Gabay at oportunidad para sa kabataan

by Info @Editorial | December 23, 2025

Halos sunud-sunod na naman ang mga balita tungkol sa mga kabataang nasasangkot sa rambol lalo nang mag-umpisa ang Simbahang Gabi. 

Sa halip na silid-aralan at ligtas na komunidad, sila'y nasa lansangan gumagawa ng karahasan. 

Hindi ito simpleng usapin ng disiplina; ito'y palatandaan ng kakulangan sa gabay, oportunidad at maagap na aksyon ng pamahalaang lokal.

May mahalagang papel ang Local Government Units (LGUs) sa pagharap sa problemang ito. Sila ang pinakamalapit sa komunidad—alam nila kung saang barangay ang mataas ang panganib, kung sinu-sino ang mga kabataang nangangailangan ng tulong, at kung anong mga programa ang epektibo. Gayunman, kung umaaksyon lang kapag may nasaktan o may nangyaring insidente, patuloy na mauulit ang problema.

Kailangang palakasin ang preventive programs: after-school activities, sports at arts programs, at skills training na nagbibigay ng direksyon at pag-asa sa kabataan. 

Buhayin ang ugnayan ng paaralan, barangay at magulang upang maagang matukoy ang mga batang naliligaw ng landas. 

Tiyakin din ang maayos at makataong pagpapatupad ng batas, na nakatuon sa rehabilitasyon at hindi lamang parusa.

Hindi rin maaaring kalimutan ang ugat ng problema—kahirapan, kawalan ng trabaho ng magulang, at kakulangan ng ligtas na espasyo para sa kabataan. Dito dapat pumasok ang malinaw na plano at sapat na pondo ng LGUs. 

Maunawaan sana natin na ang kabataan ay hindi problema; sila ay yaman. Ngunit kung pababayaan, ang yaman ay maaaring maging panganib—hindi dahil sa likas na masama, kundi dahil sa kakulangan ng gabay at oportunidad.

Panahon na upang kumilos ang LGUs. Ang kinabukasan ng komunidad ay nakasalalay sa kinabukasan ng kabataan.

Tambak na basura, sakit na naman sa ulo

by Info @Editorial | December 22, 2025

Tuwing dumarating ang holidays, kasabay ng kasiyahan ang isang problemang hindi na bago—ang tambak na basura. 

Mula sa pinagbalatan ng handa, sobra-sobrang plastic ng mga regalo, hanggang sa single-use containers, tila nagiging tradisyon na rin ang pagdami ng kalat. 

Sa halip na matapos sa masasayang alaala, naiiwan ang mabigat na tanong: hanggang kailan ba natin hahayaang maging sakit sa ulo ang basurang tayo rin ang may gawa?

Hindi maikakaila na ang holidays ay panahon ng pagbibigayan at pagsasama-sama, ngunit hindi ito dapat maging dahilan ng kawalang-disiplina. 

Ang mga estero at kalsada na nababarahan ng basura ay nagdudulot ng baha, sakit, at polusyon—mga problemang bumabalik sa atin paglipas ng selebrasyon. 

Panahon na para baguhin ang nakasanayan. Ang mga simpleng hakbang tulad ng tamang segregasyon, paggamit ng reusable containers at pag-iwas sa sobrang pagbili ay malaking tulong na. 

Kung gusto nating matapos ang taon nang magaan, dapat magsimula tayo sa pagbabawas ng basurang iniiwan.

Dagdag-pasensya sa biyahe

by Info @Editorial | December 21, 2025

Ang holiday season ay nagdadala rin ng matinding hamon sa sistema ng transportasyon. 

Mahahabang pila sa terminal, hindi inaasahang pagkaantala ng biyahe, at matinding trapik ang nagiging normal sa panahong ito. 

Gayunpaman, ang mas nakababahala ay ang pagtaas ng iritasyon at alitan sa pagitan ng mga motorista at pasahero. Ang kawalan ng pasensiya ay nagbubunga ng padalus-dalos na desisyon at paglabag sa batas-trapiko.

Hindi sapat ang sisihin ang dami ng sasakyan o pasahero. May malinaw na tungkulin ang pamahalaan na tiyakin ang maayos na pamamahala sa daloy ng trapiko, sapat na bilang ng biyahe, at agarang pagbibigay ng impormasyon sa publiko. 

Gayundin, may pananagutan ang mga transport operator na igalang ang karapatan ng pasahero at panatilihin ang kaligtasan bilang pangunahing prayoridad.

Ang disiplina, paggalang sa batas, at kakayahang magtimpi sa gitna ng anumang sitwasyon ay  masasabing pananagutang panlipunan. 

Sa panahong ang bawat minuto ay mahalaga at ang pagod ay sukdulan, ang panawagan para sa dagdag-pasensiya ay hindi simpleng paalala kundi isang paninindigan. 

Ang ligtas at maayos na paglalakbay ay hindi lamang responsibilidad ng iilan—ito ay tungkulin ng lahat.