Garcia, hari sa 10-Ball ng Junior Norris shootout

ni Eddie M. Paez Jr. - @Sports | July 22, 2021

Nagmistulang palaruan ng cue artists mula sa Pilipinas ang 7th Annual Junior Norris Memorial Shootout "Chase The Champion" nang magwagi ang mga ito sa 9-Ball at 10-Ball na bakbakan bukod pa sa pagpapadala ng dalawang kinatawan sa winners' circle ng lahat ng tatlong events na ginanap para sa kalalakihan kamakailan.

Hinirang na hari si Roland Garcia sa 10-Ball nang daigin niya sa finals si Carlo Biado ng event na nasaksihan sa Maskat Shrine Ballroom ng Wichita Falls, Texas. Matatandaang sila ang nagharap noong 2017 World 9-Ball Championships sa Qatar. Sa nabanggit na duwelo, si Biado ang naging kampeon at si Garcia ang pumangalawa. Ang Amerikanong si Rick Stanley ang pumangatlo habang sa pang-apat na baytang lang umabot si Fedor Gorst ng Russia.

Naging pabuya ni Garcia dahil sa tagumpay ang halagang $2,031 at nagkasya si Biado, may hawak ng pang-28 upuan sa 2021 AZBilliards Moneyboard, sa pakonswelong $1,364.

Sa 9-ball na tumbukan, ipinoste ni Fargo no. 76 Edgie Geronimo at ang alamat na si Efren “Bata” Reyes ang isang 1-4 na pagtatapos para sa Pilipinas. Halagang $4,550 at $1,015 ang ibinulsa nila ayon sa pagkakasunod-sunod. Si USA bet Justin Espinosa (2nd, $3,035) at Gorst (3rd, $1,680) ang pumagitna sa dalawang matitikas na Pinoy.

Pinatid ni Gorst, Russian hotshot na minsan nang naging world junior 9-ball titlist at naging hari rin ng World 9-Ball Championships, ang winning streak ng mga kinatawan ng lahing-kayumanggi at pinangunahan ang mga lumahok sa 10-Ball Ring Game. Inangkin niya rin ang top purse na $1,700. Pero nakihati pa rin sa center stage sina Biado (nang sumegunda siya) at Garcia (matapos makuha ang pang-apat na baitang). Si local bet Shane McMinn ay hinirang na 2nd runner-up.

Korona ng PRO winner Billiard, kinuha ni Pulpul

ni Eddie M. Paez Jr. - @Sports | July 20, 2021

Ipinoste ng dehadong si Demosthenes “Plong Plong” Pulpul ng Cagayan De Oro ang isa sa pinakahiganteng kampanya sa kanyang paglalaro ng bilyar kontra sa ilang makikislap na pangalan sa Pilipinas upang maangkin ang korona ng unang Pro Winner Take All sa palaruan ng House Manila Pool Bar and Lounge sa Pasay City.

Sa isang hill-hill na pagtatapos, dinaig ni Pulpul, sumegunda kay Efren “Bata” Reyes noong 2014 Manny Pacquiao Cup, ang isa pang hindi gaanong matunog na bilyarista sa katauhan ni Michael Baoanan, para sa kampeonato.

Kasama sa mga nag-ambisyong maiuwi ang korona ngunit pawang nabigo ay sina Lee Van “The Slayer” Corteza, Johann “Bad Koi” Chua at Jeffrey “The Bull” De Luna. Ang tako ni Corteza ay lubhang mainit ngayong panahon ng pandemya. Ang tubong Davao na minsan nang naging World 14.1 Straightpool titlist ang nagwagi sa bakbakan na binansagang “Rotation: Reyes, Bustamante, Alcano, Biado, Banares, Corteza, Raga, Ignacio” sa Shark’s Billiards Hall noong Marso. Siya rin ang namayagpag sa katatapos na Speed Pool Challenge sa Lungsod pa rin ng Quezon.

Si Chua, 29-taong-gulang mula sa Bacolod, ay dalawang beses nang naghari sa malupit na Japan Open samantalang ang 37-anyos na si De Luna, naging Asian Games silver medalist, ang kinatawan ng bansa sa 2021 World Cup of Pool, World Pool Masters at World 9-Ball Championship sa England.

Samantala, nasikwat ni 2017 Word 9-Ball Championship runner-up Roland Garcia ng Pilipinas ang pangalawang puwesto sa Billiards and Cue Expo One Pocket Tournament sa Desmond, Iowa. Ang torneo na pinagwagian ni Shane Boening ng USA ay nilahukan din ng dating hari ng 9-ball sa buong mundo na si Alex “The Lion” Pagulayan, Fedor Gorst (Russia), Billy Thorpe (USA), Warren Kiamco at Carlo Biado.

Letran vs. Lyceum sa online final; Predators at Bravos, BIDA sa PCAP

ni VA / Eddie M. Paez Jr. - @Sports | July 17, 2021

Nakatakdang maglaban ang season host Letran at Lyceum of the Philippines University sa finals ng NCAA Season 96 juniors online chess tournament. Ang tapatan ng dalawang kinatawan ng dalawang nabanggit na NCAA member schools ay naitakda matapos nilang mamayani sa kani-kanilang semifinal matches.

Umabot ng finals para sa Squires si Christian Mark Daluz matapos niyang talunin ang isa pang kinatawan ng Junior Pirates na si Paul Matthew Llanillo sa semifinals. Bumawi naman si Leonel Escote sa pagkatalo ng kakamping si Llanillo nang pataubin nito ang nakatunggaling si Melson John Gallo ng JRU upang makatungtong ng kampeonato.

Naputol ang koneksiyon ni Gallo sa internet habang nagaganap ang laro at nabigo ng makabalik pa na naging sanhi ng pagkabigo.

Sa araw na ito ang pagtutuos nina Daluz at Escote para sa titulo habang pinaglabanan na kahapon nina Llanillo at Gallo ang ikatlong puwesto.

Samantala, pinangunahan ng mga bigating San Juan Predators at Manila Indios Bravos ang mga koponang matagumpay na nakausad na sa maigting na knockout rounds ng import-flavored 2021 Professional Chess Association of the Philippines (PCAP) Wesley So Cup Conference na ginaganap online.

Nawala naman sa anunsiyo ang pamamayagpag ng Cordova Duchess Dagami Warriors sa Southern Division ng event na kinikilala ng Games and Amusement Board (GAB) at sinusuportahan ng tubong Cavite na chesser at dating hari ng ahedres sa Pilipinas na si Grandmaster Wesley So.

Kumartada ang San Juan ng 31 panalo mula sa 34 na matches sabay kamada ng 499 puntos para makapasok sa yugtong lalapatan ng “isang kurap, uwi na” na tuntunin. Nakaiskor ang Manila ng 30 tagumpay kontra sa apat na talo. Nakaipon din ang koponan ng 438 puntos. Kapwa hinihintay pa ng dalawang topseeds ang makasasagupa sa knockout round.

Maliban sa San Juan at Manila, mula sa Norte, nakahakbang na rin sa susunod na bahagi ng kompetisyon ang All Filipino titlist na Laguna Heroes (26-8; 471 puntos), Caloocan Loadmanna Knights (26-8; 445.5 puntos) at Antipolo Cobras (25-9; 437 puntos).