mo ng edad 35 hanggang 40, ang medyo magulo o hindi tahimik na kapalarang ipinagkaloob sa iyo ng tadhana ay unti-unti nang magbabago.

Lilinaw na ang dating malabong tubig sa batis, hanggang sa habang nagma-mature ka, maraming suwerte, tagumpay at magagandang kapalaran ang kusang ipagkakaloob sa iyo ng langit nang walang kahirap-hirap.

Kaya para sa mga Kabayo, hindi mahalaga ang tumakbo nang tumakbo sa arena ng buhay. Sa halip, ang mas mahalaga ay matuto kang maghintay at makuntento sa mga pangyayari at sitwasyong pang-araw-araw na ipinagkakaloob sa iyo ng tadhana. Oo, dapat makuntento at maging kampante ka habang nasasagupa mo ang mga buhol-buhol na karanasang ito.

Samantala, sinasabing ilan sa mga pangunahing hindi mapapasubaliang katangian ng Kabayo ay ang pagiging masiyahin, malaya, gala nang gala, hindi lamang ang pisikal na katawan pati na rin ang isipan, at higit sa lahat, irresistible o mahirap pigilin o mahirap hadlangan ang isang Kabayo.

Ang totoo pa nito, dahil irresistible ang isa sa mga pangunahing katangian ng Kabayo, sa sandaling ginusto talaga niya ang isang bagay, walang duda na makukuha niya ito nang bonggang-bongga.

Ang problema lamang sa katangian ng isang Kabayo, minsan ay wala naman siyang gusto, kumbaga, sa halip na magkagusto, palagi siyang naghahangad ng laya at lakwatsa o gala. Dahil dito, kadalasan ay napapabayaan niya ang mga dapat niyang iprayoridad sa buhay. Ang nakapagtataka pa sa isang Kabayo ay hindi naman siya nakakulong, pero gustong-gusto niyang makawala o gumala-gala, kaya ganundin ang kadalasang nagiging takbo ng kanyang isipan, pangarap, career, love life at ambisyon sa buhay – hindi kampante, hindi panatag. Bagkus, kung saan-saan napupunta at kumbaga sa nanunungkit sa mataas na puno ng kamatsile, ang layunin, ambisyon at pati love life ng Kabayo ay palaging nasasadlak.

Ibig sabihin, nasungkit mo na iyong kamatsile, imbes na mahulog at masapo mo agad, nasabit pa sa maliliit na sanga at dahon ng kamatsile, kaya hindi mahulog-hulog sa lupa upang ito ay tuluyan mong masapo at mapakinabangan.

Kaya sinasabi na kung matututunan ng Kabayo na mag-concentrate sa iisang bagay o layunin at kung mapipigilan niya ang kanyang isipan na sumuot kung saan-saan, sa halip ay itututok niya ito sa iisang solidong ambisyon, siya ay magkakaroon ng matagumpay at maligayang karanasan habambuhay.

Itutuloy

DOs & DOn’ts ng mga Snake Base sa taon ng kapanganakan

ni Maestro Honorio Ong @Forecast | January 31, 2023

Ipagpatuloy natin ang pagtalakay sa mga katangian at kapalaran ng animal sign na Snake o Ahas ngayong Year of the Water Rabbit.

Ang Snake o Ahas ay silang mga isinilang noong taong 1929, 1941, 1953, 1965, 1977, 1989, 2001, 2013, at 2025.

Kung ikaw ay Ahas na isinilang noong 1965, mas maganda kung ngayong 2023 ay mas magiging maingat ka sa lahat bagay, lalo na sa iyong kalusugan. Pinapaalalahanan ka ng langit na ingatan mo ang iyong kalusugan sa pamamagitan ng tamang pagkain, regular na ehersisyo at bawas-bawasan mo na rin ang mga gawaing may pressure, nakaka-stress at maging ang pagpupuyat. Tunay ngang maraming magaganda at positibong kapalaran na darating sa iyo ngayong Year of the Water Rabbit, ngunit maaaring hindi mo ito matamasa nang mabuti o lubusang ma-enjoy kung may problema ka sa kalusugan. Kaya kung maiiwasan mong magkasakit, mas malalasahan mo at mas masasarapan ka sa mga suwerte at magagandang kapalaran na darating sa iyo sa buong 2023.

