Vaping mas mababa ang panganib kaysa paninigarilyo — pag-aaral sa UK

ni Chit Luna @News | May 23, 2024

Isang grupo sa United Kingdom ang nagpakita ng mga siyentipikong ebidensya at opinyon ng mga eksperto na nagpapatunay na ang paggamit ng vape ay mas mababang panganib na dulot kumpara sa paninigarilyo.

Ayon sa UK Vaping Industry Association (UKVIA), ang vaping ay higit na hindi gaanong nakakapinsala tulad ng paninigarilyo na kumikitil ng halos 80,000 buhay bawat taon sa UK.

Ang UKVIA ay isang nangungunang organisasyong nagtatanggol sa mga benepisyo ng paglipat mula sa paninigarilyo tungo sa vaping. Nilabas nito ang pahayag matapos ang industriya ng vaping at mga vapers ay hindi isinama sa talakayan ng Tobacco and Vapes Bill sa parliamentary committee.

Ang Office for Health Improvement and Disparities (OHID), isang ahensya ng gobyerno, ang nagsabing ang pinsalang dulot ng vaping ay mahigit 95 porsiyento na mas mababa kaysa sa mga sigarilyo.

Idinagdag ng UKVIA na ang vaping ay nagdudulot ng maliit na bahagi lamang ng panganib ng paninigarilyo. Ang ganap na paglipat mula sa paninigarilyo patungo sa vaping ay may malaking benepisyo sa kalusugan, dagdag nito.

Kinumpirma sa publiko ni Sir Chris Whitty, Chief Medical Officer ng England, na ang vaping ay mas ligtas kaysa sa paninigarilyo, at ang paglipat ay isang positibong hakbang sa kalusugan.

Natuklasan naman ng isang pag-aaral ng Brunel University London na ang National Health Service ay makakatipid ng higit sa kalahating bilyong pounds kada taon kung kalahati ng mga naninigarilyong nasa wastong edad sa England ang lilipat sa vaping.

Nalaman ng isang pagsisiyasat noong 2019 na ang sinasabing sakit sa baga sa U.S. ay nagmula sa mga kontaminado at ilegal na produkto na naglalaman ng THC, ang psychoactive component sa cannabis, at hindi sa mga legal na produktong nicotine vaping.

Sinabi ni Alice Davies, isang opisyal ng impormasyon sa kalusugan sa Cancer Research UK, na nakakalito ang mga naglabasang headline dahil ang mga kasong ito ay hindi dapat maiugnay sa regular na nicotine vaping.

Sinabi ni Davies na walang mga naitalang kaso sa UK ng paggamit ng mga pinagbawal na kemikal katulad sa US.

Sinabi naman ng OHID Nicotine Vaping sa England na ang maling ulat sa EVALI o electronic cigarette or vape associated lung injury outbreak sa United States ay dapat ihiwalay sa nicotine vaping.

Kinumpirma ng Cancer Research UK na walang kumpirmadong kaso ng popcorn lung na iniulat sa mga taong gumagamit ng mga e-cigarette sa UK, at ang mga vape ay hindi nagdudulot ng ganitong pinsala sa baga.

Binanggit din ng UKVIA ang pinakabagong datos mula sa Action on Smoking and Health (ASH), isang public health charity, na nagpapakita na halos 4.5 milyong matatanda sa Great Britain ang gumamit ng vaping para bawasan o ganap na ihinto ang paninigarilyo.

Itinuturing ng National Health Service (NHS) ang vaping bilang isa sa mga pinakaepektibong paraan para huminto sa paninigarilyo, habang ang Office for Health Improvement and Disparities ay nag-ulat na ang vaping ay karaniwang tulong na ginagamit ng mga tao para tumigil sa paninigarilyo.

Si James Tucker, pinuno ng pagsusuri sa kalusugan sa Office for National Statistics (ONS) ay nagsabi na ang vaping ay may pangunahing papel sa pagbabawas sa antas ng paninigarilyo sa buong UK.

Ang isang komprehensibong pagsusuri ng Cochrane, isang pandaigdigang network ng mga mananaliksik sa kalusugan, na tumingin sa datos mula sa mahigit 300 klinikal na pagsubok at kinasangkutan ng higit sa 150,000 katao, ay nagpapakita na ang e-cigarette ay kabilang sa mga pinakaepektibong tulong na magagamit para huminto ang mga naninigarilyo.

