Golfer Malixi, runner-up sa Malaysian Amateur

ni Eddie M. Paez Jr. @Sports | December 21, 2022

Muling humataw si Pinay golf protege Rianne Mikhaella Malixi ng isang impresibong resulta matapos nitong yakapin ang pangalawang puwesto sa 118th Malaysian Amateur Open sa Senai, Johor, Malaysia.

Umiskor ang 15-taong-gulang na si Malixi ng 5-under-par 283 strokes sa fairways ng Palm Resort Golf & Country Club. Ito ay galing sa apat na araw na kartadang 73-68-71-71 at nakatulong sa isang 2-5 na pagtatapos para sa Pilipinas dahil pumanglima rin sa paligsahan ang kababayang si Lotis Kaye Go (285/ 73-72-73-71).

Si South Korean Hyosong Lee (11-under-par 277) ang hinirang na reyna habang kay Singaporean Aloysa Atienza (2-under-par 286) naman napunta ang pangatlong puwesto. Tanging ang trio nina Lee, Malixi at Atienza lang ang mga kalahok na nakapagsumite ng under par na iskor.

Dahil sa runner-up performance, nagpapatuloy ang pagpapakita ni Malixi ng mabangis na potensiyal para sa bansa. Matatandaang noong isang buwan ay naisalba ng dalagita ang huling upuan sa podium ng Women's Amateur Asia Pacific Championships (Pattaya, Thailand).

Ipinatong din sa ulo ng dalagita mula sa Quezon City ang korona ng Singha Thailand World Junior Championships sa (Hua Hin, Thailand). Bukod pa rito ay napagwagian din niya ang runner-up honors sa 88th Singha Thailand Amateur Open sa fairways ng Panya Indra Golf Club sa Bangkok.

WGM Frayna, reyna sa Blitz Chess C'ships

ni Eddie M. Paez Jr. - @Sports | December 11, 2022

Pinakawalan ni Woman Grandmaster Janelle Mae Frayna ang tunay na angas ng kanyang laro upang koronahan ang sarili bilang reyna ng Blitz Chess sa National Women's Championships Grand Finals sa Quezon City.

Nagsilbi itong pambawi ng tanging WGM ng bansa matapos siyang pumangalawa lang sa larangan ng standard chess kung saan runaway champion si WIM Marie Antoinette San Diego.

Walong panalo at tatlong tabla ang ipinakita ng dating pamosong pambato ng Far Eastern University na si Frayna upang irehistro ang walang-talong marka na 9.5 puntos mula sa 11 salang sa board ng paspasang ahedres.

Malayong segunda ang naging papel ni Woman International Master Jan Jodilyn Fronda dahil 7 puntos lang ang kanyang naipon habang nagsosyo sa pangatlong baytang sina untitled lady woodpushers April Joy Claros (6.5 puntos) at Bea Mendoza (6.5 puntos).

Samantala, nangunguna ang National University sa UAAP Season 85 Chess Tournament Stage 2 Women's Division pagkatapos ng 5 rounds. Malaking tulong dito ang apat na mga panalong naiposte nito.

University of the Philippines naman ang umaalagwa sa kalalakihan dahil sa bitbit na tatlong tagumpay. Sa High School Division naman, kulay ng FEU ang kumikislap sa Boys at Girls brackets. Ang mga binatilyo ay nanghiya ng Ateneo De Manila (4.0-0.0) at De La Salle Zobel (3.5-0.5).

Biado, champ, Centeno, 2nd sa Medalla Light

ni Eddie M. Paez Jr. - @Sports | November 21, 2022

Kumislap ang mga kulay ng bandila ng Pilipinas sa South America nang magkampeon si Carlo Biado sa kalalakihan samantalang sumegunda naman si Chezka Centeno sa kababaihan ng US Pro Billiards Series: Medalla Light Puerto Rico Open sa Convention Center ng San Juan, Puerto Rico.

Tatlong mga manunumbok ang nakaramdam ng husay ni "Black Tiger" Biado sa huling araw ng kompetisyong umakit ng mga malulupit ng bilyarista mula sa iba't-ibang bahagi ng daigdig.

Sa quarterfinals, umangat ang Pinoy kontra kay Albanian Eklent Kaci sa iskor na 2-1.

Pabor din kay Biado ang 2-1 na resulta sa paghaharap nila ni Venezuelan Jesus Atencio noong semifinals.

At sa huling match-up ng paligsahan, bokya ang natanggap na marka ni Daniel Maciol ng Poland sa kamay ng Pinoy pagkatapos ng dalawang laro.

Kasama rin sa mga kinasangkapan ni Biado para maselyuhan ang walang-mantsang marka sina Bart Czapala (Poland, 2-0), Yukio Akagariyama (Japan, 2-0), Ralf Souquet (Germany, 2-1), Asian 9-Ball 3rd placer Johann Chua (2-0) at dating World 10-Ball champion Ko Ping Chung (Taiwan, 2-1).

Isang tropeo at halagang $25,000 ang napasakamay ng dating World Games gold medalist at 2022 Hanoi SEA Games champion mula sa Pilipinas.

Sa kababaihan, bokyang iskor (2-0) ang ipinatikim ni Centeno kina Maria Juana, Monica Webb, Lu Silviana, Yuki Hiraguchi, bago niya sinilat ng dalawang beses si 2010 World 10-Ball queen Jasmin Ouschan mula sa Austria sa iskor na 2-1.

Sa finals, inalat na ang reyna ng bilyar sa Asya at tumiklop kay Taiwanese Tzu Chien Wei.