Gayuma (12)

ni Maria Angela Gonzales @Kuwentong Pag-Ibig | December 29, 2023

‘DI alam ni Gabriel kung bakit nakaramdam siya ng pagkapaso nang yakapin niya si Princess. Daig pa niya ang nakuryente kaya agad siyang bumitaw sa pagkakayakap sa kanyang nobya. 

“What's wrong?” Nagtatakang tanong nito sa kanya. 

Lalong kumunot ang kanyang noo sa tanong nito. Hindi naman kasi ito palasalita ng Ingles kung hindi naman ito kinakausap sa wikang iyon. Ngunit, hindi ibig sabihin noon ay hindi na ito marunong makipagbalitaktakan sa wikang Ingles. Sumali sa Declamation si Princess noong high school sila. Confident ito sa pagsasalita ng banyagang wika, kaya naman ito ang tinanghal na champion, kaya lang ngayon ay parang kahit dalawang salita lang ang sinabi nito ay parang kay tigas ng dila nito. 

“Ano bang sinasabi mo?” Nagtatawa niyang tanong sa sarili. 

Napailing siya dahil hindi niya maintindihan kung bakit napansin niya ang mga detalyeng iyon. Gayung dapat ay masiyahan siya sa pagdilat nitong muli. 

“Okey na ba ang pakiramdam mo.”

“Yes, miss na miss na kita,” malambing nitong sabi. 

Yayakapin sana siya nito, pero parang awtomatiko ang kanyang pag-iwas. Agad siyang lumayo rito para hindi siya maabot. 

“Masaya ako na okey ka na. Teka, tatawagin ko ang doctor,” wika niya. 

Bumuka ang bibig nito para sana magsalita, pero agad na siyang kumilos para iwanan ito. ‘Di niya alam kung bakit ganu’n ang nararamdaman niya, pero ‘di siya komportable rito, at pakiramdam niya ay may mali.

“Ikaw ba ang naaksidente?” Natatawang tanong niya sa sarili. 

Kung umasta kasi siya ay parang kakaiba gayung wala naman siyang ipinagdarasal kundi ang magising na si Princess. Nagtataka lang siya kung bakit kahit natupad na ang gusto niyang mangyari ay parang may kulang. Parang hindi ganito ang nararamdaman niya kapag siya’y tinititigan, at kinakausap ni Princess. Para tuloy gusto niyang humalakhak. Napakaimposible naman kasing sa isang saglit ay nagbago na ang kanyang damdamin. 

Mahal niya si Princess, ngunit bakit nang magising ito ay parang hindi tumitibok ang kanyang puso para rito. Parang isa lang din ito sa mga taong madalas niyang makasalamuha. 

Itutuloy…

Gayuma (11)

ni Maria Angela Gonzales @Kuwentong Pag-Ibig | December 28, 2023

Mahal na mahal ni Gabriel si Princess kaya handa niyang gawin ang lahat para rito. Lahat ay ibibigay niya para lang mapasaya ang kanyang nobya. Ngunit sa pagkakataong ito, alam niyang hindi niya iyon magagawa. 

Kahit kasi marami siyang pera, hindi sapat na dahilan iyon para magising si Princess.

Marahas na buntong hininga ang kanyang pinawalan. Sobrang bigat ng kanyang dibdib.

Pakiwari niya ay mayroong boksingero na ginagawang punching bag ang kanyang puso sa sobrang pag-aalala. Hanggang sa kasalukuyan kasi ay hindi pa nagkakamalay si Princess. Sampung baitang naman kasi ang kinahulugan nito. 

Ayon sa doctor, wala naman siyang dapat ipag-alala dahil wala naman daw na-damage sa utak nito at maayos naman ang tibok ng puso ni Princess. Ngunit, hindi pa rin niya makuhang maniwala at magtiwala. Ang ibig niya ay magising na si Princess. Pangako pa niya sa kanyang sarili, kapag nagising na ito, agad niya itong pakakasalan. Gusto niya ‘pag kinasal sila ay masiyahan ito nang husto. Ngunit, paano niya na magagawa iyon? 

“Miss na miss na kita, mahal ko,” wika niya habang nakahawak sa kanang kamay ni Princess.

“Miss you too.” 

Bigla tuloy siyang napatingin kay Princess at nanggilalas siya nang makita niyang nakadilat na ito at hindi na niya napigilan ang kanyang sarili na yakapin ito sa sobrang pananabik. 

Itutuloy…

Gayuma (10)

ni Maria Angela Gonzales @Kuwentong Pag-Ibig | December 27, 2023

“Princess….”

Natigilan siya sa pagsusuklay nang marinig niyang may tumawag sa kanya. Pamilyar sa kanya ang boses kaya naman napakunot ang kanyang noo. Hindi man niya matandaan kung sino ang nagmamay-ari ng boses na iyon, nakasisigurado naman siyang kilala niya ito. 

Nang muling tawagin nito ang kanyang pangalan, tumayo na siya. Palakas nang palakas ang pagtawag na para bang sinasabing kailangan na niya itong puntahan at harapin. 

“Sino ‘yan?” Tanong niya paglabas ng kuwarto. 

Walang sumagot sa kanya, pero may anino siyang nakitang tumakbo sa may hagdanan.

Sa tingin niya ay gusto nitong makipaglaro sa kanya. Ibig niyang mairita, pero naisip niyang baka isa ito sa kababata niyang dumalaw sa kanya para bumati o maaari rin namang kamag-anak, tauhan o katrabaho. 

Malapit na kasi siyang maging Mrs. Monteverde, dahil noong isang linggo ay nag-propose na sa kanya si Gabriel at agad niya naman itong sinagot. Mahal na mahal niya ito kaya kahit sabihin pa ng iba na nasa rurok na siya ng tagumpay wala siyang pakialam. Mas gusto niyang makuha ang apelyido ni Gabriel kaysa sa best actress trophy at kung anu-ano pang karangalan. 

May usapan din kasi sila ni Gabriel na magku-quit na siya sa showbiz kapag pumayag itong maging partner niya sa isang pelikula. May isang salita siya, kaya kailangan niya itong panindigan, at dumating na rin siya sa puntong nais na niyang baguhin ang kanyang buhay kasama ang kanyang nobyo. 

“Gabriel?” Hindi siguradong tawag niya. 

Naisip niyang baka fiancé niya ang nagbibiro sa kanya. Naisip niyang kahit boses babae ang kanyang narinig, maaaring nag-iba ito ng boses para lituhin siya. Samantala, may hagikgik siyang narinig sa hagdan kaya roon siya nagpunta. 

“Ayan malapit na,” sabi nito. 

‘Di niya alam kung bakit naisipan niyang bumaba. Siguro nga’y dahil alam niyang nandu’n ang nagbibiro sa kanya. Ngunit, paghakbang palang niya ay biglang nayanig ang kanyang mundo dahil may natapakan siyang kung ano na naging dahilan ng kanyang pagkadulas. 

“Love!” Sigaw ni Gabriel, pero narinig din niyang mayroong biglang humalakhak na para bang siyang-siya sa nangyari. 

Itutuloy…