Fil-Jap Saso, sasabak sa U.S. Pelicans C'Ships

ni Eddie M. Paez Jr. - @Sports | November 7, 2021

Sasalang si Fil-Japanese Yuka Saso sa LPGA Pelican Women's Championships sa Nobyembre 11 hanggang 14 sa Belleair, Florida at umaasa ang Pinoy sports fans sa Pilipinas na makakasikwat pa ng karagdagang karangalan para sa bansa ang dalaga bago tuluyang pumalo sa mundo ng professional golf bilang kinatawan na ng Japan.

Matagumpay namang nakapasok si Carl Jano Corpus sa weekend play ng Asia Pacific Amateur Golf Championships sa Dubai. Ngunit ang kartada ng Pinoy na 1-under-par ay nagtulak sa kanya palabas ng top 10 kaya kailangan pa nitong humataw sa natitirang mga butas sa kompetisyon.

Kamakailan ay napabalitang pagsapit ng 22-anyos ay pipiliin na ni Saso ang pagiging Japanese citizen. Ito ay magiging pangalawang panghihinayangan ng mga sports buff ng Pilipinas. Ang una ay nang tumawid ng pederasyon mula sa Pilipinas papunta sa USA ang ngayon ay FIDE World Random Fischer Chess champion na si Grandmaster Wesley So.

Sa ngayon ay sumasabak si Saso, reyna ng prestihiyosong U.S. Open at may-ari ng dalawang gintong medalya mula sa Asian Games, sa Japan LPGA major event na Toto Open. Nakaupo siya sa pulutong ng mga umaalagwa sa torneong nasa penultimate round na bitbit ang 6-under-par 211 na kartada. Ito ay pitong palo ang layo sa trangko na idinaraos sa 6,616 yardang Seta Golf Club ng Shiga, Japan.

Sa bakbakang Pelican kung saan $1,750,000 ang kabuuang pabuya para sa mga magpopodium kabilang sa mga magiging karibal ni Saso sina Rolex World no.1 Jim Young Ko ng South Korea, Tokyo Olympic gold medalist Nelly Korda mula sa USA, LPGA Rookie of the Year, ANA Majors winner at Thai ace Patty Tavatannakit, Rolex World no. 4 South Korean Sei Young Kim.

Pagkatapos sa Toto Japan Open at Pelican ay papalo uli siya sa US sa LPGA season ender na CME Group Tour Championships sa Naples, Florida sa Nobyembre 18-21.

GM So, 3-time US Chess champion na

ni Eddie M. Paez Jr. - @Sports | October 22, 2021

Ipinako ni U.S. Grandmaster Wesley So ang pangatlong titulo sa kasaysayan ng U.S. Chess Championships kahapon matapos na maungusan sa play-offs sina GM Sam Sevian at dating world challenger GM Fabiano Caruana sa pagtatapos ng 2021 edisyon ng face-to-face na prestihiyosong paligsahan sa Saint Louis.

Pagkatapos ng 11-yugtong round robin, pare-parehong nakaipon ang troika ng tig-aanim at kalahating puntos para pansamantalang pagsosyohan ang unang baytang.

Dahil dito, kinailangang magrambulan ng tatlo para malaman kung sino ang magiging kampeon. Unang nakasikwat ng panalo si So laban kay Italian-American Caruana bago winasak ang hamon ni Sevian para sa korona. Si speed chess demon GM Hikaru Nakamura ay hindi lumahok sa tunggalian.

“I thought the tournament was pretty much over by yesterday, Fabiano almost won three games in a row,” pahayag ng nagagalak na si So matapos mauwi sa playoff ang event.

Bukod sa tagumpay ngayong taong ito na nagkakahalaga ng $50,000, ang 28-taong-gulang na dating hari ng ahedres sa Pilipinas mula sa Cavite na sumuporta rin sa Professional Chess Association of the Philippines (PCAP) 2nd Conference ay namayagpag sa torneo noong 2017 at 2020. Sina Caruana at Sevian ay nagbulsa ng $30,000 bawat isa bilang pabuya sa pagiging runners-up.

Makislap ang nagiging paglalakbay ni So, kasalukuyang FIDE World Random Fischer Chess champion, ngayong panahong patuloy na umaatake ang pandemya. Kamakailan ay hinirang siyang 2021 Grand Chess Tour titlist. Naitakas din ni So ang pangalawang puwesto sa isang nakahihilong pagtatapos ng Champions Showdown: Chess 9LX sa Saint Louis, Missouri kung saan kamuntik pang maghari si dating world champion at ngayon ay 58-anyos nang si Garry Kasparov.

Lorenzo at Laxamana, champs sa Nat'l online chess-Luzon

ni Eddie M. Paez Jr. - @Sports | October 10, 2021

Hindi napahiya ang mga eksperto nang dominahin nina pre-tournament favorites Aaron Kimuel Lorenzo at Jasper John Laxamana pagkatapos ng pitong yugto ang online na sagupaang tinawag na Philippine National Chess Championships - Luzon Leg.

Kalmanteng kinandaduhan nina 2nd seed Lorenzo ang titulo sa tulong ng natipong 6.5 puntos (anim na panalo at isang draw sa huling round) mula sa pitong salang sa board. Kabuuang 5.5 puntos at mas makinang na tiebreak output naman ang sinandalan ni Laxamana para makuha ang karangalan bilang runner-up.

Pero nasira ang anunsyo sa topseed na si Gil Virgen Ruaya nang pumang-apat lang ito sa likod ni 12th seed Joseph Lawrence Rivera na nakasalisi sa huling upuan sa podium ng kompetisyong isinaayos ng National Chess Federation of the Philippines o NCFP.

Sinagasaan ni Lorenzo, may rating na 2201, sina pre-tournament top bet Ruaya nung panglimang yugto, no. 5 Francis Talaboc (round 6), 10th ranked Emmanuel Asi (round 4), Cassandra Arleah Salian (29th seed, round 1), Bryan Vincent Paragas (21st seed, round 2) at Raymond Leonard Reyes (19th seed, round 3) bago Ito nagmenor sa huling round sa pamamagitan ng isang tabla laban kay 3rd ranked Laxamana nang sigurado na siya sa trono.

Dahil sa tagumpay, nakapagposte si Lorenzo, may rating lang na 2201 bago nagsimula ang torneo, ng performance rating na 2338.

Samantala, nakuha ni Woman FIDE Master Glo Samantha Revita ang unang puwesto sa Wilfredo Neri Memorial Cup - Open Category. Pito at kalahating puntos ang rekord ni Revita sa siyam na rounds na paligsahang ginanap sa unang pagkakataon. Pumangalawa si AGM Henry Lopez sa tulong ng kanyang 6.5 puntos at mas mataas na outbreak points habang pumangatlo si NM Joey Albert Florendo (6.5 puntos).