ni Beth Gelena @Bulgary | May 18, 2026
Photo: IG _dominicroque
Handa na si Sue Ramirez na maging ina sa magiging anak nila ng dyowang aktor na si Dominic Roque.
Aniya, “Bakit hindi? Sana. Kung maibibigay, ‘di ba? Sa tingin ko, si Dominic ay magiging isang napakabuting ama sa hinaharap, kung gugustuhin man n’yang magkaroon ng mga anak.”
Inilarawan din ng aktres ang boyfriend bilang mapagmahal at nakatuon sa pamilya, na nagbibigay-diin sa kanyang pasasalamat para sa kanya.
Sey niya, “Grabe kung kilala n’yo lang talaga kung sino si Dom, napakabuti, napakabait, napaka-family-oriented, God-fearing, I think sobrang perfect.
“Lagi kong sinasabi sa posts ko, ang suwerte ko talaga. ‘Yun talaga ang napi-feel ko. Nag-thank you ako kay Lord.
“Minsan, ‘pag tinitingnan ko s’ya, napapa-‘Thank you, Lord!’ ako. ‘Di ko in-expect na almost 30 (years old) na ‘ko, makakahanap pa ako ng sobrang bait na katulad ni Dom.”
Sey niya sa pangarap niyang maging ina.
“Matagal ko na s’yang gustong mangyari para sa akin. ‘Pag tinatanong ako, ano ba’ng gusto kong mangyari, sabi ko, parang nagawa ko na lahat. Ang dami ko nang nagawa.
“Pero gusto kong maging nanay. Gusto kong maging nanay na katulad ng nanay ko. ‘Yun ang lagi kong sinasabi,” pakli ng aktres.
May konting pressure raw sa part niya pagdating sa pagbubuntis dahil sa edad niya.
“‘Yun nga, inevitable ‘yung ticking time bomb ng pagiging isang babae. Kailangan na siyang ikilos at igalaw soon kung gusto nating mangyari at may mabuong bata. Pero right now, I am still busy working. Pero kung ibibigay sa akin, why not?” wika pa niya.
Tinalakay din niya ang posibilidad na magkaroon ng anak kahit hindi kasal at sinabing bukas ang kanyang isipan depende sa karelasyon.
“Oo naman,” mabilis na sagot ni Sue Ramirez.
“Dati, naisip ko ‘yun. Baka kahit walang partner, baka kaya ko? Pero ngayon, mas ano na ako… siguro depende sa partner mo at the moment.
“Makikita mo rin talaga ‘yun at saka mas mabubuksan pa ‘yung isip at puso mo sa possibility na I can still form a beautiful family,” pagtatapos niya.
Well, just asking, hindi kaya manghinayang si Bea Alonzo kapag narinig ang mga papuri ni Sue sa kanyang ex-fiance?
Naging emosyonal si Kristine Hermosa sa pinakabagong episode ng vlog na House of D (HOD) kasama ang asawang si Oyo Sotto at ilang miyembro ng kanilang pamilya, na pinangungunahan ng beteranang aktres na si Dina Bonnevie.
Sa teaser ng Episode 19 na ibinahagi sa Instagram (IG), makikita ang mga makahulugang pag-uusap nina Kristine at Oyo dahil pansamantala silang nahiwalay sa kanilang mga pamilya nang maging mag-asawa.
Tampok din dito ang mga personal na reyalisasyon at emosyonal na pagbabahagi ni Kristine tungkol sa buhay-may-asawa, pamilya, at kanilang journey bilang magkapareha.
Masisilayan din sa ilang eksena ang mga nakakaantig na tagpo kasama ang kanilang mga mahal sa buhay na lalong nagbigay-init sa kabuuang tema ng episode.
Kilala sina Kristine at Oyo bilang isa sa mga hinahangaang celebrity couples sa showbiz. Ikinasal sila noong 2011 at piniling panatilihing pribado ang malaking bahagi ng kanilang buhay-pamilya kahit patuloy silang nasa industriya.
Si Kristine Hermosa ay sumikat sa mga matagumpay na teleserye at pelikula noong dekada 2000, habang si Oyo Sotto naman ay patuloy na aktibo sa telebisyon at nakatuon din sa pagpapalaki ng kanilang anim na anak.
Mister, dapat daw managot sa pagkampi kay Sen. Bato… MARIEL, DAMAY SA GALIT NG MADLANG PIPOL KAY SEN. ROBIN
MAINIT na pinag-uusapan online ang muling pagpo-post ni Mariel Rodriguez ng isang makahulugang cartoon image na iniuugnay ng marami sa kontrobersiyang kinakaharap ng kanyang asawang si Senator Robin Padilla.
Sa nasabing post, ipinapakita umano ang paghahambing sa pagitan ng mga taong nakikita lamang ang pagkakamali ng iba habang hindi napapansin ang kanilang mabubuting nagawa.
Dahil dito, umani ng matitinding reaksiyon mula sa mga netizens ang post ni Mariel.
Marami ang bumatikos at nagsabing hindi sapat ang pagiging ‘mabait’ o matulungin upang mapawalang-sala ang mga maling aksiyon, lalo na kung may kinalaman ito sa tungkulin bilang isang halal na opisyal.
May ilan ding nagsabing dapat ihiwalay ang personal na kabutihan sa pananagutan sa batas at serbisyo publiko.
Hindi rin naiwasang ungkatin ng ilang mga netizens ang mga kamakailang kontrobersiya sa Senado, kabilang ang umano’y pagtulong ni Robin kay Sen. Bato dela Rosa na may warrant of arrest.
Dahil dito, lalong uminit ang diskusyon online tungkol sa accountability, political loyalty, at tamang asal ng mga public officials.
Sa kabilang banda, may ilan pa ring nagtanggol kay Robin at sinabing marami rin umano itong natulungan at hindi dapat husgahan base lamang sa isang isyu.
Gayunpaman, mas kapansin-pansin ang panawagan ng mga netizens para sa mas mataas na pamantayan at pananagutan mula sa mga opisyal ng gobyerno.
Samantala, naging usap-usapan din sa comment section ang umano’y pagiging ‘out of touch’ ni Mariel sa sitwasyon, habang may iba namang naniniwalang natural lamang na ipagtanggol niya ang kanyang mister sa gitna ng matinding pambabatikos online.
