Kailangan ng malawakang crop insurance ng ating mga magsasaka laban sa mga kalamidad!

ni Imee Marcos - @Imeesolusyon | November 6, 2020

Bukod sa COVID-19 pandemic, sunud-sunod na bagyo ang namemerwisyo sa ating mga magsasaka, kaya tila nawawalan na sila ng pag-asang makarerekober pa hanggang sa susunod na planting season.

Eh, biruin n’yo naman, katatapos lang ng pamiminsala ng mga ibang mga bagyo, dumating ang super-bagyong Rolly at kasunod pa si “Siony”! Santisima!

Lubog na lubog na ang kabuhayan ng mga magbubukid at luging-lugi na to the max ang benta ng basang palay na pitong piso na lang kada kilo. At mind you, ha, mga mag-iitik na lang daw ang bumibili dahil sa sobrang kaitiman na ng palay.

Ang masaklap, may kabagalan ang dating ng mga ayuda. Ipinarating pa sa aming opisina ng ilang farmer-groups na hindi pa raw nasisilip man lang ang aktuwal na pinsala ng mga nagdaang bagyo sa kanilang mga palayan na hindi na maani dahil sa baha.

Nabaon lalo sa utang ang ating mga magsasaka. Loan dito, loan doon, nakakaawa. Tila ba hindi na sila makakaahon sa paulit-ulit na sistemang ito, Kaya’t no wonder kung marami sa kanila, eh, kapit na sa patalim. Nagbabalak nang ibenta ang kanilang mga lupain. ‘Wag naman sana!

Pero no worries, IMEEsolusyon pa naman d’yan. Inihain natin ang Senate Bill No. 883 para palawakin ang crop insurance ng ating farmers. Hindi na nila hihintaying magdeklara ang gobyerno ng state of calamity o i-assess pa ang pinsala sa agrikultura bago sila makakubra sa insurance. Automatic na silang babayaran kahit pa kasagsagan ng bagyo.

At para magkaroon ng mas mataas na kumpiyansa ang mga pribadong insurer na back-upan ang agricultural investments, nais nating gawing reinsurance agency ang Philippine Crop Insurance Corporation (PCIC) na sasakupin ang agricultural insurance na hindi saklaw ng National Reinsurance Corporation of the Philippines (NatRe).

Labs natin ang mga bayani ng bukid, kaya ‘wag kayo mawalan ng pag-asa. Laban lang, keri ‘yan!

Equal rights ng LGBTQ+ community bilang tao, magkapamilya, joint ownership at bahagi ng lipunan...

aprub ‘yan!

ni Imee Marcos - @Imeesolusyon | November 04, 2020

Sa mata ng Diyos, pantay-pantay tayong lahat na kanyang nilikha at lahat tayo ay may karapatan sa pagmamahal at pagkakaroon ng pamilya.

Pasintabi lang sa iba ang paniniwala, pero pagdating sa mga isyu sa LGBTQ+ community, aprub tayo sa equal rights ng mga beki bilang tao at bahagi ng lipunan. Malapit sila sa ating puso at feel natin kapag naaabuso ang kanilang karapatan.

Walang kinalaman ang gender sa karapatang-pantao at deserve nilang matrato ng tama lalo na’t sinabi ni Pope Francis na ang mga “Homosexual ay may karapatan ding magkaroon ng pamilya at anak sila ng Diyos.”

Masakit sa bangs na bantad ang LGBT sa diskriminasyon at panghahamak. Kahit sabihing tanggap sila ng lipunan, marami pa rin bagay na hindi pa nila lubusang nakakamit kabilang na nga ang right to jointly own property as same-sex partners.

IMEEsolusyon bilang pagsusog na rin sa pahayag ng ating Santo Papa, binuhay natin ang panawagan na bigyan ang same-sex partners ng joint ownership sa kanilang mga property sa pamamagitan ng inihain nating Senate Bill No 417.

Dahil walang batas na magsasa-legal sa same-sex union, inihain natin ang “An Act Instituting a Property Regime for Cohabiting Same-Sex Partners”. Sa panukalang ito, ang same-sex couple na may one year nang nagsasama, ma-e-enjoy ang joint ownership o equal share sa property at income kabilang ang mga donasyon o gifts na nakuha nila habang magkarelasyon. Bongga, ‘di ba!

At para mega-iwas sa mga abusadong ka-relasyon nila, well, hindi natin isinama sa joint ownership ang mga namanang ari-arian ng bawat isa sa kanila habang magkarelasyon. At kapag nag-split sila, nasawi o naging permanently disabled ang isa, dapat equal sila sa hatian ng properties. Right?

Kailangan lang may kasulatan na nagkasundo sila sa joint ownership at properly notarized ito ng abogado.

Bakla man, tomboy o straight, sa usapang rights, lahat tayo dapat pantay-pantay! Agree?

Mababang presyo ng Noche Buena products, ipang-aginaldo ng DTI sa mga Pinoy ngayong Pasko!

ni Imee Marcos - @Imeesolusyon | November 02, 2020

Paskong tuyo ang posibleng maging selebrasyon ng ating mga kababayan ngayong may pandemya. ‘Kaloka!

Malapit na ang Krismas, pero butas pa rin ang bulsa ng ating mga kababayan. Marami pa ang nawalan ng trabaho dulot ng pandemya, kaya hindi malayong tuyung-tuyo talaga, ‘wag naman sana!

Nakakalungkot naman, wala na ngang party-party, tila malabong makapaghanda pa ang maraming pamilya dahil walang pambili kahit singkong duling. At take note, humirit pa ng taas-presyo ang mga manufacturer ng mga pang-Noche Buena items? ‘Susmarya!

Hindi pa nga naaprub ang price hike, meron na agad nagsasamantala. Kesyo, mahal na raw ang karne, at ang dating nasa mahigit P200 hanggang P300 lang na isang kilo ng ham, umaabot na sa halos P500 ang benta? Ano ba ‘yan?

Ayon sa DTI, mahigit sa 20 brands ng limang manufacturers ang humihirit ng price hike tuwing Christmas season. Pero, don’t you worry, guys. I think naman may konsensiya at malasakit ang DTI sa ating mga consumers.

IMEEsolusyon d’yan, eh, ‘wag muna payagan ng DTI ang taas-presyo sa tradisyunal na mga panghanda sa Pasko. Agree?

Ikalawa, IMEEsolusyon din yung habulin ng DTI ang mga hoarder ng Noche Buena items, at busisiing mabuti ang imbentaryo sa mga retail store. Aba, eh, noong June pa lang nag-imbak na ng stocks ang ilang epal na negosyante at ilalabas lang nila kapag tumaas na ang presyuhan. Hello!

Kumpyansa tayong bibigyang-konsiderasyon ng DTI ang mga konsiyumer habang may pandemya. Pasayahin naman natin kahit paano ang ating mga kababayan ngayong Pasko. Ipang-aginaldo na natin sa kanila ang price freeze, Secretary Ramon Lopez, plis?