Para sa mga Ahas na isinilang noong 1977, hindi mo dapat isagawa ang mga marahas at biglaang pagbabago ngayong 2023. Sa halip, panatilihin mo lang ang mga dati nang nasa iyo noong nakaraang 2022. Halimbawa sa negosyo, hindi iminumungkahi na mag-invest ka sa panibagong pagkakakitaan. Sa halip, ituloy mo lang ang dati nang kalakal at lalo mo pang pagbutihin, gayundin, magsipag ka. Sa bawat pagsisipag na gagawin mo ngayong Year of the Water Rabbit, mas maraming biyaya at karagdagang pagpapala ang tuloy-tuloy na darating. Sa pakikipagrelasyon naman, hindi ka dapat makipag-cool off o makipag-break sa iyong karelasyon o kung sinuman ang kasama mo ngayon. Sa halip, ang pinakaepektibong istilo, hindi lang sa love life kundi sa buong buhay mo ay “stay put” ka muna nang sa gayun ay mas maging mabunga at maligaya ang buong 2023 para sa iyo.

Kung ikaw ay Ahas na isinilang noong 1929 at 1989, ngayong 2023, higit kang papalarin sa mga lugar na dati mo nang pinupuntahan, ganundin sa mga lugar na malapit sa pamilya at mga mahal mo sa buhay, at maging sa mga lugar na malapit sa kalikasan.

Ibig sabihin, hindi inirerekomenda ang paglayo sa iyong sinilangang bayan, ganundin sa mga taong malapit sa puso mo. Dahil tulad ng nasabi na, sa pamilya at mga mahal mo sa buhay manggagaling ang iyong lakas, agimat, gayundin ang iyong magagandang kapalaran sa buong Year of the Water Rabbit.

Para sa Ahas na isinilang noong 1941 at 2001, sobrang positibo ang lahat ng kaganapan ngayong 2023, kung saan higit sa inaasahan mo ang patuloy na darating. Magagara at hindi inaasahang mga pangyayari ang magaganap. Halimbawa, bigla kang kikita o magkakaroon ng malaking halaga ng salapi na hindi mo naman inaasahan. May mga karangalan at biglaang pagkilala na mararanasan, kung saan ang magara pa nito, ‘yung kita mo o ang pera na iyong mahahawakan ay maaaring maubos agad kung ito ay hindi mo titipirin. Ganundin sa pag-ibig, pakikipagkaibigan at pakikipagrelasyon, kumbaga, mas masaya at masarap na ugnayan ang biglang magaganap, pero kung hindi mo naman iingatan ang kakatok o darating na relasyon, ang masasayang karanasang ito ay mawawala at lilipas. Kaya ang pinakamahalagang gawin upang mahusto ang ligaya, tagumpay at ang sarap ay matuto kang magsinop, magmahal at magpahalaga sa lahat ng mga biyaya at pagpapala na tatamasahin mo sa buong 2023.

Kung ikaw ay Ahas na isinilang noong 1953 at 2013, talino at hindi emosyon ang dapat mong pairalin at paganahin ngayong Year of the Water Rabbit. Maraming kumplikadong bagay ang iyong haharapin, may mga ups and down na magaganap sa iyong buhay, may mga tagumpay at maseselang pagpapasya rin ang iyong mararanasan. Gayunman, ang ligaya at tagumpay ay nakasalalay sa iyong talino at kahusayan mo sa pagpapasya sa buong taong ito ng Water Rabbit. Ibig sabihin, iwasan mong magpasaya nang nakabatay lamang sa emosyon o damdamin. Hindi ka rin dapat magpasya nang mabilisan. Sa ganyang paraan, kapag maingat na maingat ang diskarte mo sa anumang larangan ng buhay ngayong 2023, matitiyak ang mas maunlad, maligaya at matagumpay na kapalaran.

Itutuloy