Pabahay ng NHA para sa “Yolanda” victims, drawing pa rin after 7 years! ‘Kalokah!!!

ni Imee Marcos - @Imeesolusyon | October 30, 2020

Nakakapikon ang National Housing Authority na puro na lang pangako, pero palaging napapako!

Kamakailan sa budget hearing sa Senado, aba’y tila iwas-pusoy na naman sila! Sinita natin kung bakit magpipitong taon na, wala talagang malinaw na pabahay na nagawa para sa mga naging biktima ng super-Bagyong Yolanda.

Biruin ninyo, sa loob ng pitong taon, ite-turnover pa lang daw nila sa LGUs ang nasa “various stages of completion” ng mga housing project sa katapusan ng 2021! Hello! Bakit hanggang ngayon, on-going pa rin? Ano ang ginawa nila sa pondo sa loob ng pitong taon?

Pwera biro, hindi namin feel ‘yang effort nila sa housing. Wala kaming makitang malinaw na tirahan ng mga biktima sa iba’t ibang lugar na sinalanta ni “Yolanda”! Puro lang palusot. Palibhasa budget hearing at hihirit na naman sila ng pondo?

Ang nakakatawa pa, ang mga opisyal nila, magkaiba ang year ng completion daw ng project. Sabi ng isa 2021, ‘yung isa, 2022. Ano ba talaga? Ano ‘yan, suntok sa buwan na pramis? Plis, pera ng taumbayan ang hawak ninyo, paramdam naman kayo!

IMEEsolusyon diyan, eh, rerepasuhin natin ang mga isusumite nilang mga numero sa aktuwal na proyekto. At kapag nagkataon, hindi naman tayo tatahimik lang.

Kapag nakita nating talagang may nagpabaya, hay naku, abangan ninyo ang susunod na kabanata. Remember, hindi pa aprubado ang budget ninyo, NHA!

Shoutout sa DTI, i-freeze muna ang presyo ng mga karne, wa’ na pera ang madla!

ni Imee Marcos - @Imeesolusyon | October 28, 2020

Ilang tulog na lang ay Pasko na pala. Pero, ang nakasanayan nating selebrasyon, medyo mag-iiba ngayong taon kasi wala munang mga Christmas party!

Ito naman ay para rin sa atin, kaya oks lang. Kailangan nating mag-ingat to the max versus COVID-19, ‘di ba?

May iba namang paraan para mag-celebrate ng Pasko, tayo pang mga Pinoy?! Kahit walang party basta magkakasama ang buong pamilya sa Noche Buena, keri na!

Speaking of Noche Buena, calling DTI! Plis naman, i-freeze muna ang presyo ng baboy, manok, spaghetti at iba pa. Sana man lang kahit ngayong may pandemya, hindi tuyung-tuyo ang Pasko ng ating mga kababayan.

IMEEsolusyon d’yan, virtual parties. Ang mga kaanak natin na hindi makakasama sa Pasko dahil sa pandemya, maaari nating makasama online. Panoorin na lang natin ang isa’t isa sa computer habang nagno-Noche Buena. ‘Ika nga, eh, para-paraan lang, ‘di ba?

IMEEsolusyon din sa mga hindi magpa-party — pakiusap natin sa mga LGUs na luwagan ang curfew kahit ilang gabi lang para makapag-Simbang Gabi. Kahit pakanta-kanta o pa-video-video lang, masaya na tayo. Payagan din pati legal na mga paputok bilang pagsalubong sa Bagong Taon.

At ang da best na IMEEsolusyon, mag-share ng blessings sa mga kapuspalad nating mga kapitbahay, kaibigan o kamag-anak. Imbes na maluhong party at exchange gifts, pasayahin natin ang mga bata at matanda na nangangailangan ng pagkalinga.

‘Di nga ba’t ‘yan naman ang tunay na diwa ng Pasko, may pandemya man o wala? Magbigayan at magtulungan — tiyak na ‘yan ang gusto ni Lord. Keri nating lahat kahit walang party, pramis!

Awat na sa pagiging utak-imported, support local!

ni Imee Marcos - @Imeesolusyon | October 26, 2020

Para na tayong sirang plaka na paulit-ulit sa panawagang “No To Importation” ng mga produktong hindi naman tayo kapos, tulad ng bigas, isda, manok at baboy!

Calling the attention ng ating mga kasamahan sa gobyerno! Kapag panahon ng anihan ng palay, no more imports please? ‘Kaloka! Paano makarerekober sa pagkalugi ang mga lokal na magsasaka niyan kung papatayin na ng mga imported na produkto ang kanilang mga ani?

Super nakakapikon ang importasyon na ‘yan. Puro na lang angkat nang angkat, hindi napoprotektahan ang ating mga lokal na magsasaka, mangingisda, poultry at hog raisers. Ano bang meron ang imported products na wala sa mga produktong sariling atin? Hay naku!

Unti-unti nating pinapatay ang kabuhayan ng ating mga kababayang farmers, fishermen, poultry at hog raisers, kapag hindi natin nakontrol ang pag-aangkat ng mga agri products. Magko-collapse ang ating economy, juicekolord!

Dagdag pa ang mga letsugas na smuggler ng isda sa mga fishports lalo na sa Navotas kung saan talamak ang puslitan galing sa ibang bansa. Bukod pa sa dati na nating nabanggit na mga importers ng bigas na pugante sa pagbabayad ng tax. Ano ba?

Pero, no worries, mga dear. IMEEsolusyon ang kulitin natin ang Department of Agriculture sa pagrenda sa mga importers at magtakda ng ban sa imported na bigas tuwing harvest time!

IMEEsolusyon din sa smuggler ng mga isda, inaasahan nating pakikinggan ng BFAR ang hirit nating silipin at patigilin ‘yan. Dagdagan natin ng ayudang pinansiyal ang mga fishermen. Isa pa, dapat siguruhin ang “no entry” sa ‘Pinas ng mga imported na karneng baboy na may sakit, ‘di ba?!

Isantabi na ang utak-imported, para makaraos tayong lahat sa kalamidad na dulot ng pandemya sa ating ekonomiya. Believe me, keri natin ‘yan!