411 bagong kaso ng Delta variant ng COVID-19

ni Lolet Abania | October 11, 2021

Nakapagtala ang Department of Health (DOH) ng 411 bagong kaso ng mas nakahahawang Delta variant ngayong Lunes.

Sa isang media forum, sinabi ni DOH Undersecretary Maria Rosario Vergeire na ang pinakabagong isinagawang sequencing nitong Oktubre 8 ay may kabuuang 747 samples na nakolekta noong Pebrero, Abril, Mayo, Agosto at Setyembre.

Ayon kay Vergeire, sa mga naturang samples, 88 ang nagpositibo sa test sa Alpha variant habang 78 ang positive sa test sa Beta variant.

“We are doing retrospective sampling to trace the beginning of the Delta variant introduction to the country as well as the earliest cases,” ani Vergeire.

Umabot na sa kabuuang 14,517 samples with lineages ang na-sequenced ng DOH.

Sa bilang na ito, 26.2% ay positibo sa Delta variant na itinuturing na pinaka-common lineage sa buong bansa, 22.8% ang positibo sa Beta variant, at 20.2% naman ang positibo sa Alpha variant.

Samantala, sinabi ni Vergeire na sa 945 sequenced samples mula sa returning overseas Filipinos (ROFs), mayroong 630 ang positibo sa isang variant of concern.

“A gradual increase in the proportion of the variant of concerns with respect for the total samples sequenced has been seen at the national level since the detection of the first local Alpha and Beta variant cases,” sabi ni Vergere.

Aniya, ang variant of concern cases ay binubuo lamang ng 23.2% ng mga samples na nakolekta noong Pebrero.

Subalit, umakyat ito ng 82.8% ng mga samples na nakolekta naman ng Marso.

“This increase has been consistent for the succeeding months,” saad ni Vergeire.

Sa ngayon, ang variant of concern cases ay binubuo ng 97.7% ng mga samples na nakolekta nitong Setyembre.

“It is important to note, however, that only samples with collection dates in September only come from the first two weeks of the month,” wika ng kalihim.

“In addition, similar to other variants of concern, since the detection of the first local Delta variant case collected in April, an increase in the proportion of Delta variant cases were seen in the succeeding months,” sabi pa ni Vergeire.

Mayor Sara, nagpositibo sa COVID-19

ni Jasmin Joy Evangelista | October 10, 2021

Nagpositibo sa COVID-19 si Davao City Mayor Sara Duterte-Carpio, ayon sa lokal na pamahalaan nitong Sabado ng gabi.

"Everyone who came in close contact with Mayor Sara in the last 14 days is hereby advised to self-monitor for symptoms and get RT-PCR tested five to seven days from your contact with her," ayon sa post sa Facebook account ng kanyang opisina.

May mild symptoms ang alkalde at ngayon ay kasalukuyang naka-quarantine.

Kahapon, nag-post ng pasasalamat si Mayor Sara sa kanyang mga supporters na nagnanais na tumakbo siya sa pagkapangulo.

“Wala man ako sa Sofitel, hinding-hindi naman kayo nawalan ng pag-asa at tiyaga sa paghihintay,” aniya sa kanyang Facebook post.

Nag-file ng certificate of candidacy si Duterte-Carpio sa pagka-mayor ng Davao City.

Lumalaban din sa insomnia at anxiety.. Andrea Brillantes, positibo sa COVID-19

ni Lolet Abania | October 9, 2021

Inamin ng aktres na si Andrea Brillantes na nahihirapan siya sa sakit niyang insomnia at anxiety dahil apektado ang kanyang mental health, nasabay pa ang paglaban niya sa COVID-19.

Sa isang interview ng King of Talk na si Boy Abunda, sinabi ni Andrea na siya ay asymptomatic habang ikinuwento nito ang mga pinagdaanan habang nasa isolation. Sinabi ng star ng “Huwag Kang Mangamba” na inuubos niya ang kanyang oras sa pagbabasa ng libro sa umaga pero nag-i-struggle naman siya sa gabi.

“Ang pinakamahirap po kasi para sa akin, I have insomnia and anxiety. Sa araw sobrang kaya ko naman lahat. Ginawa ko lang, I just read books. Pagdating po ng gabi, doon po ako nahihirapan,” sabi ni Andrea.

“Hirap po ‘ko makatulog. Ngayon po to be honest . . . takot ako mag-isa. Lapitin po kasi ako ng multo,” ani pa niya. Nang tanungin pa si Andrea tungkol sa kanyang insomnia, nai-share ng dalaga ang kanyang kondisyon na aniya, maaaring nagsimula ito ilang taon na ang nakakalipas kung saan ang kanyang body clock ay nag-iba sa mura pa niyang edad nu’ng pumasok na siya sa entertainment industry.

Kuwento ni Andrea, nakakaranas siya madalas ng mga nightmares at sleep paralysis. “Lagi po akong binabangungot. Lagi akong nagkaka-sleep paralysis. So, nagkaroon ako ng fear na matulog kasi may mga tao na nagkaka-heart attack sa pagtulog nila. Hindi na sila nagigising,” sabi pa ng aktres.

Subalit, si Andrea na agad humingi ng tulong sa mga doktor ay nagsabing ang kanyang isolation ang nagturo sa kanya ng maraming bagay, kung saan pinatunayan niya sa kanyang pamilya at mahal sa buhay na kaya na niyang mag-isa.

“Gusto ko ipakita sa kanila na kaya ko. Kaya ko mag-isa. Kakayanin ko kahit mahirap,” sabi ni Andrea. Ayon pa sa dalaga, kailangang i-practice natin ang tinatawag na “mind over matter” mindset.

“Huwag mo lang isipin. Ngayon ko lang nagawa ’yung treatment sa sarili ko ’pag ‘di ako makatulog, lagi ko lang iniisip, ‘No one’s gonna hurt you, Blythe.’ Kasi ako lang naman ’yung nag-iisip na may mananakit sa’kin. Pero wala naman talaga,” ani pa niya. “’Pag ‘di ko siya iisipin, it does not exist. It only exists when you think about it too much.”