Amoy Olympic Gold ang performance ni Golfer Saso

ni Eddie M. Paez Jr. - @Sports | June 06, 2021

Sumibad pataas ang pag-asa ng bansa na posibleng mapuputol na ang tagtuyot ng Pilipinas para sa isang Olympic gold medal matapos na hablutin ni Fil-Japanese Yuka Saso ang solong pangunguna sa isang major event ng Ladies Professional Golf Association (LPGA) na kasalukuyang nilalahukan ng mga pinakamalulupit na lady parbusters mula sa iba’t-ibang parte ng daigdig.

Pinakawalan ni Saso, dating Youth Olympic Games silver medalist, ang anim na birdies sa round 2 upang mapawi ang epekto ng dalawang bogeys at isumite ang kartadang 69-67 pagkatapos ng dalawang araw ng kompetisyon. Ito ay sapat na para pangunahan ang mga pro golfers ng LPGA bitbit ang kabuuang iskor na 6-under-par 136 strokes.

Noong 2020, sumali rin sa prestihiyosong kaganapan si Saso at nakuha niya ang pang-13 puwesto. Isang palo sa likod ng 19-taong-gulang na dalagitang Pinay ay si Lee Jeongeun (137) na nagsosolo sa pangalawang baytang habang magkasalo naman sa pangatlo at pang-apat na puwesto sina Megan Khang (138) at ang Amateur tinedyer na si Megha Canne (138). Nasa panglimang upuan si Shanshan Feng (139) ng China.

Kasama sa mga ginulat ni Saso sina South Korean Imbee Park, US bet Lexi Thompson at overnight leader Mel Reid ay kasalukuyang nakasalampak sa pang-anim hanggang pangsiyam na puwesto.

Galing si Saso, dating double gold medalist ng Asian Games, sa isang top 10 performance sa JLPGA Chukyo TV Bridgestone Ladies Open na ginanap sa Chukyo Golf Course ng Ishino, Aichi, Japan. Swak din kamakailan ang Fil-Japanese parbuster sa unang sampu ng LPGA Lotte Championships kamakailan sa Oahu, Hawaii.

Nagsisilbing bahagi ng paghahanda ni Saso para sa nabinbing Tokyo Olympics ang pagsali sa US Women’s Open. Kasalukuyang nasa pang-22 na puwesto ang Pinay parbuster sa listahan ng 60 manlalaro na papayagang sumali sa Olympics ngayong Hulyo. Inaasahang makakasama ni Saso sa Olympics si 2-time SEA Games gold medal winner Bianca Pagdanganan.

Super GM So, runner-up sa FTX Crypto Tour Cup

ni Eddie M. Paez Jr. - @Sports | June 05, 2021

Muling nakita ang mataas na antas ng husay ng tubong Cavite na si Grandmaster Wesley So sa online chess nang makuha niya ang runner-up honors sa $320,000 Meltwater Champions' Chess Tour: FTX Crypto Cup na nilahukan ng karamihan ay mga pinakamalulupit na chessers sa buong daigdig.

Hinatak niya sa isang gitgitang duwelo si world champion GM Magnus Carlsen ng Norway sa finals. Sa unang araw, kapwa kumuha ng 2 puntos sina So at Carlsen, isang resultang naulit sa pangalawang araw. Dahil dito, nauwi sa tatlong Armagedon matches ang sagupaan. Sa Game 1, nangibabaw si So pero nagwagi sa huling dalawang laro ang Norwegian kaya nito nakuha ang korona.

Nagsilbing resbak ni Carlsen ang korona kontra sa dating hari ng ahedres sa Pilipinas. Bago ang torneo, dalawang beses nang nagkampeon sa Tour si So. Sa parehong pagkakataon, sila ng Norwegian ang nagharap sa finals at dalawang beses niya itong nasingitan sa trono. Nang una (Skilling Open) ay nataong nagdiriwang si Carlsen ng kaarawan at noong pangalawa (Opera Euro Rapid) ay noong Araw ng mga Puso.

Sa buong Tour sina So at Carlsen lang ang may tigalawang korona. Ang karibalang Carlsen-So ay unang napunta sa centerstage noong magharap sila para sa korona ng pinakaunang World FIDE Fischer Random Chess Championships. Sa hindi inaasahang resulta, inilampaso ni So si Carlsen sa harap ng mga kababayang Norwegians.

Nakasampa sa finals ng Crypto Cup ang 2-time US Champion na si So matapos pumanglima sa qualifiers at matapos walisin sa knockout stage sina Maxime Vachiere Lagrave ng France at Ian Nepomniachtchi ng Russia. Nagsilbing “KJ” si So sa mga fans sa pagpasok niya sa championship match-up dahil umaasa ang marami na makikita nila ngayong Hunyo ang isang world championship preview sa pagitan nina Carlsen at Nepomniachtchi.

Pagunsan, alin ang pipiliin,Tokyo Olympics o British Open?

ni Eddie M. Paez Jr. - @Sports | June 03, 2021

Hindi pa marahil tiyak ni champion golfer Juvic Pagunsan ang sagot sa katanungang ito ngunit malamang na pag-iisipan niyang mabuti kung saka-sakali kung saan sa dalawang makasaysayang bakbakan siya papalo sa mga susunod na linggo.

Kasalukuyang nasa pang-50 ang posisyon ng Pinoy sa 60 piling golfers na papayagang sumali sa Olympiad at tatlong linggo na lang ang natitira bago ito makumpirma. Ang upuan niya sa “The Open” ay kumpirmado nang naghihintay sa kanya.

At habang nagmumuni-muni ang premyadong parbuster ng Pilipinas, sasabak muna ito sa Japan Golf Tour (JGT) Championship Mori Building Cup na masasaksihan sa Shishido Hills Country Club ng Kasama, Ibaraki, Japan.

Mataas ang kumpiyansa ni Pagunsan sa paglahok sa paligsahang may cash pot na JPY 150,000,000 (kabilang na ang JPY 30,000,000 sa magwawagi) dahil sa nakalipas na tatlong torneo ay dalawang beses siyang nakapasok sa podium.

Noong isang linggo, nakita ang kanyang pamatay na abilidad sa kabila ng tindi ng atake ng mga karibal mula sa Japan, India at Australia at matagumpay na inangkin ang trono ng Gateway To The Open Mizuno Open na ginanap sa Setonaikai Golf Club ng Okayama, Japan. Kumana siya rito ng 20 birdies kontra sa tatlong bogeys tungo sa pagposte ng iskor na 199. Tatlong palo ang naging agwat niya sa pinakamalapit na karibal.

Bukod sa karapatang matawag na kampeon sa Japanese Tour sa unang pagkakataon at sa pabuyang JPY 16,000,000 na natanggap bilang kampeon, nakuha rin ng tubong Bacolod na golfer ang pasaporte para muling makasali sa makasaysayang British Open, kilala rin sa bansag na The Open, sa England sa pangalawang pagkakataon.

Kamakailan din ay niregaluhan niya ang kanyang sarili ilang araw pagkatapos ng kanyang ika-43 na kaarawan sa pamamagitan ng isang runner-up finish (mainit na 9-under-par 279 strokes mula sa rounds na 69-71-70-69) na nagkakahalaga ng Php 4.8M sa Asia Pacific Diamond Cup (ginanap sa palaruan ng Sagamihara Country Club, Kanagawa, Japan).