Centeno, swak na sa semis ng US Pro Series

ni Eddie M. Paez Jr. - @Sports | November 19, 2022

Winalis ni Asian 9-Ball champion Chezka Centeno ng Pilipinas ang mga karibal upang makapasok sa semifinals ng US Pro Billiards Series: Medalla Light Puerto Rico Open sa San Juan, Puerto Rico.

Patuloy namang nakatàas ang bandila ng bansa sa kalalakihan matapos maselyuhan nina "The Black Tiger" Carlo Biado at "Superman" Roberto Gomez ang kani-kanyang upuan sa quarterfinals. Tinalo ni Biado si Ping Chung Ko, 2-1, habang 2-0 ang naging armas ni Gomez kontra kay Clark Sullivan sa kanilang duwelo sa round-of-16.

Bokyang iskor ang ipinatikim ng Pinay sa mga Amerikanang sina Maria Juana, 2-0 at Monica Webb, 2-0, bago niya sinilat si 2010 World 10-Ball queen Jasmin Ouschan mula sa Austria sa iskor na 2-1 sa winners' qualification round para magkaroon ng upuan sa yugtong hindi na puwedeng kumurap kung hindi ay maoobliga siyang maging miron na lang.

Sa round-of-16, pinaluhod ni Centeno si Yuki Hiraguchi (2-0) kaya nakapasok na ang una sa quarterfinals. Pagkatapos nito ay ginamit ng Pinay ang panalo kay Sylviana Lu sa quarterfinals, 2-0, para makausad sa final 4 kung saan muli niyang makakaharap si Ouschan.

Tuluyan naman nang naging tagapalakpak si 2-time World 10-Ball Championships winner Rubilen Amit nang dumapa ang Cebuana kay Lu, 0-2, noong preliminary stage.

Nauna rito, tinuruan niya ng leksyon si Amalia Matas bago nasingitan ni Tzu Chien Wei, 2-1.

Gomez, segunda sa U.S. Ohio Pro Billiards Series

ni Eddie M. Paez Jr. - @Sports | October 25, 2022

Nagmarka na naman si Roberto Gomez sa tumbukan sa labas ng bansa nang pumangalawa ang "Pinoy Superman" sa US Pro Billiards Series: Ohio Open sa Roberts Centre ng Wilmington, Ohio. Umangkla si Gomez sa anim na magkakasunod na tagumpay sa malupit na sarguhan kaya nakasampa sa finals bago ito kinapos sa hamon ng nagkampeon si Fedor Gorst ng Russia, 2-0. Sinagasaan niya sa paligsahan sina Dmitri Jungo ng Switzerland (2-0), Amerikanong si Tony Robles (2-0), Riku Romppanen mula sa Finland (2-1, Winners' Classification), Konrad Juszczyszyn ng Poland (2-0, round-of-16), Dutch Jan Van Lie Rop (2-0, quarterfinals) at Eklent Kaci ng Albania noong semifinals sa iskor na 2-1.

Sa isang produktibong 2022, ilang beses nang nakasampa sa podium ng iba't-ibang mga paligsahan si 44-taong-gulang na pambato ng Zamboanga City. Nakaakyat na siya sa trono ng High Stakes One Pocket Championships sa Dayton, Ohio; nagkampeon na rin siya sa Texas Open One Pocket na ginanap sa Skinny Bob's Billiards (Round Clock, Texas).

Sariwa rin si 2007 World 9-Ball Billiards Championships runner-up Gomez sa isang panalo laban kay Corey Deuel ng USA sa Champions One Pocket Challenge.

Samantala, sasargo rin si Gomez kasama nina Carlo Biado, Johann Chua, Lee Van Corteza, Jeffrey De Luna at Roland Garcia sa US International Open 9-Ball sa Sheraton Norfolk Waterside Hotel sa Virginia simula Oktubre 28.

Mayroong 122 iba pang manunumbok bukod sa anim na Pinoy ang umaasinta rin ng titulo sa malaking event na nabanggit. Nakatakda ring makipagtagisan ng husay sina Biado, Corteza, Garcia at Gomez sa One Pocket event kung saan si Gomez ang nagtatanggol na kampeon.

Naghati sa 3rd place sina Biado at Chung Ko sa U.S. Open

ni Eddie M. Paez Jr. - @Sports | October 17, 2022

Napunta kay Francisco Sanchez Ruiz ng Spain ang prestihiyosong tropeo at simbolikong "green jacket" bilang kampeon matapos isalya si Austrian Max Lechner sa finals, 13-10, noong huling araw ng 2022 US Open Pool Championships sa Harrah's Resort ng Atlantic City, New Jersey.

Naghati naman sina 2021 US Pool king Carlo Biado at 2019 World 10-Ball Championships winner Ping Chung Ko ng Taiwan sa pangatlong puwesto dahil hindi sila nakaahon mula sa final 4 matches ng kompetisyong sinalihan ng 256 sa pinakamalulupit na cue artists mula sa iba't-ibang parte ng globo.

Wagi ang mga Europeans sa "Asia vs. Europe" sa semifinals na torneo. Nangibabaw si Lechner kay Ko sa dikdikang engkwentro, 11-10. Isang "Scratched ball" ng Taiwanese sa game 21 ang naging susi ng "ball-in-hand" na bentahe at pag-usad ni Lechmer sa championship round.

Sa kabilang dako, nakakusot din si "World Cup of Pool" titlist Sanchez kay Biado sa gitgitang salpukan sa kabilang hati ng semis, 11-10. Maagang nadehado si "Black Tiger" (2-5, 6-10) pero nakasibad ito sa isang 10-10 na tabla bago kinapos.

Nauna rito, napagtagumpayan ni 2017 World Games gold medalist Biado ang hamon ni Konrad Juszczyszyn ng Poland sa iskor na 10-7. Pagkatapos nito ay humarang sa daraanan niya si Taiwanese Hsieh Chia Chen kung saan hindi pinaporma ni "Black Tiger" Biado anģ karibal, 10-0. Bukod dito, pinabagsak din ni Biado si Petri Makonnen ng Greece, 9-4, sa unang pagsubok sa knockout stage bago nagpakita ng angas kontra kay Japanese Naoyuki Oi, 9-6, sa round of 32.