100 personnel ng MRT3 at PNR, positibo sa COVID-19

ni Lolet Abania | January 3, 2022

Mahigit sa 100 personnel ng Metro Manila’s rail lines ang nagpositibo sa test sa COVID-19, batay sa anunsiyo ng mga opisyal nito ngayong Lunes, kasabay ng pagtaas ng mga bagong kaso ng virus sa bansa.

Ayon kay Metro Rail Transit Line 3 (MRT3) Director for Operations Michael Capati, 17 personnel ng rail line ang positibo sa COVID-19 sa ginawang mass antigen testing sa kanilang depot ngayong Lunes ng umaga.

Nakatakda ring magsagawa sa mga naturang empleyado ng confirmatory RT-PCR test sa Martes, Enero 4.

Sinabi naman ni Philippine National Railways (PNR) Assistant General Manager Celeste Lauta na nakapag-test sila ng 357 empleyado ng rail lines, kung saan 87 ang nagpositibo sa antigen tests habang pinauwi na rin agad ang mga ito para sa isolation.

20 staffers may COVID-19.. Headquarters ng BBM-Sara UniTeam, isinara

ni Lolet Abania | January 3, 2022

Nakatakdang isara ang campaign headquarters nina presidential aspirant Ferdinand “Bongbong/BBM” Marcos Jr. at ng kanyang running-mate Davao City Mayor Sara Duterte-Carpio simula Lunes matapos na ilang staffers ang nagpositibo sa test sa COVID-19, pahayag ng kanilang kampo.

Ayon sa spokesman ng dating senador na si Vic Rodriguez, iniutos ni Marcos ang pagsasara ng BBM-Sara UniTeam headquarters, “until further notice” matapos aniya, “more than 20 staff were tested positive today.”

Sinabi ni Rodriguez na nire-require sa campaign headquarters na lahat ng bisita at mga staff na sumailalim sa antigen tests ng tinatayang dalawang beses sa isang linggo upang masiguro ang kanilang kaligtasan.

Ayon pa sa spokesman, ang pagsasara nito ay para magbigay-daan sa disinfection.

Ani rin Rodriguez na si Marcos, “also ordered the deferment of all activities of the UniTeam starting today until January 15 this year.” “However, campaign preparations and other administrative functions of the UniTeam will proceed non-stop through work-from-home arrangements and virtual meetings of the concerned staffers and campaign personnel,” saad ni Rodriguez sa isang statement.

“In this regard, all public appearances, sorties and assemblies of the BBM-Sara UniTeam will be postponed during the said period,” wika pa ni Rodriguez.

40 empleyado ng PPA, nagpositibo sa test sa COVID-19

ni Lolet Abania | January 3, 2022

Nasa kabuuang 40 empleyado ng Philippine Ports Authority (PPA) sa kanilang head office at sa National Capital Region (NCR) ang nagpositibo sa test sa COVID-19.

Ayon kay PPA vice chairman at general manager Jay Santiago, ang mga nasabing kawani ay agad na pinauwi sa kanilang tirahan para sa isolation matapos na magpositibo sa antigen test ngayong Lunes.

Kaugnay nito, isinailalim simula Enero 3 hanggang 15, 2022 sa Alert Level 3 ang NCR matapos maiulat ang pagsirit ng mga bagong kaso ng COVID-19 sa bansa.

Ngayong araw, nakapagtala ang bansa ng 4,084 bagong kaso ng COVID-19 habang umabot sa 24,992 ang active cases.

Nasa kabuuang 2,855,819 ang positibo sa virus habang 2,779,241 naman ang nakarekober at 51,586 ang nasawi sa COVID-19.