Seafarer sa Iligan City, nagpositibo sa Omicron COVID-19 variant — DOH

ni Lolet Abania | January 8, 2022

Isang returning seafarer na taga-Iligan City ang naitala ng Department of Health (DOH) na nagpositibo sa test sa mas nakahahawang COVID-19 Omicron variant.

Ayon sa DOH, ang nasabing seafarer ay kabilang sa 29 Omicron variant cases na na-detect nitong Huwebes. Sinabi ng ahensiya na nag-travel ang seafarer mula sa Kenya at bumalik sa Iligan City nitong Disyembre 30.

“This case arrived on December 16, completed isolation until December 30. On December 30, he was discharged, transferred, and arrived in CDO (Cagayan de Oro),” ani DOH Undersecretary Maria Rosario Vergeire sa mga reporters ngayong Sabado.

Binanggit naman ng DOH na hindi ito kinokonsidera bilang unang kaso sa Mindanao, ang kaso ayon sa ahensiya ay kinaklasipika bilang isang returning overseas Filipino (ROF).

“Since this is an ROF po we do not count them under any region. Thus, there is still no case for Region 10 since wala pang local case doon,” sabi ni Vergeire.

Sa ngayon, nakapagtala na ang DOH ng 43 kumpirmadong Omicron variant cases sa bansa.

Ayon pa sa DOH, sa bagong kaso ng Omicron variant, 10 ay mga ROFs habang 19 ang mga local cases na ang mga address ay nasa National Capital Region (NCR).

250 health workers ng PGH, may COVID-19

ni Lolet Abania | January 8, 2022

Nasa tinatayang 250 healthcare workers ng Philippine General Hospital (PGH) ang tinamaan na ng COVID-19, ayon sa pamunuan ng ospital ngayong Sabado.

“Kung ang gagamitin natin na base ay 1,600 o ipagpalagay mo nang 1,000, mga 250 frontliners,” ani PGH spokesperson Jonas Del Rosario sa Laging Handa public briefing.

Bilang tugon sa pagtaas ng bilang ng COVID-19 admissions, sinabi ni Del Rosario na bahagya nilang binago ang kanilang polisiya hinggil sa updated isolation at quarantine protocols na ipinatutupad ng Inter-Agency Task Force (IATF) para sa mga healthcare workers.

“Basta wala po silang symptoms, tuloy lang po ang trabaho. Kasi po hindi namin kayang i-quarantine ang napakaraming empleyado, doktor, nurses at mga support staff kasi wala na pong matitira rito sa ospital,” ani Del Rosario.

“So ngayon ang policy namin, unless maging symptomatic ka, for example ikaw ay na-expose sa isa na may COVID pero wala ka pa namang symptoms, tuloy lang ang trabaho, hindi ka magku-quarantine. ‘Yan po ang crisis response ng PGH ngayon,” paliwanag ng opisyal.

Ayon kay Del Rosario, para maprotektahan ang kanilang mga healthcare workers laban sa impeksiyon, “leveled up” na ang kanilang personal protective equipment (PPE) na may N95 masks, at nagsasagawa ang pamunuan ng daily monitoring sa kanilang kondisyon.

Nitong Biyernes, inanunsiyo ng Malacañang na inaprubahan ng IATF ang pinaigsing isolation at quarantine period para sa mga fully vaccinated na health workers na na-infect o na-expose sa COVID-19.

“Hospital infection prevention and control committees are authorized to implement shortened quarantine protocols of five days for their fully vaccinated healthcare workers consistent with health care capacity needs and individualized risk assessment,” bahagi ng nakasaad sa IATF Resolution 156.

Gayundin, batay sa IATF Resolution, ang hospital infection prevention at control committees ay maaari ring magpatupad ng shortened isolation protocols laban sa COVID-19 para sa fully vaccinated na healthcare workers kung saan nakasaad, “in extreme circumstances and upon weighing risks and benefits.”

Agriculture Secretary Dar, nagpositibo sa COVID-19

ni Jasmin Joy Evangelista | January 8, 2022

Nagpositibo sa COVID-19 si Agriculture Sec. William Dar. Ito ay kanyang inanunsiyo nitong Biyernes.

Sa kanyang Twitter post, sinabi ni Dar na siya ay nakararanas ng mild na sintomas at kasalukuyang nagpapagaling.

“I wish to inform the public that I tested positive for COVID with mild symptoms, and currently recovering while in quarantine. I will continue to discharge my duties and responsibilities in the Department of Agriculture,” pahayag niya.

Nitong Biyernes, nakapagtala ang Pilipinas ng 21,819 bagong kaso ng COVID-19. Ito ang pinakamataas na bilang na naitala simula September 12, 2021 na may 21,411 cases.