Kambing o tupa, madaling mainlab at dedma sa negatibong katangian ng minamahal

ni Maestro Honorio Ong @Forecast | February 23, 2023

Ipagpatuloy natin ang pagtalakay sa mga katangian at magiging kapalaran ng animal sign na Kambing o Goat, na tinatawag ding Tupa o Sheep, ngayong Year of the Water Rabbit.

Ang Kambing o Goat, Tupa o Sheep ay silang mga isinilang noong taong 1931, 1943, 1955, 1967, 1979, 1991, 2003, 2015, at 2027.

Sinasabi na ang mga Kambing o Tupa ay sadyang mahilig sa sining, kampanteng pamumuhay at ang mga lugar na malapit sa kalikasan. Bakas din sa kanilang pagkatao ang pagiging mapagmahal, tahimik, kimi, may malalim na pagkatao, mapag-isip at mahilig sa musika.

Gayundin, sila ay palakaibigan ngunit mahiyain, kaya kadalasan ay kaunti lang ang kanilang mga nagiging kaibigan. Umasa ka na ang pagkakaibigan na ito ay magiging tapat at panghabambuhay dahil hindi nang-iiwan sa ere ang mga Kambing o Tupa. Sa sandaling naging bahagi ka ng buhay niya, ang ugnayang ito ay ite-treasure o iniingat-ingatan niya.

Sinasabi ring ibinabahagi lang nila sa kanilang matatalik na kaibigan ang laman ng kanilang puso at pagiging sentimental. Ang totoo kasi nito, namimili ang Kambing o ang Tupa ng mga taong kanilang kakaibiganin at pagkakatiwalaan. Sapagkat kapag nagustuhan ka nila, 100% nilang ibibigay ang kanilang tiwala at habambuhay na kayong magiging mag-bestfriend.

Sa pag-ibig, sinasabing bukod sa madaling ma-in love ang mga Kambing o Tupa, sila rin ay sobrang matiisin at may pagka-martir sa panahong sila ay nagmamahal. Kaya kahit na may mga pagkukulang o hindi magandang ugali ang kanilang kasuyo, handang-handa silang pagpasensyahan ito at magsawalang-kibo na lamang. Para sa kanya, hangga’t masaya at nagmamahal siya, anumang pangyayari at negatibong katangian ng kanyang kasuyo ay handa niya itong tanggapin at pagtiisin, huwag lamang masira ang kanilang relasyon.

Dagdag pa rito, sinasabi rin na ang mga Kambing o Tupa ay sobra kung magmahal at palagi silang nakatali o sa ibang salita, sobrang close sila sa kanilang pamilya at tahanan.

Gayundin, dahil mapagmahal at maalalahanin sa kanilang mga mahal sa buhay, hindi nila nalilimutang alalahanin ang mahahalagang okasyon sa kanilang pamilya at tahanan, ganundin ang mahahalagang pangyayari na naganap sa kanila ng kanyang kasintahan.

Sa sandaling napalapit ang loob nila sa isang babae o lalaki, sobrang napapamahal at na-a-attract sila sa kanilang nakakarelasyon, kaya sa sandali ng pansamantalang paglayo, halos hindi ito makakayanan ng Tupa o Kambing dahil tulad ng nasabi na, sobrang emosyunal at sentimental sila, ‘ika nga, hopelessly romantic kung magmahal.

Sinasabi ring madaling ma-in love ang Tupa o Kambing, kung ikaw ay nagtataglay ng malinis at tahimik na puso, ngunit assertive at buo ang kalooban.

Likas namang magiging mapalad ang Tupa o Kambing sa sandaling siya ay napaliligiran ng mga taong may malakas na loob at strong personality.

Samantala, ang extrovert at masiglang pagkatao ng Kabayo ay tugma sa tahimik at maramdaming Tupa o Kambing. Nakatakda ring maging matalik na kaibigan ng Tupa o Kambing ang masayahing Kuneho, dahil hindi nagkakalayo ang kanilang temperament at damdamin, madali silang magkakaunawaan at magkakasundo. Tugma at ka-compatible rin ng Tupa o Kambing ang kumikero at maharot na Unggoy, ang matapang na Dragon at makisig at makasariling Tandang.

Itutuloy

Kambing o tupa, ‘di kailangang maghirap para magkaroon ng komportable at masaganang buhay

ni Maestro Honorio Ong @Forecast | February 21, 2023

Ipagpatuloy natin ang pagtalakay sa mga katangian at magiging kapalaran ng animal sign na Kambing o Goat, na tinatawag ding Tupa o Sheep, ngayong Year of the Water Rabbit.

