SSS loan, puwedeng i-avail ng mga apektadong miyembro at pensyonado ng bagyo

ni Fely Ng @Bulgarific | Oct. 27, 2024

Hello, Bulgarians! Inanunsyo ng Social Security System (SSS) na ang mga miyembro at pensyonado na apektado ng pananalasa ng Severe Tropical Storm Kristine ay maaaring agad na mag-avail ng salary at pension loan para sa kanilang mga pangangailangan.

“As part of our proactive response to the urgent financial needs of our members and pensioners during natural calamities, the SSS loan programs are readily available to support their recovery,” pahayag ni SSS Senior Vice President for Lending and Asset Management Group Pedro T. Baoy.

Upang maging kuwalipikado para sa one-month salary loan, ang mga empleyado, self-employed, at voluntary member ay dapat magkaroon ng 36 buwanang kontribusyon, anim sa mga ito ay dapat nasa loob ng huling 12 buwan bago ang buwan ng loan application. 

Samantala, ang mga miyembro ay dapat magkaroon ng hindi bababa sa 72 posted contributions kung pipiliin nilang mag-avail ng dalawang buwang salary loan.

“They must be under 65 years of age at the time of loan application and have not been granted any final benefit like total disability, retirement, or death benefits,” saad ni Baoy. 

“Employers’ compliance is crucial in these situations since their updated contribution and loan payments are essential for their employee’s loan eligibility,” dagdag pa ni Baoy.

Ang mga kuwalipikadong miyembro ay maaaring magsumite ng kanilang salary loan application online sa pamamagitan ng My.SSS Portal. Kapag naaprubahan, ang loan ay itatalaga sa rehistradong Unified Multi-Purpose Identification (UMID)-ATM Card ng miyembro o active account na may Philippine Electronic Fund Transfer System and Operations Network (PESONet)-participating bank.

Maaaring bayaran ng mga miyembro ang salary loan sa loob ng dalawang taon sa pamamagitan ng 24 equal monthly amortizations na may taunang interest rate na 10 porsyento.

Samantala, ang mga retiree-pensioners ay maaaring mag-avail ng kanilang SSS pension loan na katumbas ng tatlo, anim, siyam, at 12 beses ng kanilang Basic Monthly Pension plus P1,000 karagdagang benepisyo, ngunit hindi lalampas sa maximum na P200,000.

Ang loan amortization, kasama ang 10 porsyento na annual interest rate sa balanse ng principal loan, ay dapat ibawas sa buwanang pensyon na nagtitiyak ng Net Take Home Pension na hindi bababa sa 47.25 porsyento ng Basic Monthly Pension (BMP) kasama ang P1, 000 karagdagang benepisyo. Ang mga tuntunin sa pagbabayad ay anim, 12, o 24 na buwan, depende sa halaga ng loan.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Nakapagtala ang SSS ng 2.4M bagong miyembro

ni Fely Ng @Bulgarific | Sep. 29, 2024

Hello, Bulgarians! Ayon kay Social Security System (SSS) President at Chief Executive Officer Rolando Ledesma Macasaet na ang SSS ay nasa track para sa record-setting year ng pagpaparehistro ng mga bagong miyembro matapos itong umani ng 2.4 milyong bagong rehistro noong Hulyo 2024.

Sa isang press briefing, iniulat ni Macasaet na ang bilang ng mga bagong miyembro ng SSS mula Enero hanggang Hulyo 2024 ay tumaas ng 165 porsyento hanggang 2.4 milyon mula sa 923,000 na naitala sa parehong panahon noong nakaraang taon.

“SSS took the challenge and even went the extra mile. In the first six months, we hit our year’s target of two million new members, a positive result of our massive membership and coverage drives throughout the country,” saad ni Macasaet.

Binigyang-diin ni Macasaet na ang milestone na ito ay sumasalamin sa pangako ng SSS na palawakin ang pagiging miyembro nito at maabot ang lahat ng nagtatrabahong

Pilipino.

“The implications of this record membership are profound because it means more Filipinos will have access to a comprehensive set of social security benefits from SSS. The social security protection offered by SSS can help safeguard the financial well-being of Filipino families, particularly during times of uncertainty,” dagdag pa ni Macasaet.