Itinanggi din ng UKVIA ang ugnayan sa pagitan ng regular na vaping at paninigarilyo. Ayon sa isang report ng ASH UK, ang vaping ay napatunayang hindi isang "gateway” sa paninigarilyo.

Nabanggit sa nasabing ulat na habang ang paggamit ng e-cigarette ay tumaas sa England sa pagitan ng 2010 at 2021, ang antas ng paninigarilyo ng mga kabataan ay patuloy na bumaba sa parehong panahon.

Sinabi ng ASH UK na ito ay hindi sumusuporta sa gateway hypothesis sa antas ng populasyon.

US FDA sumuporta sa vape bilang alternatibo sa sigarilyo

ni Chit Luna @News | May 1, 2024

Sinuportahan ng mga grupo ng konsyumer sa Pilipinas ang komentaryo ng U.S. Food and Drug Administration Center for Tobacco Products (FDA-CTP) na nagsabing ang mga produktong Smoke-free ay may mas mababang panganib sa kalusugan kaysa sa sigarilyo.

Ang komentaryo ng FDA-CTP, na may pamagat na "Nicotine e-cigarettes: Considerations for healthcare providers," ay nagsabi na ang mga smoke-free alternatives tulad ng e-cigarettes, ay karaniwang may mas mababang panganib sa kalusugan.

Binanggit nito ang datos ng U.S. National Academies of Sciences, Engineering and Medicine (NASEM) na naghayag ng katibayan na ang paglipat mula sa sigarilyo sa e-cigarette ay makakabawas sa pagkakalantad ng isang tao sa nakakalasong carcinogens na matatagpuan sa usok ng tabako.

Si FDA-CTP Director Brian King, ang isa sa may akda ng komentaryo, ay inilathala ng Nature Medicine, isang peer-reviewed medical journal.

Ikinumpara nito ang mga panganib ng iba't ibang produktong tabako.

Ang iba pang may-akda ay sina Dr. Benjamin A. Toll ng Medical University of South Carolina Department of Public Health Sciences at Dr. Tracy T. Smith ng Department of Psychiatry and Behavioral Sciences.

Nabanggit ng komentaryo ang mga maling pananaw ng mga manggagamot at iba pang mga propesyonal sa kalusugan ay maaaring humantong sa pagpapayo ng mali sa mga pasyente.

Sinabi nito na ang maling pang-unawa ng mga doctor ay maaaring makapigil sa mga naninigarilyo na ganap na lumipat sa e-cigarette.

Ayon sa komentaryo, dapat isaalang-alang ng mga medikal na propesyonal ang pagtuturo sa mga pasyente tungkol sa panganib ng mga produkto ng tabako at ang potensyal na benepisyo sa kalusugan ng ganap na paglipat sa may mababang panganib na produkto.

Ayon kay Anton Israel, presidente ng Nicotine Consumers Union of the Philippines (NCUP), ang komentaryo na isinulat mismo ng FDA-CTP chief ay nagpapatunay na ang mga smoke-free products tulad ng vape, heated tobacco at nicotine pouch ay nagdadala ng mas mababang panganib kaysa sa tradisyonal na mga sigarilyo.

Sinabi ni Israel na ang mga smoke-free alternatives na ito ay hindi nagdudulot ng usok na naglalaman ng libu-libong nakakapinsala at potensyal na nakakapinsalang kemikal.

Sinabi naman ni Joey Dulay, presidente ng Philippine E-Cigarette Industry Association (PECIA), na ang mga tobacco harm reduction (THR) products ay maaaring makatulong sa milyun-milyong Pilipinong naninigarilyo na nasa hustong gulang na talikuran na ang sigarilyo.

Halos isang milyong dating naninigarilyo sa Pilipinas ang huminto na sa paninigarilyo, ani Dulay.

Sinabi pa niya na ang Kongreso ng Pilipinas mismo ang kumikilala sa papel ng mga smoke0free products sa pagbibigay ng mga alternatibo sa mga Pilipinong naninigarilyo sa ilalim ng Vape Law na ipinasa noong 2022.

Si Dr. Lorenzo Mata Jr., isang doktor, ay nanawagan din sa mga kapwa medikal na propesyonal na isaalang-alang ang bigat ng pinakabagong komentaryo ng FDA-CTC.

Aniya, dapat tingnan ang mga siyentipikong katotohanan tungkol sa THR at pag-aralan kung paano ito makatutulong sa milyun-milyong Pilipino na huminto sa paninigarilyo.

