Golfer pagdanganan, nagpakabog sa LPGA U.S.

ni Eddie M. Paez Jr. - @Sports | June 12, 2021

Binigyan ni Pinay parbuster Bianca Pagdanganan ng magandang tsansa ang kanyang sarili para sa isang podium finish o posibleng isang korona sa prestihiyosong Ladies Professional Golf Association (LPGA) matapos itong magpakawala ng isang sub-par round sa Mediheal Championships na ginanap sa palaruan ng Lake Mercedes ng Daily City, California.

Nagsumite si Pagdanganan ng one-under-par 71 (galing sa 5 birdies, 2 bogeys at isang masaklap na double bogey) upang makaupo sa pang 14, na tatlong palo lang ang layo sa isang puwesto sa podium. At kung pagbabasehan ang naging pagsampa ni Yuka Saso sa 76th LPGA Women’s Open Championships kung saan kumurap ang mga dating tumatrangko at rumatsada hanggang sa huling mga butas, ang “tatlong palo” ay hindi malaking balakid para kay Pagdanganan.

Bagama’t maganda ang tsansa, 28 iba pang lady golfers mula sa iba’t-ibang bansa ang may malinaw na daan din sa podium kagaya ng Southeast Asian Games double gold medalist mula sa Pilipinas na si Pagdanganan.

Si Pagdanganan ay kasalukuyang naghahanda para sa pagpalo sa isang LPGA Majors ngayong Hunyo (KPMG Women’s PGA Championship sa Georgia) at sa paglahok sa nabinbing Tokyo Olympics. Ang Pinay ay nasa pang-42 baytang sa listahan ng 60 lady golfers na puwedeng sumali sa Olympiad. Makakasama niya rito si Saso na nasa pangsiyam na posisyon.

Sina Leona Maguire ng Ireland, Thai ace Jasmine Suwannapur, Albane Valenzuela ng Switzerland at local bet Allison Lee ang kasalukuyang tumatrangko sa kaganapang nagtabi ng pabuyang USD 1,800,000 para sa mga papasok sa winners’ circle.

Si US Women’s Open 3rd placer Lexie Thompson ng U.S.A ay meron ding iskor na 71 sa torneo kagaya ni Pagdanganan. Ang top 2 finishers ng nakalipas na Golf Majors (Saso at Haponesang si Nasa Hataoka) ay hindi sumali.

Golfer Olympian Saso, hahataw uli sa LPGA Major

ni Eddie M. Paez Jr. - @Sports | June 11, 2021

Tila nakalinya si Fil-Japanese Yuka Saso sa pangalawang sunod na korona sa malupit na Ladies Professional Golf Association (LPGA) tour kung sakaling mapagwagian niya ang KPMG Women’s PGA Championships na gaganapin simula Hunyo 24 hanggang 27 sa palaruan ng Johns Creek, Georgia.

Kasali na rin ang mga Pinay na sina Bianca Pagdanganan at Dottie Ardina sa kompetisyong naglatag ng $4,500,000 gantimpala sa mga magmamarkang kalahok. Si Pagdangan ay nakakuha ng tiket sa event dahil nakapasok siya sa top 10 ng 2020 KPMG Tournament noong siya ay isang rookie. CME Globe Points ang naging pasaporte ni Ardina papasok sa event.

Ang pagwawagi ni Saso sa isang major event ang naging tuntungan niya sa kompetisyon. Sariwa si Saso, nasabitan ng dalawang gold medal noong huling Asian Games, sa paggawa ng kasaysayan bilang pinakabatang reyna ng U.S. Women’s Open Championships sa California at pinakaunang parbuster mula sa Pilipinas na namayagpag sa isang major golf event. Halagang $1,000,000 ang naging gantimpala ng dalagitang Pinay. Ang tagumpay ay isa sa mga hindi malilimutan sa kasaysayan ng pro golf. Halos wala na sa eksena para sa korona si Saso sa round 4 dahil sa back-to-back double bogey sa pangalawa at pangatlong butas. Pero nakahabol siya sa trangko sa dulo ng hole 18 at nagwagi sa pamamagitan ng playoff.

Sumibad din siya sa pang-9 na baytang sa Rolex Women’s World rankings at ngayon ay awtomatiko nang selyado ang upuan niya sa nabinbing Tokyo Olympics na ilang linggo na lang ang layo at sisimulan na.

Napantayan ni Saso, dating silver medalist sa Youth Olympic Games, ang naitala ni South Korean Imbee Park noong 2008 dahil pareho silang 19 taon, 11 buwan at 17 araw nang maging reyna ng prestihiyosong kompetisyong inilatag sa lubhang mapanghamong palaruan.

Gomez, umentra na sa round-of-16 ng World Pool

ni ATD \ Eddie M. Paez, Jr. - @Sports | June 10, 2021

Habang tumatagal ay lalong bumabangis sa tumbukan si Pinoy cue master Roberto Gomez.

Tila walang iniisip na pandemya dulot ng coronavirus (COVID-19) si Gomez dahil naka-pokus ito sa kanyang kampanya.

Swak sa round-of-16 si 42-year-old Gomez matapos nitong sargohin ang 11-7 panalo laban kay Aloysius Yapp ng Singapore nang magharap sa last 32 ng prestihiyosong World Pool Championship sa Marshall Arena, Milton Keynes, kahapon. Bago pinayuko ni Gomez si Yapp sa event na ipinatutupad ang double-elimination format ay kinalos muna nito si Muhammed Daydat ng Africa, 11-2 sa last 64.

Makakalaban ni Gomez sa susunod na phase sa tournament na nakalaan ang $50,000 premyo sa magkakampeon ay ang tigasin sa USA na si Skyler Woodward. Para dumiretso sa quartefinals, kailangan manalo si Gomez sa kanyang laban at mananatili ang tsansa nitong makuha ang korona.

Samantala, maliban kay Gomez, kasali rin si Pinoy Jeff De Luna sa nasabing event pero napatalsik na ito sa torneo matapos lumasap ng dalawang sunod na kabiguan.

May isa pang Pinoy na kasali, ito'y si Jeffrey De Luna pero maaga itong napatalsik sa torneo matapos makalasap ng dalawang sunod na kabiguan.

Si Woodward ng U.S.A. ay may mataas na kumpiyansa matapos na pauwiin si 2019 World 9-Ball Championships winner Fedor Gorst ng Russia, 11-8. Nauna rito, naungusan ni Gomez, minsan naging kampeon ng Derby City Classic Bigfoot Challenge, si Swiss bet Stewart Colclough, 9-8, at si 2016 world 9-ball championship winner Albin Ouschan ng Austria, 9-7, sa preliminaries ng kaganapang isinasaayos ng World Pool Billiards Association (WPA) at umakit ng matitinding manunumbok mula sa maraming bahagi ng daigdig.

Kung magtatagumpay sa paligsahan, mapapabilang ang tubong Zamboanga na cue artist sa mga Pinoy world champions na sina Efren “Bata” Reyes (8-Ball/2004, 9-Ball/1999), Alejandro “The Lion” Pagulayan (9-Ball/2004), Ronnie “The Volcano” Alcano (8-Ball/2007, 9-Ball/2006), Francisco “Django” Bustamante (9-Ball/2009), Dennis “Robocop” Orcullo (8-Ball/2011) at Carlo “The Black Tiger” Biado (9-Ball/2017).

Hindi ito ang unang salang ni Gomez sa kompetisyon. Minsan na siyang pumangalawa sa prestihiyosong pagtitipon, mahigit isang dekada na ang nakararaan.