Dahil sa backlog.. 7 sa 10, kayang bigyan ng COVID-19 vaxx certificate — DILG

ni Lolet Abania | January 14, 2022

Pito lamang sa 10 indibidwal na nag-apply para sa COVID-19 vaccination certificate sa pamamagitan ng VaxCertPH portal ang maaaring makakuha ng sertipikasyon, dahil ito sa tinatawag na backlogs sa data uploading, ayon sa Department of the Interior and Local Government (DILG).

Paliwanag ni DILG spokesperson Jonathan Malaya sa isang interview na ilan sa mga local government units (LGUs) ay mas nakatutok sa kanilang vaccination program kumpara sa pag-update ng mga datos sa online portal.

“Dahil po dito, sa 10 taong nag-apply, pito lang ang may success. ‘Yung tatlo, no record found,” sabi ni Malaya. Payo ni Malaya sa mga hindi pa nakakakuha ng digital copy ng kanilang vaccination certificate na iprisinta muna ang kanilang vaccination cards sakaling mag-inspeksyon ang mga awtoridad sa kanila.

Kaugnay nito, maraming LGUs na ang nagpasa ng mga ordinansa hinggil sa pagpapatupad ng restriksyon sa mga hindi pa bakunadong indibidwal.

Gayundin, tsini-check ng mga awtoridad ang mga vaccination cards ng mga indibidwal na lumalabas. Ilang services din, gaya ng public transport ay nagre-require na ng vaccination cards bago pa makasakay.

Matatandaang noong Nobyembre, binanggit ni DILG Secretary Eduardo Año na ang immunization record ng gobyerno ay nananatiling mayroong 10 million gaps sa mga entries nito.

Hinimok naman ng Malacañang ang mga LGUs na madaliin na ng mga ito, ang encoding ng mga vaccine recipients’ information sa verification database system ng bansa.

Mula Enero 16-31.. NCR, 50 pang lugar nasa Alert Level 3 — Malacañang

ni Lolet Abania | January 14, 2022

Isasailalim ng pamahalaan ang National Capital Region (NCR) at tinatayang 50 iba pang mga lugar sa Alert Level 3 mula Enero 16 hanggang 31, sa gitna ng pagtaas ng COVID-19 cases, ayon sa Malacañang ngayong Biyernes.

Bukod sa Metro Manila, ang mga lugar sa ilalim ng Alert Level 3 simula sa Enero 16 ay Baguio City, Ifugao, Mountain Province, Dagupan City, Ilocos Sur, Santiago City sa Region 2, Cagayan, Angeles City, Aurora, Bataan, Bulacan, Olongapo City, Pampanga, Zambales, Rizal, Batangas, Cavite, Laguna, Lucena City, Marinduque, Romblon, Camarines Norte, Catanduanes, Naga City, Sorsogon, Iloilo City, Iloilo, Negros Occidental, Guimaras, Lapu-Lapu City, Bohol, Cebu province, Negros Oriental, Ormoc City, Biliran, Eastern Samar, Leyte, Northern Samar, Southern Leyte, Western Samar, City of Isabela sa Region 9, Zamboanga City, Zamboanga del Sur, Bukidnon, Iligan City, Misamis Occidental, Misamis Oriental, Davao del Sur, Davao del Norte, General Santos City, South Cotabato, Surigao del Sur, Agusan del Norte, Lanao del Sur.

Una nang isinailalim ng gobyerno ang mga lugar sa Alert Level 3 mula Enero 14 hanggang 31 ang Benguet, Kalinga, Abra, La Union, Ilocos Norte, Pangasinan, Nueva Vizcaya, Isabela, Quirino, Nueva Ecija, Tarlac, Quezon province, Occidental Mindoro, Oriental Mindoro, Camarines Sur, Albay, Bacolod City, Aklan, Capiz, Antique, Cebu City, Mandaue City, Tacloban City, Cagayan de Oro City, Davao City, Butuan City, Agusan del Sur, Cotabato City.

Sa ilalim ng Alert Level 3, maraming establisimyento ang pinayagang mag-operate ng 30% indoor venue capacity subalit para lamang ito sa mga fully vaccinated individual at 50% outdoor venue capacity hangga’t ang mga empleyado ay fully vaccinated na.

Ipinagbabawal naman sa Alert Level 3, ang in-person classes, contact sports, funfairs/perya, at casinos na mga aktibidad at establisimyento.

30 health workers ng main Covid hospital sa Olongapo City, may COVID-19

ni Jasmin Joy Evangelista | January 14, 2022

Umabot na sa 30 health workers ng main Covid hospital sa Olongapo City ang nagpositibo sa COVID-19, ayon sa opisyal ng ospital nitong Huwebes.

Sa isang interview, sinabi ni Dr. Jewel Manuel, chief ng James L. Gordon Memorial Hospital (JLGMH), na 20 sa infected hospital workers ang naka-confine sa hospital wards habang 10 ang naka-home quarantine.

Ayon pa kay Manuel, nakararanas ng mild symptoms ang mga health workers at walang nasa kritikal na kondisyon.

Mayroon ding 6 na COVID patients, kung saan 2 dito ang nasa malalang kalagayan, ang kasalukuyang nagpapagaling sa nasabing ospital.

Gayunman, nananatiling bakante ang intensive care unit sa ospital.