Bitoon at Buto, umangat sa UAE at Rizal Chess

ni Eddie M. Paez Jr. - @Sports | January 11, 2022

Kinoronahan ni Jerson Bitoon ang sarili bilang hari ng ahedres sa isang bakbakan sa United Arab Emirates samantalang patuloy ang pagpapakita ng paslit na si Al-Basher Buto ng kanyang angas bilang isang mandirigma ng kinabukasan matapos manguna sa isang torneo sa Rizal.

Walang mantsang nakita sa mga sulong ni Bitoon (rating: 1837) kaya pagkatapos ng anim na yugto ay may kartadang 6-0-0 panalo-talo-tabla na siya para sa matagumpay na pag-akyat sa trono ng JBR Social Chess Tournament sa Dubai. Sinagasaan ng pre-tournament favorite na Pinoy sina(Pilipinas, round 1), Oliver Pointinger (Austria, round 2)), Kingshuk Debnat (India, round 3), Raghav Shetty (India, round 4), Khush Mehta (India, round 5) at Agustin Manresa (Spain) nung huling yugto para maselyuhan ang korona.

Nakuntento sa pagiging segunda sa likod ng kampeon si Indian chess warrior Debnath (rating: 1836) nang makaipon siya ng limang puntos (5-1-0) habang nahablot ni Shetty (rating: 1592) ang huling upuan sa podium bitbit ang apat na puntos (4-2-0). Nakasunod sa kanila ang kapwa Pinoy na si Kindipan at si Austrian Pointinger.

Sa kabilang dako, kumulekta si Buto, 12-taong-gulang, ng halos perpektong 5.5 puntos mula sa anim na salang board tungo sa pagkuha ng titulo sa Goldland Chess Tournament sa Cainta. Ang limang mga panalo at isang tabla ay nasaksihan sa face-to-face na paligsahang nilapatan ng 15-minuto, 1-segundong tuntunin ay nagsilbing magandang regalo sa birthday boy na kampeon.

Malayong pangalawa si Reynante Gacal (4.5 puntos) samantalang nagsosyo sa pangatlong baitang ang quartet nina Christian Alcira, Joey Lapurga, Ruden Cruz at Rohanisa Buto dahil sa rekord nilang tig-aapat na puntos. Bumuntot naman sa kanila si Richard Haiden Alarma (3.5 puntos).

Saso, papalo sa Tournament of Champions sa Florida

ni Eddie M. Paez Jr. - @Sports | January 10, 2022

Nakatakdang humataw si Rolex Women’s World No. 8 Yuka Saso ng Pilipinas sa Hilton Grand Vacation Tournament of Champions sa palaruan ng Lake Nona Golf Course ng Orlando, Florida simula sa Enero 20 hanggang 23 sa isang mainit na pagsalubong ng prestihiyosong Ladies Professional Golf Association o LPGA ngayong 2022.

Bagamat nakatakdang maging isang Japanese citizen kapag sumampa sa edad 23, ang bandila pa rin ng Pilipinas ang kinatawan ng 20-anyos na Fil-Japanese sa kompetisyong sa nila larangan ng kabuuang papremyong US$1,500,000 at lalahukan lang ng mga pili at kampeong lady parbusters mula sa iba’t-ibang bahagi ng daigdig.

Galing si Saso, dating Asian Games double gold medalist, sa isang produktibong taon sa pro circuit sa US. Isinulat niya ang kasaysayan bilang isa sa dalawang pinakabatang manlalaro na naging kampeon sa isang major golf tournament nang hirangin siyang reyna ng US Open. Ilang top 10 performances (Cognizant Founder’s Cup, 4th; Lotte Championships, 6th; Arkansas Championships, 4th) ang ipinoste rin niya sa LPGA rookie season bukod pa sa isang top 9 na laro sa Tokyo Olympics.

Pero puro malulupit ang kalibre ng mga kalahok na sasagupain niya sa paligsahan sa Florida. Kasama sa listahan sina dating British Open queen Sopia Popov ng Germany, world no. 4 Imbee Park ng South Korea, Haponesang si Nasa Hataoka na pang-anim sa buong mundo, world no. 1 at Olympic champion Nelly Korda ng USA, Rio Olympics silver medalist at Tokyo Olympics bronze medalist Lydia Ko mula sa New Zealand, world no. 23 Ariya Jutanugarn ng Thailand, world no. 11 Danielle Kang ng USA at French star Celine Boutier (world no. 29).

Sa kasalukuyan ay 29 lady golfers lang ang pinapayagang lumahok sa bakbakan.

Yearender: Biado, Orcullo at Alvarez, umangkla sa 2021

ni Eddie M. Paez Jr. - @Sports | December 30, 2021

Inasahan sa larong bilyar ang tatag ng pulso at tikas ng mga batikang sina “Black Tiger” Carlo Biado at “Robocop” Dennis Orcullo gayundin sa potensiyal ni “Wonderboy” Elijah Alvarez upang pakislapin ang bandila ng Pilipinas sa nakalipas na 12 buwan ng pandemya.

Nakapasok din si Johann “Bad Koi” Chua, two-time Japan Open titlist, sa podium ng World 10-Ball Championships habang napabilang sa top 10 sina Biado at Orcullo ng mabagsik na Fargo Rating. Idinagdag ni Biado, 2017 World 9-Ball Championships ruler at 2017 World Games gold medalist, ang U.S. Open 9-Ball na korona (Setyembre; Harrah’s Resort, Atlantic City, New Jersey) sa mahabang listahan ng mga napagwagiang giyera.

Sinundutan din ni Biado ang pangangaldag sa U.S. sa pamamagitan ng pagsungkit sa korona ng Abu Dhabi Open noong Nobyembre sa Powerbreak sa United Arab Emirates.

Pero ang titulo sa Amerika ay hindi malilimutan ng mga disipulo ng bilyar sa bansa dahil pagkatapos ng 27 taon ay muling nakasampa sa trono ng US Open ang isang Pinoy.

Taong 1994 pa nang nagkampeon si Efren Reyes sa prestihiyosong torneo.

Simula noon, bagamat 11 beses na may sumegundang Pinoy ay wala nang kinatawan ang Pilipinas na namayagpag dito.

Sa torneo, pumangatlo si Orcullo bukod pa sa pagkopo ng 16 na titulo sa iba’t-ibang mga paligsahan sa U.S. Nakapasok din siya sa podium sa siyam na iba pang kompetisyon. Ito ang nagtulak sa dating World 8-Ball king World Cup of Pool winner upang maging AZBilliards Moneyboard topnotcher sa pangalawang sunod na taon.

Umangat ang pangalan ni Alvarez sa bakbakang virtual na binansagang Arcadia One Pool Youth matapos niyang itumba sa finals sina Yannick Pongers ng Netherlands, Finland ace Arseni Sevastianov at ang kapwa binatilyong Pinoy na si Keane Rota.