PCAP: Cordova, tuloy ang pambibiktima sa 7 koponan

ni Eddie M. Paez Jr. - @Sports | May 30, 2021

Hindi binibitawan ng Cordova Duchess Dagami Warriors ang intensyon nitong patuloy na panggugulat sa mga karibal at ngayon ay hawak na ang solong pangunguna sa Professional Chess Association of the Philippines (PCAP) Wesley So Cup Conference pagkatapos ng pakikipagharap sa pitong magkakaibang mga koponan.

Susunod nilang sasagupain ang Mindoro Tamaraws at Iriga City Oragons sa pagtitipong kinikilala ng Games and Amusement Board o GAB at nananatiling tanging pro chess league sa bahaging ito ng daigdig.

Sumibad ang Cordova sa 7-0 panalo-talo na rekord matapos turuan ng leksyon ang Palawan Queen’s Gambit (14.0-7.0) at daigin ang Toledo City Trojans (11.5-9.5) para sa pang-anim at pampitong mga panalo. Bukod dito, nakaipon na ang lider ng 92.5 na puntos sa torneong ipinangalan sa dating hari ng ahedres sa Pilipinas na tubong Cavite at ngayon ay FIDE World Fischer Random Chess champion na si Grandmaster Wesley So.

Naging moog ng magandang ipinakikita ng Cordova ang laro ng 22-anyos na import nitong si Israeli GM Nitzman Steinberg. Kumana si Steinberg, naging GM at IM noong 19 at 15 taong gulang ayon sa pagkakasunod-sunod, ang mga tagumpay sa board 1.

Nakabuntot sa lider ang tatlong koponan na pare-parehong may 6-1 na marka pagkatapos ng apat na araw na bakbakan sa Wesley So Cup: Camarines Soaring Eagle sa Southern Conference, at San Juan Predators at Manila Indios Bravos sa norte.

Samantala, bahagyang naiiwan ang limang kalahok dahil sa naisumiteng 5-2: ang Antipolo Cobras, Caloocan Loadmanna Knights, Cagayan Kings, Iloilo Kisela Knights at Toledo. Nananatili namang gumagapang ang mga Laguna Heroes, pumasok sa kasaysayan bilang pinakaunang champion ng PCAP, dahil sa natikman na nitong tatlong kabiguan mula sa pitong matches at ngayon ay nakaupo lang sa kalagitnaan ng pulutong sa Northern Conference.

Pagunsan at Que, umiinit ang laro sa Japan tour

ni Eddie M. Paez Jr. - @Sports | May 28, 2021

Ipagpapatuloy nina Pinoy parbusters Angelo Que at Juvic Pagunsan ang kanilang umiinit na kampanya sa malupit na Japan Golf Tour sa pagpalo nila sa Gateway To The Open Mizuno Open sa palaruan ng JFE Setonaikai sa Kasaoka, Japan.

Sariwa sa kani-kanyang impresibong mga laro ang dalawang batikang manlalaro ng Pilipinas sa nakalipas na dalawang linggo ng kampanya sa prestihiyosong professional tour sa bahaging ito ng Asya.

Noong isang linggo, nagpakawala si Que ng isang bogeyless 8-under-par 62 sa kanyang pinakaeksplosibong round sa loob ng apat na araw upang masikwat ang pang-apat na posisyon nang magtapos ang Partner Pro-Am Tournament sa prestihiyosong Japan Golf Tour (JGT) sa Toride Kokusai Golf Club ng Tsukubamirai, Japan.

Nanatilin sa unang sampu si Que sa rounds 1 at 2 pero nasipa siya papunta sa pang-15 pagkatapos ng pangatlong round. Hindi sumuko sa huling 18 butas at sa halip ay umusok ang driver at putter ng beteranong Pinoy tungo sa pagkamada ng walang mantsang round sa kabila ng maigting na kompetisyon.

Ang kabuuang iskor ni Que ay 261 strokes mula sa 63-68-68-62 na marka. Ito ay umuusok na 19-under-par sa torneo at dalawang palo lang ang layo sa nagsalo-salo sa unang puwesto na 259 nina South African Shaun Norris, Tomoharu Otsuki ng Japan at Zimbabwe parbuster Scott Vincent. Si Norris ang hinirang na kampeon sa torneo sa pamamagitan ng tiebreak rules.

Kasosyo ni Que sa pang-apat hanggang pangsampung baytang sina South Korean ace Han Young Son at ang mga Japanese stalwarts na sina Shotaro Wada, Hirotaro Naito, Eric Sugimoto, Kazuki Higa at Ryo Ishikawa.

Tatlong beses nang nagkampeon sa Asian Golf Tour si Que. Hinirang siyang hari ng Carlsberg Masters Vietnam (2004), Philippine Open (2008) at Worldwide Holdings Masters Malaysia (2010). Pumangalawa rin kamakailan si Pagunsan, Asian Golf Tour one time winner at 2011 Order of Merit champion, sa JGT Asia Pacific Diamond Cup sa Kaganawa Japan.

Labanda at Tan, nanaig sa PSAGS Mindanao Chess

ni Eddie M. Paez Jr. - @Sports | May 27, 2021

Hiniya ni Jarvey Labanda ang mga pinapaborang dispulo ng paspasang ahedres nang pangunahan ang 53rd seed at unrated na kalahok sa National Chess Federation of the Philippines - Southeast Asian Games Selection Mindanao Leg Tournament kamakailan.

Kay Mary Joy Tan naman napunta ang unang puwesto sa kababaihan nang kumulekta ang 15th seed ng 8.5 puntos mula sa 11 salang sa board. Dinaig niya sa meta ang walong puntos nina Daren Dela Cruz, Franchesca Largo at Angela Joelle San Luis.

Nakakolekta si Labanda ng walong panalo at tatlong tabla pagkatapos ng 11 rounds sa halos walang galos na performance sa sagupaang pinag-interesang madomina ng kabuang 69 blitz chessers. Kasama sa mga hinugutan ni Labanda ng buong puntos sina pre-tournament favorite Joseph Navarro noong round 10 at 9th ranked Arj Nezil Merrilles (round 8) samantalang napuwersa niya sa hatian ng puntos sina 6th seed Karlycris Clarito Jr. (round 3) at no. 9 Leonardo Navarro (round 9).

Masuwerteng nakakuha ng bye ang dehadong chesser sa pambungad na yugto na kompetisyon pero kumayod ito para rin magwagi kontra kina Jhames Reyes Oshrie (round 3), Gabriel Hilario Allan (round 4), Josh Hernani Yreil (round 5), Mark Paguntalan Anarna (round 6) at Ritchie James Abeleda (round 7).

Kapwa nagtapos na may 9.5 puntos sina Labanda at Merille pero sa una napunta ang titulo dahil sa “winner-over-the-other-rule” at nakuntento lang sa pangalawang puwesto ang huli. Ginamit ni Navarro ang kanyang naipon na 8.5 puntos para maselyuhan ang pangatlong puwesto.