'Black Tiger,' umakyat sa 10th ang world ranking

ni Eddie M. Paez Jr. - @Sports | September 26, 2021

Muling kinilala ng World Pool Billiards Association (WPA) ang galing ni Pinoy billiards star “Black Tiger” Carlo Biado matapos siyang iakyat mula sa pangsampung baitang papunta sa pangatlong posisyon sa pandaigdigang rankings.

Base sa pinakahuling talaan ng WPA, may nakadikit sa pangalan ni Biado na 20,625 puntos kaya niya nalundagan ang pitong iba pang manunumbok na dati ay nakakaangat sa kanya. Malaking bagay rito ang paggawa niya ng kasaysayan matapos magwagi sa U.S. Open sa Atlantic City.

Sa naturang kompetisyon, nakakolekta ang dating World 9-Ball king at dating World Games gold medalist ng 7,875 puntos. Nakahagip din siya ng 3,000 puntos matapos makapasok sa quarterfinals ng World 10-Ball Championships sa Nevada.

Itinuturing pa ring pinakamalupit na cue artist sa buong mundo si Shane Van Boening ng U.S.A. dahil sa kanyang 29,177 puntos na kartada habang malayong segunda ang Kastilang si David Alcaide Bermudez (20,628.5 puntos). Dalawang Asyano ang nakabuntot kina Boening, Bermudez at Biado. Ito ay sina Naoyuki Oi ng Japan (20,467 puntos) at Singaporean Aloysius Yapp (20,316 puntos). Si Bermudez ang tinapakan ni Biado sa round-of-16 habang si Yapp ang dinaig niya sa championship round ng U.S. Open sa pamamagitan ng isang impresibong 10-0 finishing kick.

Ang natitirang 5 upuan sa top 10 ay inangkin ng mga Europeans: 6. Jayson Shaw (Scotland, 19,915), 7. Maximillian Lechner (Austria, 19,637 puntos), 8. Joshua Filler (Germany, 19,115), 9. Fedor Gorst (Russia, 17,312 puntos) at 10. Albin Ouschan (Austria, 17, 190 puntos).

Orcullo, champ sa Texas One Pocket Tournament

ni Eddie M. Paez Jr. - @Sports | August 29, 2021

Ipinatong sa ulo ni Pinoy Robocop Dennis Orcullo ang korona sa Texas Open One Pocket Tournament matapos niyang dominahin ang winner’s sa bracket at ang maigting na kompetisyong nasaksihan sa palaruan ng Skinny Bob’s sa Round Rock, Texas sa pamamagitan ng malinis na kartada.

Sinagasaan ng dating world 8-ball champion (2011) ang mga nakasagupa niyang sina Pedro Botta (5-1; round 1), Kuwaiti Omar Alshaheen (5-3; round 2), Finnish Mika Immonen (5-0; round 3), Amerikanong si Corey Deuel (5-2; round 4), USA bet Josh Roberts (5-2) at si Roberts uli sa finals sa isang pagtuturo ng leksyon (5-1) para makandaduhan ang korona sa torneong may double elimination na format.

Ang walang mantsang performance sa race-to-5, alternate break na tuntuntin sa mga bakbakan sa Texas ay nagbigay sa Pinoy, nagbigay rin ng titulo sa Pilipinas bilang kampeon ng World Cup of Pool katambal si Lee Van “The Slayer” Corteza, ng gantimpang $15,500 bilang kampeon. Napanatili rin ni Orcullo ang paghawak sa trangko ng 2021 AZBilliards Moneyboard.

Samantala, halagang $10,000 naman ang naging pabuya ni Roberts (5 panalo, 2 talo) bilang segunda. Si World Pool Billiards Association (WPA) no. 2 Shane Van Boening (7 panalo, 2 talo) ng Estados Unidos ang nakakuha ng huling upuan sa podium pati na ang pakonsuwelong papremyong $5,000.

Kasama sa mga nag-ambisyong mag-podium sa paligsahan pero umuwing nganga sina 2017 World 9-Ball Championship winner Carlo “The Black Tiger” Biado, Roberto “Superman” Gomez, Warren “The Warrior” Kiamco, 2017 World 9-Ball Championships runner-up Roland Garcia, 2004 World 9-Ball titlist Alex “The Lion” Pagulayan, Canadian John Moora, Sky Woodward ng USA at ang Hapones na si Naoyuki Oi.

Arevalo, palapit na sa LPGA nang makalusot sa Q'Fying

ni Eddie M. Paez Jr. - @Sports | August 24, 2021

Nakatakdang madagdagan ang bilang ng mga Pinay na sumasabak sa malupit na Ladies Professional Golf Association (LPGA) Tour matapos malusutan ni Southeast Asian Games gold medalist Abegail “Abby” Arevalo ang katatapos na Qualifying School Stage 1 Tournament sa California.

Maluwag na nakapasok sa Stage II si Arevalo sa bakbakang ginanap sa iba’t-ibang golf courses (Mission Hills Country Club; Rancho Mirage; Shadow Ridge Golf Club) matapos itong umiskor ng 3-under-par 285 strokes pagkatapos ng 4 rounds. Ito ay sapat na para makuha niya ang pang-33 na posisyon sa paligsahang binigyan ang top 95 scorers para umusad sa susunod na yugto.

Ang Stage II ay gaganapin simula Oktubre 18 hanggang 24 samantalang ang pinal na yugto (Q-Series) ay papalo sa Nobyembre at Disyembre. Pagkatapos ay ilalabas na ang listahan ng mga puwedeng maglaro sa LPGA sa 2022. Sa kaugnay na kaganapan, ang husay ng mga Pinay parbusters na sina Yuka Saso at Bianca Pagdanganan ay lumutang sa ilang mga departamento ng LPGA.

Sa larangan ng Average Driving Distance, pumapangalawa si Pagdanganan dahil sa kanyang kartadang 285.021 yarda. Ang double gold medalist ng 2019 Southeast Asian Games ay bumubuntot sa nangungunang si Dutch Anne Van Dam. Ang pambato ng Netherlands ay may rekord na 292.237 yarda ngunit angat ang Pinay sa pumangatlong si South Korean A. Lim Kim (279.829 yarda).

Pangalan ni Saso ang kasama sa Moneyboard centerstage dahil ang apagwagian nang salapi sa bakbakang LPGA ay umabot na sa $ 1,212,225. Nasa harapan niya sina world no. 1 Nelly Korda (USA) at si Lydia Ko ng New Zealand. Sina Korda (gold) at Ko (bronze) ay kapwa nagmarka sa katatapos na Tokyo Olympics.

Nasa pang-apat din si Asian Games champion Saso sa pinakamataas para sa Rolex Annika Major Award dahil sa naipong 60 puntos. Naging pasaporte ng 20-anyos na Fil-Japanese ang pagkopo ng korona sa 2021 U.S. Open sa isang makasaysayang resulta.