Ilegal na cosmetics clinics, nagkalat

by Info @Editorial | May 23, 2026

Nakakalat ngayon ang mga illegal cosmetic clinic sa mga condo, apartment, at residential area. Kahit walang permit at walang lisensiyadong doktor, tuloy pa rin sila sa pag-aalok ng botox, fillers, glutathione drips, at iba pang cosmetic procedures. 

Mas pinipili sila ng iba dahil mas mura, pero kapalit nito ay malaking panganib sa kalusugan at buhay.

Hindi laruan ang cosmetic procedures. Kapag mali ang ginawa o marumi ang gamit, maaaring mauwi ito sa impeksiyon, pagkasira ng mukha, o pagkamatay. Hindi sapat na marunong lang mag-inject o may magandang setup sa social media. Kailangan ng tamang training, lisensya, at ligtas na pasilidad.

Nakakabahala rin na parang madaling makalusot ang mga ganitong operasyon. Nasaan ang mga otoridad? Kung may mahigpit na inspeksiyon at monitoring, bakit patuloy silang nakakapag-operate? Dapat seryosohin ito ng gobyerno dahil buhay ng tao ang nakataya.

May responsibilidad din ang publiko. Hindi dapat nagpapadala agad sa murang presyo at online promotions. Bago magpagawa ng anumang procedure, siguraduhing lisensiyado ang doktor at rehistrado ang klinika.

Buwis-buhay sa bigas

by Info @Editorial | May 22, 2026

Isang 73-anyos na senior citizen ang namatay matapos masagasaan habang nakapila para sa P20 kada kilo na bigas sa Quezon City. 

Hindi ito simpleng aksidente lamang—ito ay malinaw na patunay na ang “murang bigas” ay nauuwi sa buwis-buhay.

Sa halip na maging sagot sa gutom at kahirapan, ang programa ay nagiging larawan ng magulong sistema. 

Mga matatanda, kabilang ang mga senior citizen na dapat inaalagaan, ay pinapapila nang maaga, sa gitna ng siksikan, trapiko, at panganib. Para lamang sa bigas.

Tanungin natin nang direkta: bakit kailangang may mamatay bago ayusin ang sistema?

Kung tunay na prayoridad ng pamahalaan ang mahihirap, hindi ganito ang dapat na kalagayan. 

Hindi dapat ang gutom ang nagtutulak sa kanila sa panganib. 

Ang murang bigas ay dapat dumadating sa tao, hindi ang tao ang sumasabak sa delikadong sitwasyon para rito.

Kung may organisadong sistema sana—maayos na listahan, delivery sa barangay, o direktang distribusyon sa bahay ng mga senior citizen—hindi sana nauwi sa trahedya ang simpleng pagbili ng bigas.

Serbisyo vs. Bisyo... Mandatory drug test sa gobyerno, dapat lang

by Info @Editorial | May 21, 2026

Nakakahiya na kailangang paalalahanan pa ang ilang empleyado ng gobyerno na umiwas sa ilegal na droga. 

Habang milyun-milyong Pilipino ang nagbabayad ng buwis para sa maayos na serbisyo, may ilang kawani naman na posibleng lulong sa bisyo at walang pakialam sa epekto nito sa trabaho at publiko. 

Kaya tama lamang na gawing regular at mas mahigpit ang drug test sa lahat ng empleyado ng gobyerno.

Hindi katanggap-tanggap na ang mga taong dapat nagsisilbi nang tapat ay siya pang posibleng gumagamit ng ipinagbabawal na gamot. 

Paano pagkakatiwalaan ang isang empleyadong sabog ang isip sa paggawa ng mahahalagang desisyon? Paano aasahan ang maayos na serbisyo kung ang mismong kawani ay hindi disiplinado?

Ang gobyerno ay hindi rehabilitation center para sa mga ayaw magbago habang nasa serbisyo. Kapag positibo sa droga, dapat may kaukulang aksyon agad. 

Kung ang ordinaryong manggagawa ay kayang sumunod sa patakaran, lalong dapat sumunod ang mga nasa gobyerno.

Hindi mawawala ang problema sa droga kung puro kampanya lang habang may mga gumagamit mismo sa loob ng opisina ng gobyerno. 

Kung seryoso ang pamahalaan sa paglilinis ng sistema, magsimula ito sa sarili nitong hanay.