Binigyang-diin ng komentaryo na hindi dapat gumamit ng anumang uri ng produktong tabako ang kabataan.

Sa mga nasa hustong gulang na naninigarilyo, binanggit nito ang kahalagahan ng paggamit ng mga pamamaraan ng pagtigil na nakabatay sa ebidensya.

P25-M Flava vape nakumpiska sa operasyon ng DTI at PNP

ni Chit Luna @News | April 26, 2024

Sinuspinde ng FTEB ang pagbebenta ng Flava products dahil sa umano'y paggamit ng flavor descriptors sa kanilang produkto na sinasabing nakakaakit sa mga menor de edad. Photo: DTI - Fair Trade Enforcement Bureau

Aabotsa P25 milyong halaga ng ipinagbabawal na Flava vape products ang nakumpiska ng mga tauhan ng Department of Trade and Industry (DTI) at Philippine National Police (PNP) sa ikinasang operasyon laban sa isang vape store malapit sa Baclaran Elementary School sa Paranaque City.

Ayon kay DTI-FTEB Director Fhillip Sawali, nasa 452 boxes ng illegal vape products ang kanilang nasasamsam sa vape store na mayroong 20 metro lang ang layo sa nasabing paaralan.

Ang pagkumpiska ay naganap makaraan ang sanib-puwersang pagsalakay sa vape store dahil sa paglabag ng Republic Act No. 11900, o ang Vaporized Nicotine and Non-Nicotine Products Regulation Act of 2022. Alinsunod sa batas, bawal ang pagbebenta ng vapes o e-cigarettes na malapit sa mga paaralan, playground at iba pang tinatambayan ng kabataan na nasa 100 metro.

Noong Marso 25, ipinag-utos ng FTEB ang suspension ng pagbebenta, manufacturing, pag-angkat o import at distribusyon ng vape na gawa ng Flava kasunod ng paglabag sa RA 11900. Inatasan din ni DTI Secretary Alfredo Pascual ang FTEB personnel na tanggalin o kumpiskahin ang non-compliant products sa merkado bilang pagdiriin na maunawaan ng publiko, at vape store ang kanilang mandato na suportahan lamang ang legitimate businesses upang matiyak ang kaligtasan ng consumer.

“The DTI will not shirk from its responsibility of enforcing trade, industry and consumer protection laws to help legitimate businesses and promote consumer protection,” ayon kay Pascual. Nagbabala rin ang Kalihim sa mga manufacturer, importers, distributor at retailer laban sa pakikipagsabwatan sa ilegal na akto ng pag-trade ng illicit vapes at iba pang labag na mga produkto.

Nitong April 24 operation, natuklasan ng awtoridad ang nasabing tindahan na gumagamit ng milk tea shop bilang front sa pagtitinda at pagdi- distribute ng banned vapes. Sinabi ni Sawali na ang nasabing establisimyento ay maraming nalabag na provision sa RA 11900, kasama na ang Section 9 na pagbabawal sa pagbebenta ng vapes sa loob ng 100 meters mula sa paaralan at Section 12 na nagbabawal sa paggamit ng flavor descriptors na kaakit-akit para sa kabataan.

Sinuspinde ng FTEB ang pagbebenta ng Flava products dahil sa umano'y paggamit ng flavor descriptors sa kanilang produkto na sinasabing nakakaakit sa mga menor de edad.

Tiniyak naman ni Sawali at DTI Assistant Secretary Amanda Marie Nograles, pinuno ng DTI- Consumer Protection Group, na ang operasyon ay magbibigay ng matibay na ebidensiya laban sa patuloy na pagbebenta ng ipinagbabawal na Flava products.

Ang RA 11900 o mas kilala sa Vape Law ang siyang nagtatakda ng regulasyon o panuntunan sa importation, assembly, manufacture, sale, packaging, distribution, promotion at sponsorship ng vape products, devices at bago o novel tobacco products.

Layunin ng batas na matiyak ang healthy environment, maiwasan ang pagbebenta ng nasabing produkto sa mga kabataan at mapigilan ang ilegal na pagbebenta nito. Itinakda rin ng Vape Law ang implementing rules para sa mga retailers at mga manufacturers.

Tiniyak din ni Pascual na pinaigting nila ang monitoring at enforcement efforts, upang pigilan ang illegal trade ng vape products na ang puntirya ay minors.