Iniulat ng SSS Executive Vice President para sa Branch Operations Sector na si Voltaire P. Agas na ang pinakamataas na bilang ng mga bagong miyembro ay nagmula sa mga naunang nagparehistro, na may kabuuang 1.2 milyon. Ang mga naunang nagparehistro ay mga indibidwal na mayroon nang mga numero ng SS ngunit hindi pa naiulat bilang mga empleyado o self-employed na miyembro.

“We observed a significant increase in new self-employed members, which surged by 273 percent—from 112,000 in 2023 to 419,000 in 2024. Additionally, the number of new OFW members more than doubled, rising to 10,300 in 2024 from just over 5,000 last year,” paliwanag ni Agas.

Ipinakita sa datos na naitala ng Luzon ang pinakamataas na bilang ng mga bagong miyembro, na may higit sa 882,000. Pumangalawa ang National Capital Region (NCR) na may mahigit 693,000 bagong enrollees. Sumunod ang Mindanao at Visayas na may 436,000 at 417,000, ayon sa pagkakasunod. Samantala, mahigit 10,000 bagong miyembro ang nagmula sa mga internasyonal na operasyon.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Benefit Package ng PhilHealth, tuluy-tuloy sa paglaki

ni Fely Ng @Bulgarific | September 10, 2024

Hello, Bulgarians! Tiniyak ni PhilHealth President and CEO Emmanuel R. Ledesma, Jr., bunsod na rin ng sunud-sunod na anunsiyo, ang paglawak at paglaki ng mga benefit package ng ahensya na nagsimula pa noong nakaraang taon. 

“Hindi maikakaila na nakikita at nararamdaman na ng mga miyembro ang mas pinagbuting benepisyo nila sa PhilHealth. Sinimulan natin ito sa dialysis kung saan sinagot na natin ang lahat ng sesyon sa isang taon at itinaas pa ang bayad sa bawat sesyon,” saad ni Ledesma.

Matatandaang mula sa 90 ay ginawang 156 sesyon na ang sakop ng PhilHealth, at mula P2,600 ay itinaas sa P4,000 ang kada sesyon, na aabot sa P624,000 kada taon mula sa dating P405,600. Idagdag pa na permanente na at ginawa pang “no balance billing” ito ng ahensya para masigurong mararamdaman ng mga pasyente. 

“Naririnig namin ang hinaing ng mga kababayan natin na matulungan sila sa magastos na pagpapagamot. Nakikita at nararamdaman natin iyan sa ating pakikipagpanayam sa mga pasyente. Minamadali namin ang pagpapabuti ng mga benepisyo. Sinimulan lamang namin ito sa mga malulubhang sakit dahil talagang nakakabutas ng bulsa ang gamutan gaya ng breast cancer, pulmonya, stroke, asthma at iba pa,” paliwanag ng PhilHealth chief.

Ayon sa health insurance agency, higit-dobleng umento ang ipinatupad nito sa hemorrhagic stroke (P80,000 mula P38,000), ischemic stroke (P76,000 mula P28,000), bronchial asthma (P22,488 mula P9,000), neonatal sepsis (P25,793 mula P11,700), at iba pa.

Ibinida rin nito ang 1,400 porsyentong pagtaas sa Z benefit package sa breast cancer, o hanggang P1.4 milyon mula sa dating P100,000. Idinagdag din ang ultrasound at mammogram sa Konsulta package na libreng mapapakinabangan ng mga kababaihan para maagapan ang breast cancer. Ito ay bukod pa sa 13 laboratoryo at 21 gamot na kasalukuyang makukuha nang libre mula sa higit 2,000 Konsulta providers sa bansa.         

Bukod dito, asahan din ang paglaki sa iba pang benepisyo bago matapos ang taon tulad ng chemotherapy para sa cancer sa baga, atay, cervical at prostate, kasama na rin ang emergency care, open-heart surgeries, ischemic heart disease with myocardial infarction, ST Elevation Myocardial Infarction (STEMI), cataract extraction, peritoneal dialysis, post-kidney transplant, physical and medical rehabilitation, at dengue.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.