P-Duterte sa Omicron variant: “Gusto kong patayin ‘yan!”

ni Jasmin Joy Evangelista | November 30, 2021

Ipinahayag ni Pangulong Rodrigo Duterte na nais niyang patayin ang Omicron variant upang tuluyan na itong mawala.

"Gusto kong patayin ‘yan kaya lang hindi ko malaman kung saan ko—gusto kong barilin ‘yan buang na ‘yan," ani Duterte sa kanyang meeting kasama ang National Task Force Against COVID-19.

Hindi rin aniya magdadadalawang-isip ang pangulo na magpatupad ng paghihigpit sa bansa sakaling makapasok sa bansa ang Omicron variant.

Matatandaang maraming mga bansa na kabilang ang Pilipinas ang naghigpit sa flights lalo na sa mga biyahero na galing sa South Africa kung saan unang nadiskubre ang Omicron.

Sa Enero 2022... Edad 5-11, target bakunahan kontra-COVID-19

ni Lolet Abania | November 29, 2021

Plano ng gobyerno na simulan na ang pagbabakuna kontra-COVID-19 ng mga batang edad 5 hanggang 11 sa Enero ng susunod na taon.

Ayon kay vaccine czar Secretary Carlito Galvez Jr., agad nilang isasagawa ito kapag binigyan na ng Food and Drug Administration (FDA) ng emergency use authorization (EUA), ang mga vaccines para gamitin ng mga bata, sa katapusan ng Disyembre.

“Ang plano namin once na lumabas ito, immediately, we will execute it. Ang plano namin is first quarter ng 2022 so January mag-start tayo. We want to finish that immediately sa first quarter,” sabi ni Galvez sa isang interview.

Sinabi rin ni Galvez na target naman ng pamahalaan na matapos ang pediatric vaccination sa unang quarter ng 2022 na sakto lang sa planong muling pagbubukas ng klase.

“So that ‘yung ating opening ng classes ay magsimula na at maprotektahan natin ‘yung ating children because of the Omicron. We don’t know yet the possibilities, ‘yung vulnerabilities ng mga children with this variant,” ani pa ni Galvez.

Sa ngayon, inumpisahan na ng gobyerno ang pagbabakuna ng mga minors na nasa edad 12 hanggang 17.

Una nang sinabi ng FDA na pinag-iisipan nila ang ibang formulation at ibaba ang dosage ng Pfizer vaccine para sa pagbabakuna ng mga batang edad 5 hanggang 11 laban sa COVID-19.

Ayon naman kay FDA director general Dr. Eric Domingo, inaasahan ng ahensiya ang Pfizer na mag-a-apply ng isang emergency use authorization para sa pagbabakuna ng mga batang edad 5 hanggang 11 sa Disyembre.

Dahil sa Omicron variant.. 7 pang bansa bawal sa ‘Pinas — IATF

ni Lolet Abania | November 28, 2021

Inaprubahan ng Inter-Agency Task Force (IATF) ngayong Linggo ang pagpapalawig ng travel restrictions sa pito pang mga bansa hanggang Disyembre 15 dahil sa naiulat na bagong kaso ng COVID-19 variant Omicron.

Kabilang ang Austria, Czech Republic, Hungary, The Netherlands, Switzerland, Belgium, at Italy na idinagdag sa mga bansang nasa red list, kung saan unang inilagay sa listahan ang mga south African nations gaya ng South Africa, Botswana, Namibia, Zimbabwe, Lesotho, Eswatini, at Mozambique.

Sa isang pahayag, sinabi ni Cabinet Secretary at acting Presidential spokesperson Karlo Nograles na ang sinumang inbound international traveler mula sa mga nabanggit na mga bansa sa loob ng huling 14 na araw bago pa ang kanilang pagdating sa Pilipinas ay hindi papayagang makapasok anuman ang kanilang vaccination status.

“Only Filipinos returning to the country via government-initiated or non-government-initiated repatriation and Bayanihan Flights may be allowed entry subject to the prevailing entry, testing, and quarantine protocols for Red List countries, jurisdictions, or territories,” sabi ni Nograles.

Pinangalanan ng World Health Organization (WHO) ang bagong nadiskubreng B.1.1.529 variant Omicron, na unang na-detect sa South Africa.

“With Omicron designated as a Variant of Concern, the IATF likewise approved the recommendations to strengthen local COVID-19 response,” ani Nograles.