Ang Kambing o Goat, Tupa o Sheep ay silang mga isinilang noong taong 1931, 1943, 1955, 1967, 1979, 1991, 2003, 2015, at 2027.

Sa pakikisalamuha sa kapwa, sinasabing ang Kambing o Tupa ay matagal at bihirang magalit dahil tulad ng nasabi na, likas sa kanya ang pagiging kalmante at mabait. Pero kapag nainis naman ang Tupa, siya ay manunuwag dahil napakasama niyang magalit, kaya kung may karelasyon o asawa kang Tupa, mas makabubuti kung ‘wag na ‘wag mo siyang gagalitin kung ayaw mong maghalo ang balat sa tinalupan. Kaya tulad ng nasabi na, bagama’t ang Kambing o ang Tupa ay bihirang magalit, napakasama ng maaaring maganap sa sandaling siya ay ginalit mo.

Gayundin, may pambihirang kapangyarihan ang Tupa o Kambing sa panahong ginamit niya ang power o lakas ng paglalambing at kapangyarihan ng kakaibang kabaitan. Kapag siya ay may hiningi sa isang tao na nilambing o pinakitaan niya ng mabuting ugali, siguradong hinding-hindi siya tatanggihan nito. Kaya kapag humiling ang Kambing o Tupa sa langit, siguradong siya ay pagbibigyan ng nasa itaas, gaanuman kaimposible ang kanyang hinihiling.

Kaya kung ikaw ay isinilang sa animal sign na Tupa o Kambing, humiling ka ngayon sa langit at siguradong ito ay magkakatotoo. Sa sandaling ito ay natupad, masasabi mo sa iyong sarili na, “Ito nga pala ang hiniling ko sa langit, bagama’t medyo matagal bago nagtupad, sigurado namang magkakatotoo at darating.”

Kung ikukumpara sa animal sign na Baka na kailangan pang magpakasipag at magsikap nang husto upang umunlad at umasenso, ang Kambing o Tupa ay iba. Sinasabi na kahit hindi siya magpakahirap, bagkus, ang malalapit na tao o kanyang mga mahal sa buhay ang magsisikap, ang mga suwerte at pag-unlad na makakamit ng mga ito ay ibibigay din ng langit sa kanya nang hindi niya inaasahan.

Kumbaga, sa isang hari at reyna, kahit hindi sila magtrabaho o maghanapbuhay nang dibdiban, tiyak na ang Kambing o Tupa ay mabubuhay nang masagana, marangya at masaya dahil ang maghahanapbuhay para sa kanya ay ibang tao.

Dahil dito, minsan ay napagbibintangan ang Kambing o Tupa na tamad, laging umaasa o may pagka-parasite. Pero hindi naman totoo ‘yun, sa halip, ganu’n lang talaga ang kapalarang ipinagkaloob sa kanya ng langit – ang hindi gaanong mahirapan o hindi gaanong magpatulo ng pawis, pero laging kampante at masaya. Dahil para sa Tupa o Kambing, ang mga salitang, “Salamat sa Diyos dahil nakakaraos naman!” ay tugmang-tugma sa pagkatao niya.

Kaya mapapansin mo na bihira sa mga Tupa o Kambing ang labis na nag-aalala, gayundin, bihira sa kanila ang nagsisikap at nagpupursige talaga dahil tulad ng nasabi na, sila ay isinilang upang magpa-easy-easy lang sa buhay. Pero hindi sila magugutom kailanman, tulad ng reyna ng mga langgam, nabubuhay siya nang masagana at maligaya habang pinaglilingkuran siya ng libu-libong kawal at trabahador na mga langgam.

At dahil isinilang na masarap ang buhay at hindi gaanong nagtatrabaho o nahihirapan, nagtataglay naman ang Tupa o Kambing ng busilak at mapagbigay na pagkatao. Kung saan, siya ay tunay na matulungin at maawain sa kanyang kapwa na laging handang tumulong sa mga taong kapus-palad.

Dahil sa ugaling ito ng Tupa o Kambing, lihim na pinapanood ng nasa itaas ang kanyang kabutihang loob, kaya hindi niya rin namamalayang sa ganitong paraan at pangyayari, hindi siya kailanman maghihirap. Sa halip, lalo pang sinusuwerte sa kanyang buhay dahil sa pagkakaroon niya ng busilak na puso at mapagmahal na kalooban.

Itutuloy

Year of the Sheep, Maawain at matulungin kaya laging naloloko

ni Maestro Honorio Ong @Forecast | February 18, 2023

Sa pagkakataong ito, tatalakayin naman natin ang mga katangian at magiging kapalaran ng animal sign na Kambing o Goat, na tinatawag ding Tupa o Sheep, ngayong 2023 o Year of the Water Rabbit.

