Gayuma (9)

ni Maria Angela Gonzales @Kuwentong Pag-Ibig | December 24, 2023

Biglang natauhan si Gabriel sa ginawa ni Princess, pero hindi niya ito magawang itulak. Sa katunayan, masarap naman kasi talaga humalik ang kanyang nobya.

Para tuloy siyang nakalutang sa alapaap ng mga sandaling iyon. 

“Hey,” wika niya pagkaraan. Hindi kasi niya maintindihan kung bakit ‘yun ginawa ng kanyang mahal. 

“I love you,” wika nito habang nakangiti sa kanyang nobyo. 

Hindi tuloy niya mapigilan ang mapangiti sabay tugon ng, “I love you too.”

‘Di niya alam kung bakit biglang gumaan ang pakiramdam niya, samantalang kanina ay ang bigat-bigat, at gusto na niyang isipin na kaya ganu’n ang kanyang pakiramdam ay dahil sa pagmamahal ni Princess. Kahit tuloy lalaki siya, nakaramdam pa rin siya ng matinding kilig. 

“Napaka-sweet n’yo naman d’yan.” 

Hindi na niya pinagkaabalahan pang lingunin ang mga ito dahil ang atensyon niya ay nakatuon lang kay Princess. Mahal na mahal niya ang kanyang kasintahan, kaya handa niyang gawin ang lahat para lang mapasaya ito. Kaya nga, pinili niyang pasukin din ang mundo ng showbiz. Masasabi naman niyang masaya siya. Bukod sa nasiyahan siya sa kanyang ginagawa, kasama pa niya lagi ang kanyang pinakamamahal. Wala na siyang gugustuhin pang makasama kundi si Princess lang. Habang sinasabi niya iyon sa kanyang sarili, hindi niya namamalayan na may tao rin palang nakakaramdam ng inis at galit dahil nakokontra ang kanyang mga ginagawang hakbang para makuha niya si Gabriel Monteverde. 

Bigla tuloy naisip ni Baninay, dapat na ba niyang gamitin ang matinding ritwal para makuha ang kanyang senyorito?

Itutuloy…

Gayuma (8)

ni Maria Angela Gonzales @Kuwentong Pag-Ibig | December 23, 2023

Napahinto sa paghakbang si Gabriel dahil biglang dumagundong ang pintig ng kanyang puso, at bigla siyang kinabahan. 

“Ano’ng nangyayari sa’yo?” Manghang tanong sa kanya ni Princess.

“Wala, okey lang ako.”

Kumunot ang noo ng kanyang nobya at sabay sabing, “parang hindi ka okey.”

“Ang kulit mo naman!”

Bigla siyang natigilan sa sinagot nito. Hindi kasi ugali ni Gabriel ang mapikon, pero ngayon ay parang pikon na pikon ito, at matalim na matalim pa ang tingin nito sa kanya. Para tuloy gusto niyang humagulgol ng mga sandaling iyon. 

“Ayoko sanang mapikon, pero pinipikon mo ako,” inis nitong sabi sa kanya. 

“Sorry.”

“Dapat ka talaga humingi ng tawad sa akin.” 

Kung hindi lang napigilan ni Princess ang kanyang sarili, tiyak na sisigaw at iiyak siya.

Kakaiba ang nararamdaman niya rito. Para kasing ibang tao ang kanyang kaharap. 

“Sorry kung may kasalanan ako sa’yo.”

“Nakakabuwisit ka.”

“Bakit ba kasi? Ano bang nangyayari sa’yo?” Nag-aalalang tanong niya sa nobyo. 

“Hindi ko alam.” 

Mahina ang boses nito na para bang may kung ano’ng nangyayari. Samantalang kanina ay ang supla-suplado nito. Nang titigan niya ang mga mata nito, nakita niyang masyado itong malamlam. Tingin niya ay may sumasalbahe rito. 

Ang salitang sumasalbahe ay tumutukoy kapag ginagayuma o kinukulam ang isang tao.

Sa tingin niya ay ginagayuma si Gabriel, at wala siyang ibang pinagdududahan kundi si Baninay lamang. Gusto niya tuloy lapitan at saktan ang dalaga, pero bigla niyang naisipang kontrahin ang panggagayuma sa kanyang nobyo, kaya naman bigla niya itong niyakap at buong kapusukang hinalikan. 

Itutuloy…

Gayuma (7)

ni Maria Angela Gonzales @Kuwentong Pag-Ibig | December 22, 2023

Ang sabi ng nanay niya ay huwag niyang gagamitin nang husto ang kanyang kapangyarihan, dahil maaari silang matunton ng kanilang mga kamag-anak.

Hindi niya alam kung bakit kailangan nilang magtago sa kanilang mga kalahi.

Hindi na rin naman niya inalam pa ang dahilan dahil wala naman siyang balak sundin ang ina. 

“Nangangako ka ba?” Buong diing tanong ng kanyang ina.

“Oho,” wika niya kahit alam niyang magiging isang malaking kasinungalingan lamang iyon. 

Matindi ang pag-ibig na kanyang nararamdaman para kay Gabriel, kaya handa niyang gawin ang lahat para mahalin din siya nito. Hindi niya alam kung maaari nga ba itong magkaroon ng katuparan pero nakatitiyak siyang may kakayahan siyang gawin ito. 

Napahagikgik nga siya nang masampal niya ang babaeng pinakamamahal nito. Alam niyang Princess ang pangalan nito pero mas gusto niyang tukuyin ito sa pangalang ‘babaeng iyon’ dahil nabubuwisit siyang bigkasin ang pangalan nito. Hindi niya kasi talaga maatim na isa itong prinsesa. 

Well, totoo naman. Para sa mga magulang nito isa itong prinsesa at maaari pa itong maging reyna kung pakakasalan nito si Gabriel. 

“Siguraduhin mo, ah?!”

“Opo.”

“Kailangan mo ring isaksak sa utak mo na iba tayo sa kanila.”

Hindi man niya maintindihan kung ano’ng eksaktong ibig sabihin ng kanyang ina, binalewala na lang niya. Basta ang kailangan ay magawa ang kanyang nais, at ‘yun ay ang maagaw si Gabriel, ngunit paano? 

Napangisi siya dahil may eksenang pumasok sa kanyang utak kung saan siya ay nakaupo sa sahig at napapaligiran ng mga kandilang itim. Siyempre, may sindi ang mga ito at siya naman ay may kung anu-ano’ng sinasabing ritwal. Sa pamamagitan ng mga ritwal na hindi niya maintindihan, alam niyang magkakaroon ng katuparan ito. Hindi na niya inintindi ang galit ng ina dahil mas importante ang kanyang pangarap at pag-ibig para sa kanyang Senyorito Gabriel.

Itutuloy…