Di na alam ang gagawin… Nawawalang junakis, madir dapat nang magdasal

ni Sister Isabel del Mundo - @Mga kuwento ng buhay at pag-ibig | December 12, 2023

Dear Sister Isabel,

Advance Merry Christmas sa inyo r’yan. 

Gusto kong sumangguni sa inyo, kasi alam kong kayo lang ang makakapagpalubag ng loob ko ngayon. Nawawala ang anak ko at hindi namin siya makita. Kung saan-saan na namin siya hinanap at nag-report na rin kami sa pulis, pero hindi pa rin namin siya makita. Kade-debut pa lang niya nu'ng nawala siya. Simula nang mawala siya, ‘di na ko nakakain at nakatulog. Malaki na rin ang pinayat ko. May alam ba kayong orasyon para magbalik ang isang taong nawawala? Kung meron, tulungan n’yo ako.

Nagpapasalamat,

Grace ng Masbate

Sa iyo, Grace,

Ikalma mo ang iyong kalooban. Ang pinakamaganda mong gawin ay magdasal ng taimtim na walang halong alinlangan upang dinggin ng Diyos ang panalangin mo na bumalik na ang nawawala mong anak. Humingi ka ng tulong sa Diyos. Walang imposible sa Diyos basta’t manalig ka lang sa kanyang kapangyarihan. Mag-novena ka kung kinakailangan. 9 days novena kung sino man ang patrong pinananaligan mo.

Sa tanong mo kung may alam akong orasyon o dasal para bumalik ang anak mo, dasalin mo ang Sumasampalataya at tumigil ka sa salitang “paririto” bigkasin mo ang iyong kahilingan sabay banggit ng buong pangalan ng iyong anak. Ang sunod mong bigkasin ay “bumalik ka na sa amin, pumarito ka na muli sa bahay natin. Hinihintay ka na namin.” Dasalin mo ito ng 49 days. Mabisa ang dasal na ‘yan. Marami nang lumayas o nawala ang nakabalik dahil sa dasal na ‘yan. Subukan mo, wala namang mawawala kung susubukan mo ito. Nawa makabalik na sa lalong madaling panahon ang anak mo.

Martes o Biyernes mo umpisahan ang dasal na walang patlang, hihina ang bisa ng dasal kapag napatlangan. Hanggang dito na lang. Huwag kang mawalan ng pag-asa. Habang may buhay, may pag-asa. Isang araw magugulat ka na lang, nasa harapan mo na ang nawawala mong anak.

Sumasaiyo,

Sister Isabel del Mundo

Magdasal ka na, sister (38)

ni Maria Angela Gonzales @Kuwentong Pag-Ibig | December 10, 2023

Hinarang ng masasamang tao ang kotseng sinasakyan ng kanyang mga magulang matapos itong magpunta sa isang orphanage para mag-donate. Hindi lang mga magulang niya ang kasama sa trahedya na iyon, dahil maging ang mga magulang ni David ay kasama rin du’n. Matalik na magkaibigan kasi ang kanilang mga magulang. 

“Iwanan mo na lang kaya ako rito?” Nag-aalalang sabi niya kay Mark. 

“At bakit ko naman gagawin iyon?”

“Baka kasi hulihin ka ni…”

“Wala naman akong masamang ginawa. Hindi rin naman sapat ang ebidensyang sinasabi ng kaibigan mo.”

Malalim na buntong hininga ang kanyang pinawalan. “Ewan ko nga ba kung bakit ganu’n ang sinabi ni David.”

“Nagseselos kasi siya.”

Noon lang din niya naisip na nanliligaw nga pala sa kanya si David. Hindi naman kasi niya iniisip na may gusto ito sa kanya. Mas gusto niya kasi itong maging kaibigan. Hindi rin niya mai-imagine na nakikipagyakapan at nakikipaghalikan siya rito. 

Hindi man sila magkadugo, pero nakakadiring isipin iyon. Tinuturing niya na kasi itong parang kapatid. Kaya para sa kanya, maituturing na incest iyon. 

“Puntahan na natin ang mga madre,” wika niya. 

Nanlaki ang mga mata niya nang makita niyang bilog na bilog ang buwan. Lalo tuloy dumagundong ang kanyang dibdib. 

“Bakit?”

“Full moon ngayon.”

“Eh, ano naman?” Nagtatakang tanong nito sa kanya. 

“Naalala ko sa tuwing bilog ang buwan, may namamatay. Tulad ng…” 

“Ng ano?”

“Full moon din noong namatay ang aming mga magulang.”

Kumunot ang noo ni Mark sa sobrang pagkalito. “Ano bang gusto mong sabihin?”

“Puntahan na muna natin sila,” wika niya habang nag-aalala para sa mga madreng nasa loob ng kumbento. 

Sa kanyang isipan may boses na nagsasabing, “kasalanan ng mga taong iyon kung bakit namatay ang ating mga magulang. Kung hindi nila pinapunta sa orphanage ang ating mga magulang, buhay pa sana sila ngayon.” galit na galit na sabi ng batang si David. 

Itutuloy…

Tibo, gusto nang ipaalam ang tunay na pagkatao

ni Sister Isabel del Mundo - @Mga kuwento ng buhay at pag-ibig | December 10, 2023

Dear Sister Isabel,

Nawa’y nasa mabuti kayong kalagayan gayundin ang inyong pamilya at mga kasamahan d’yan sa Bulgar. 

Isa akong lesbian pero hindi halata dahil napakaganda ko umano. Walang nakakaalam ng lihim ko, kundi ako lang, maski ang mga magulang ko ay wala ring alam. 

Ang problema ay nahihirapan na akong itago ang tunay kong pagkatao. Gusto ko nang malaman ng lahat na ako ay isang tomboy. Ano ang tamang diskarte para hindi mabigla ang mga mahal ko sa buhay at iba pang taong nakapaligid sa akin?

Hihintayin ko ang payo n’yo.

Nagpapasalamat, 

Baste ng Batangas

Sa iyo, Baste,

Sa panahon ngayon, tanggap na ng lipunan ang kagaya mo. Sa palagay ko ay mauunawaan ka rin ng mga taong nakapaligid sa iyo lalo na ng parents mo. Lumantad ka na upang lumuwag na ang pakiramdam mo, at para gumaan na rin ang pamumuhay mo. Huwag kang mag-alala sa sasabihin ng ibang tao sa iyo. Ang mahalaga nagpakatotoo ka sa sarili mo, at lumagay ka sa tamang landas ng buhay. 

Sumasaiyo,

Sister Isabel del Mundo