Ang Kambing o Goat, Tupa o Sheep ay silang mga isinilang noong taong 1931, 1943, 1955, 1967, 1979, 1991, 2003, 2015, at 2027.

Ang Year of the Goat Kambing o Tupa ay pinaghaharian din ng impluwensya ng planetang Moon at sa Western Astrology ang Year of the Goat/Sheep ay siya ring kumakatawan sa zodiac sign na Cancer.

Pinaniniwalaang may ilang mabigat na pagsubok na kakaharapin ang mga Kambing o Tupa na isinilang sa panahon ng tag-ulan o tag-lamig, kaysa sa mga kapatid nila na isinilang sa panahon ng tag-araw o tag-init. Subalit, anumang pagsubok ang dumating sa nasabing animal sign, basta patuloy silang naniwala sa kanilang taglay na kakayahan, walang pagsubok o suliraning hindi nila makakayang lutasin at lagpasan.

Sinasabing bukod sa taglay na kabaitan at may mahinang personalidad, sa 12 animal signs na naglakbay at nakarating sa palasyo ni Lord Buddha, ang Kambing o Tupa ang isa sa pinakamatulungin, mapagbigay, madaling maawa at may mababang kalooban.

Tahimik, tapat at mabait ang Kambing o Tupa, itinuturing din sila na madaling mapasunod at utusan, kung saan ang mga ugaling ito ay inaabuso ng mga taong mapagsamantala, lalo na ng kanilang mga nagiging kaibigan at nakakasama.

Bukod sa mabait, ang mga Tupa o Kambing ay madali ring maawa at mabagbag ang damdamin, lalo na sa mga taong mahirap ang pamumuhay at alam nilang walang-wala.

Kaya kapag hindi naging maingat at mapili sa pakikipagkaibigan, gayundin sa pakikipagsosyo sa negosyo o hindi naging maingat sa mga taong kanilang pagkakatiwalaan, malaki ang posibilidad na siya ay maloko ng kanyang mga kasama nang hindi lang basta-bastang halaga kundi malaking halaga ng pera.

Kaya ngayong Year of the Water Rabbit, walang dapat gawin ang isang Tupa o Kambing kundi ang maging mapagmatyag at bago sumuong sa isang transaksyon, siguraduhin muna nila ang katapatan ng mga taong kanilang kausap upang hindi sila maloko o maisahan ng mga taong mapagsamantala.

At dahil mabait at maawain ang Tupa, sobrang emosyonal o maramdamin, at madaling naiimpluwensyahan ng mga taong kanilang nakakasama, lalo na ng mga taong miyembro ng kanilang pamilya.

Ibig sabihin, madaling mauto at mabola ang mga Tupa o Kambing at maawain sila sa kanilang pamilya. Kaya kadalasan, nagiging biktima rin sila ng maling suhestyon o mungkahi na maaaring ikalugi o ikabagsak ng kanilang kabuhayan o hanapbuhay.

Dagdag pa rito, sinasabi rin na ang Tupa o Kambing ay may mahinang personalidad, kaya kapag sinabihan sila ng mga linyang, “Wala kang kuwentang tao,” “Mahina ang iyong personalidad at sunud-sunuran ka lang sa asawa o sa taong umiimpluwensya sa iyo,” at “Wala kang sariling desposisyon sa buhay,” malamang na paniniwalaan niya agad ito.

Kaya kapag ikaw ay may karelasyon o asawa na isinilang sa animal sign na Kambing o Tupa, huwag mo siyang pagsasabihan ng mga negatibong salita na ikasisira ng kanyang diskarte at pagkatao. Ito ay dahil kung ano ang sabihin o ibintang mo sa kanya, malamang na paniniwalaan ka niya. Ang mga Tupa o Kambing ay madaling maimpluwensyahan at mapaniwala sa mga sinasabi sa kanya ng ibang tao, lalo na ang malalapit sa kanya.

Samantala, kung ikaw ay may karelasyon o asawa na Tupa o Kambing, dapat mong paulit-ulit na sabihin ang mga positibo niyang katangian. Gayundin, palagi mo siyang purihin at bigyan ng positive reinforcement dahil sa ganu’ng paraan, paniniwalaan niya ito, kaya sigurado na kung ano ang sabihin mo sa kanya.

Halimbawa, sinabi mo sa kanya na, “Magtatagaumpay ka, uunlad at magiging maligaya habambuhay,” paniniwalaan niya ito at siguradong sa bandang huli, kung ano ang sinabi at dinikta mo sa kanya, ‘yun ang kanyang paniniwalaan at mangyayari sa kanya, hindi lamang sa kanyang buhay kundi maging sa kanyang kapalaran.

Itutuloy