Agarang tulong sa mga biktima ng Bagyong Tino

by Info @Editorial | November 6, 2025

Muling sinalanta ng kalamidad ang ilang bahagi ng bansa matapos ang pananalasa ng Bagyong Tino. 

Maraming pamilya ang nawalan ng tirahan, kabuhayan, at pag-asa. 

Sa ganitong sitwasyon, hindi sapat ang awa — ang kailangan ay mabilis at konkretong aksyon. Dapat tiyakin ng pamahalaan na maagap ang pag-abot ng tulong sa mga apektadong lugar.

Kailangang maayos ang koordinasyon ng mga lokal na opisyal upang hindi maantala ang relief goods, gamot, at serbisyong medikal.

Hindi dapat maulit ang mga pagkakataong may mga komunidad na napapabayaan dahil sa kakulangan ng plano o pondo. Gayundin, tungkulin ng bawat mamamayan na makiisa. Magbigay ng anumang donasyon, magboluntaryo, o magpalaganap ng tamang impormasyon.

Ang simpleng pag-share ng mga post ng aktuwal na kalagayan ng mga binagyo ay malaking tulong. Sa pamamagitan nito, mababatid kung saan dapat makarating agad ang pagsaklolo.

Ang Bagyong Tino ay paalala na sa oras ng sakuna, kailangan natin ng pagkakaisa at mabilis na pagtugon. 

Ang tunay na malasakit ay nakikita sa gawa, hindi sa salita. Sa pagtutulungan ng gobyerno at mamamayan, muling babangon ang mga naapektuhan ng bagyo.

Masungit na gov't. employees, out!

by Info @Editorial | November 5, 2025

Ang mga kawani ng pamahalaan ay tinaguriang “lingkod-bayan”. 

Sa kasamaang-palad, hindi ito laging nasusunod. Marami pa rin ang mga reklamo laban sa ilang empleyado ng gobyerno na masungit, suplado, o tila walang malasakit sa mga mamamayang kanilang pinagsisilbihan.

Ayon sa Republic Act No. 6713 o ang Code of Conduct and Ethical Standards for Public Officials and Employees, tungkulin ng bawat kawani ng gobyerno na maging courteous, responsive, at efficient sa pakikitungo sa publiko. 

Hindi maikakaila na mabigat din ang pasanin ng mga empleyado ng gobyerno — mahabang pila, kulang na pondo, at minsan ay hindi sapat ang sahod. Subalit hindi ito dahilan upang maging malamig o bastos sa pakikitungo sa publiko. 

Ang tunay na sukatan ng serbisyo-publiko ay paggalang, malasakit, at tapat na paglilingkod. 

Dapat ding maging aktibo ang mga pinuno sa pagpapatupad ng maayos na customer service training at sa pagdisiplina sa mga empleyadong lumalabag sa Code of Conduct.

Ang gobyerno ay para sa tao — hindi laban sa tao. Ang bawat ngiti, maayos na sagot, at magalang na serbisyo ng isang kawani ay hakbang patungo sa tiwala ng mamamayan sa pamahalaan. 

Maging maingat at alerto kontra-sunog

by Info @Editorial | November 4, 2025

Habang papalapit ang Pasko, sunud-sunod naman ang sunog sa iba’t ibang bahagi ng bansa. Imbes na kasiyahan, takot at kawalan ang nararanasan ng maraming pamilya. 

Kadalasan, sanhi ng sunog ang mga sirang kable, kandilang napabayaan, o sobrang daming nakasaksak sa kuryente. 

Nakakaawa ang mga pamilyang nawawalan ng tirahan lalo na ng mahal sa buhay. Nito lang, magkapatid na edad isa at dalawa ang nasawi sa sunog. May isa ring namatay sa isang planta.

Sa panahong dapat ay pag-asa at kabutihan ang nangingibabaw, nawawalan naman ng pangarap ang ilan.Panahon nang maging mas responsable tayong lahat — mula sa mga mamamayan hanggang sa mga opisyal. Ang kaligtasan ay hindi dapat nakakalimutan kahit abala.

Kung may sapat na fire safety campaign at regular na pag-iinspeksyon, kahit paano ay maiiwasan ang ganitong pangyayari.