Snooker Santos, reyna ng Lion Cup 9-Ball Singapore

ni Eddie M. Paez Jr. @Sports | April 12, 2023

Kinoronahan si dating snooker specialist Denise "Denden" Santos ng Pilipinas bilang reyna ng Lion Cup 9-Ball Invitational sa palaruan ng Aspire Recreation Centre sa Singapore.

Tulad naman ng inaasahan ay dinomina ni 2022 World Games bronze medalist at dating world junior champion Aloysius Yapp ang salpukang naganap sa hanay ng mga kalalakihan.

Ang tagumpay naman ng Pinay ay nagsisilbing palatandaan ng patuloy na pag-angat ng antas ng laro nito sa larangan ngayong kasalukuyang taon.

Matatandaang kamakailan lang ay sumampa ang Pinay sa trono ng Advanced Division matapos daigin si Nadine Estrada sa Women-In-Sports 9-Ball Cup sa Maynila. Patok din noong Pebrero ang bangis ni Santos nang mangibabaw siya sa panglimang yugto ng Amit Cup sa lalawigan ng Rizal.

Sa naturang kompetisyon, dumaan sa butas ng karayom si Santos pero nakahulagpos siya sa hamon ni Flordeliza "Phoy" Andal sa gitgitang pamamaraan, 7-6, sa finals.

Sa Singapore naman, kasama sa nalusutan niya para makuha ang $1,000 na champion's purse sina Sharik Aslam Sayed, Tan Bee Yen, Soh Joleen, Sylviana Yu. Sa banggaan para sa korona, naging dikdikan ang engkuwentro. Katunayan ay nakita ang 2-2 at 6-6 na standoff pagkatapos ng 12 matches. Pero pinakawalan ni Santos ang isang 3-0 na atake para maikandado ang titulo.

Guce, naka-podium sa Tucson Tour Golf

ni Eddie M. Paez Jr. - @Sports | April 11, 2023

Winakasan ni Clarisse Guce ang kalahating taon ng tagtuyot sa tulong ng isang podium finish sa Epson Tour: Casino Del Sol Golf Classic na ginanap sa Tuczon, Arizona kamakailan.

Naging susi sa pag-angkin ni Guce ng pangatlong puwesto ang nagliliyab na bogeyless 66 sa huling yugto para mairekord ang kabuuang 12-under-par 276. Bukod sa lumobong 73 sa pambungad na round, matalim na tinambalan ng Pinay ng 68 at 69 ang kanyang kartada para maibulsa ang pabuyang $12,286.

Kinapos lang ng dalawang palo ang naging kabuuang iskor ng anak ng dating tanyag na hinete sa bansa dahil sa markang 14-under-par 274 na naiposte ng nagkampeong si Gigi Stoll ($30,000). Samantala, si Natasha Andrea Oon ($18,996) ay may isinukong 13-under-par 275 kaya nakuha ang pangalawang puwesto habang nakapantay ni Guce sa huling upuan ng podium si Lindsey McCurdy.

Matatandaang noong Setyembre 2022 ay nasungkit niya ang panglimang baytang ng Murphy USA El Dorado Shootout (Arkansas) gayundin ang runner-up honors sa Guardian Championships (Robert Trent Jones Golf Trail, Pratville, Alabama). Hunyo naman nang tumersera ang 32-anyos na lady parbuster sa Island Resort Championship sa Sweet Grass Golf Club, Harris, Michigan.

Sa Epson Tour Moneylist, sumampa sa pang-15 na posisyon si Guce. Sa kasalukuyan ay tanging siya lang ang Pinay na nakapasok sa top 20.

Biado, nagkampeon sa MP Kalinangan 10-Ball

ni Eddie M. Paez Jr. - @Sports | March 17, 2023

Hinirang na kampeon si dating World Games gold medalist "Black Tiger" Carlo Biado sa Manny Pacquiao Kalinangan 10-Ball Open Singles sa General Santos kamakailan.

Samantala, sasargo na ang Women In Sports 9-Ball Cup ngayong Marso 25-26 kung saan inaasahang papagitna ang may 68 lady cue artists mula sa Bacolod, Naga, Zamboanga, Laguna at sa Kamaynilaan kung saan masasaksihan ang kompetisyon.

Matapos naman ang pananatili sa ospital, muling nasaksihan ang angas na nagbigay rin kay Biado ng US Open na korona nang tapusin ng dating caddy ang paligsahan sa GenSan na walang talo.

Tinuruan ni Biado ng leksyon si Socram Moliva (7-4), sadsad sa kanya si Wilfredo Banluta (7-1) bago binokya si Arnulfo Ejida (7-0) sa dulo ng qualifiers.

Sa knockout stage naman, umangat ang kampeon kontra kay Michael Feliciano (final 32, 8-6), bago niya tinalo sina Jhon La Garde (round-of-16, 8-3), Jeffrey Ignacio (quarterfinals, 8-6) at "The Dragon" Anton Raga (semifinals, 9-8) para makapasok sa pangkampeonatong duwelo kontra kay Emmanuel Delgado. Sa huling laro ng paligsahan, pinaglaruan ni Biado si Delgado sa iskor na 10-4.

Kabilang sa mga kilalang bilyaristang kinapos sa torneo sina Kyle Amoroto, Indonesian Piala Birgilir 9-Ball Open winner, dating World 8-Ball champion "Robocop" Dennis Orcullo at si Asian 9-Ball Championships runner-up "Dodong Diamond" Zorren James Aranas.